തമിഴ് സിനിമകളിലെ ഹിറ്റ് ഗാനങ്ങള്‍ക്ക് സ്വരം നല്‍കിയ ഉമ രമണന്‍ അന്തരിച്ചു
തമിഴകത്തിന്റെ പ്രിയ ഗായിക ഉമ രമണന്‍ അന്തരിച്ചു. എഴുപത്തി രണ്ട് വയസായിരുന്നു. ചെന്നൈയില്‍ വീട്ടില്‍ ഇന്നലെ ആയിരുന്നു മരണം. ഗായകന്‍ എ വി രമണന്‍ ആണ് ഭര്‍ത്താവ്. വിഘ്‌നേഷ് ആണ് മകന്‍.
തമിഴ് സിനിമകളിലെ നിരവധി ഹിറ്റ് ഗാനങ്ങള്‍ക്ക് ശബ്ദം നല്‍കിയ ആണ് ഉമ നാരായണന്‍. 1977ല്‍ ശ്രീകൃഷ്ണലീല എന്ന ഗാനത്തോടെയാണ് ഉമ പിന്നണി ഗാനരംഗത്ത് എത്തുന്നത്. ഭര്‍ത്താവിന് ഒപ്പമായിരുന്നു ഗാനാലാപനം. ഇളയരാജയുമായുള്ള കൂട്ടുകെട്ട് ആയിരുന്നു ഉമയെ പ്രശസ്തിയിലേക്ക് നയിച്ചത്. നൂറോളം ഗാനങ്ങള്‍ ഇളയരാജയ്ക്ക് ഒപ്പം ഉമ പാടിയിട്ടുണ്ട്. ‘ഭൂപാലം ഇസൈയ്ക്കും’, ‘അന്തരാഗം കേള്‍ക്കും കാലം’, ‘പൂ മാനേ’ തുടങ്ങിയ പാട്ടുകള്‍ ഇതില്‍ ശ്രദ്ധേയമാണ്. വിജയ് നായകനായി എത്തിയ തിരുപ്പാച്ചി എന്ന ചിത്രത്തിലെ ‘കണ്ണും കണ്ണുംതാന്‍ കലന്താച്ചു’ എന്ന ഗാനമാണ് ഉമ അവാസനമായി പാടിയത്. മണി ശര്‍മ ആയിരുന്നു ഗാനത്തിന് സംഗീതം നല്‍കിയത്. ഭര്‍ത്താവിനൊപ്പം നിരവധി കച്ചേരികളിലും ഇവര്‍ പാടിയിട്ടുണ്ട്. പ്രിയ ഗായികയുടെ വിയോഗത്തില്‍ അനുശോചനം അറിയിച്ച് നിരവധി പേര്‍ രംഗത്ത് എത്തുന്നുണ്ട്.
