ന്യൂഡല്ഹി: ബില്ക്കിസ് ബാനു കൂട്ടബലാത്സംഗക്കേസില് ഗുജറാത്ത് സര്ക്കാരിന് കനത്ത തിരിച്ചടി.
കൂട്ടബലാത്സംഗ കേസിലെ പ്രതികളെ വിട്ടയച്ച സര്ക്കാരിന്റെ നടപടി റദ്ദാക്കി സുപ്രീംകോടതി. വിചാരണ നടന്ന മഹാരാഷ്ട്രയിലെ സര്ക്കാരിനായിരുന്നു അവകാശമെന്നും സുപ്രീംകോടതി പറഞ്ഞു. ബില്ക്കിസ് ബാനു കൂട്ടബലാത്സംഗ കേസിലെ കുറ്റവാളികള്ക്ക് ശിക്ഷാ ഇളവ് നല്കിയതിനെതിരായ ഹര്ജികള് നിലനില്ക്കുന്നതാണെന്ന് സുപ്രീം കോടതി പറഞ്ഞു. ജസ്റ്റിസ് ബി വി നാഗരത്ന അധ്യക്ഷയായ സുപ്രീംകോടതി ബെഞ്ചാണ് വിധി പറയുന്നത്. നിലവില് വിധി പ്രസ്താവം പുരോഗമിക്കുകയാണ്.
കേസില് ജീവപര്യന്തം തടവിന് ശിക്ഷിക്കപ്പെട്ട 11 പേരെ മോചിപ്പിക്കാനുള്ള ഗുജറാത്ത് സര്ക്കാരിന്റെ തീരുമാനത്തെ ചോദ്യം ചെയ്ത് ബില്ക്കിസ് ബാനുവും സി.പി.എം നേതാവ് സുഭാഷിണി അലിയും ടി.എം.സി നേതാവ് മഹുവ മൊയ്ത്രയും അടക്കംസമര്പ്പിച്ച ഹര്ജികളിലാണ് കോടതി വിധി പറഞ്ഞത്. കേസില് പ്രതികളെ വിട്ടയച്ചതില് ഗുജറാത്ത് സര്ക്കാരിനോട് സുപ്രീംകോടതി വിശദീകരണം ചോദിച്ചിരുന്നു. സാധാരണ കേസുകളുമായി ഈ കേസിനെ താരതമ്യം ചെയ്യാനാകില്ലെന്ന് വ്യക്തമാക്കിയ സുപ്രീം കോടതി, ബില്ക്കിസ് ബാനു കേസില് പ്രതികള് കുറ്റം ചെയ്ത രീതി ഭയാനകമെന്ന് ജസ്റ്റിസുമാരായ കെ എം ജോസഫ്, ബി വി നാഗരത്ന എന്നിവരടങ്ങിയ ബെഞ്ച് വാദത്തിനിടെ നേരത്തെ ചൂണ്ടിക്കാട്ടിയിരുന്നു.
