കാഞ്ഞങ്ങാട്: പടന്നക്കാടിനടുത്തു വീട്ടിനുള്ളില്‍ ഉറങ്ങിക്കിടക്കുകയായിരുന്ന ഒന്‍പതുവയസ്സുകാരിയെ എടുത്തു കൊണ്ടുപോയി ലൈംഗികാതിക്രമത്തിനു ശേഷം ആഭരണങ്ങള്‍ ഊരിയെടുത്തു റോഡരുകില്‍ ഉപേക്ഷിച്ചു.
അക്രമി സ്ഥലംവിട്ട ശേഷം കുട്ടി അടുത്തുള്ള വീട്ടിലേക്കു ഓടിക്കയറി. കോളിംഗ് ബെല്‍ ശബ്ദം കേട്ട് ഇറങ്ങിവന്ന വീട്ടുകാരോടു കുട്ടി സംഭവങ്ങള്‍ വിശദീകരിച്ചു. തുടര്‍ന്നു കുട്ടിയെ ജില്ലാ ആശുപത്രിയില്‍ പ്രവേശിപ്പിച്ചു.
കുട്ടി ലൈംഗികാതിക്രമത്തിന് ഇരയായിട്ടുണ്ടെന്നു ഡോക്ടര്‍മാര്‍ പൊലീസിനെ അറിയിച്ചു.
കുട്ടിയുടെ കഴുത്തിലും ഗുഹ്യഭാഗത്തും പരിക്കുള്ളതായി ഡോക്ടര്‍മാര്‍ പൊലീസിനെ അറിയിച്ചിട്ടുണ്ട്.
ഇന്നു രാവിലെ മൂന്നുമണിയോടെയാണ് സംഭവം. കുട്ടിയുടെ പിതാവ് പതിവുപോലെ കറവു ജോലിക്കു പോയതായിരുന്നു. പോകുമ്പോള്‍ വീടിന്റെ വാതില്‍ ചാരിയിട്ടേ ഉണ്ടായിരുന്നുള്ളു. ഈ വാതില്‍ തുറന്ന് അകത്തു കടന്നാണ് അക്രമി ഉറങ്ങിക്കിടക്കുകയായിരുന്ന കുട്ടിയെ എടുത്തു കൊണ്ടുപോയതെന്നു കരുതുന്നു. വീട്ടിലെ മറ്റ് അംഗങ്ങള്‍ ഉറക്കത്തിലായിരുന്നുവെന്നു പറയുന്നു. പൊലീസ് അന്വേഷണമാരംഭിച്ചിട്ടുണ്ട്.