കോട്ടയം: വീട്ടുമുറ്റത്ത് കളിച്ചുകൊണ്ടിരിക്കെ ഏഴുവയസുകാരി പാമ്പുകടിയേറ്റ് മരിച്ചു. ഏഴാം മൈല്‍ ആളുറുമ്പ് വടക്കത്തുശേരിയില്‍ അരുണിന്റെയും ആര്യയുടെയും മകളായ ആത്മജ അരുണാണ് (7) മരിച്ചത്. പാലാ പൈക ഏഴാംമൈലിലാണ് സംഭവം.
കുരുവിക്കൂട് എസ് ഡി എല്‍ പി സ്‌കൂളിലെ രണ്ടാം ക്ലാസ് വിദ്യാര്‍ത്ഥിനിയായിരുന്നു ആത്മജ. ശനിയാഴ്ച ഉച്ചയ്‌ക്ക് ഏഴാംമൈലിലെ വാടകവീടിന് സമീപം കളിച്ചുകൊണ്ടിരിക്കെയാണ് പാമ്പുകടിയേല്‍ക്കുന്നത്. ഉടൻ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. കടിച്ചത് അണലിയാണെന്നാണ് നിഗമനം. മൃതദേഹം പോസ്റ്റ്മോർട്ടത്തിനുശേഷം ബന്ധുക്കൾക്ക് വിട്ടു നൽകും. പിതാവ് അരുൺ വിദേശത്താണ്.