തിരുവനന്തപുരം: സംസ്ഥാനത്തെ 23 തദ്ദേശ വാര്ഡുകളിലേക്ക് നടന്ന ഉപതെരഞ്ഞെടുപ്പില് എല്ഡിഎഫ് 6 സീറ്റുകള് പിടിച്ചെടുത്തു. തിരുവനന്തപുരം നഗരസഭയിലെ വെള്ളാര്, ഒറ്റശേഖരമംഗലം പഞ്ചായത്തിലെ കുന്നനാട്, ചടയമംഗലം പഞ്ചായത്തിലെ കുരിയോട് വാര്ഡുകള് ബിജെപിയില് നിന്ന് പിടിച്ചെടുത്തു. നെടുമ്പാശ്ശേരിയിലെ കല്പക നഗര്, മുല്ലശ്ശേരിയിലെ പതിയാര് കുളങ്ങര മുഴപ്പിലങ്ങാട്ടെ മമ്മാക്കുന്ന് വാര്ഡുകള് യുഡിഎഫില് നിന്ന് പിടിച്ചെടുത്തു. നെടുമ്പാശേരിയില് ഇതോടെ യുഡിഎഫിന് ഭരണം നഷ്ടമായി. മട്ടന്നൂര് നഗരസഭയില് ബിജെപിക്ക് കന്നിജയം നേടി. മട്ടന്നൂര് ടൗണ് വാര്ഡ് കോണ്ഗ്രസില് നിന്നാണ് ബിജെപി പിടിച്ചെടുത്തത്. ടൗണ് വാര്ഡില് കോണ്ഗ്രസ് സ്ഥാനാര്ഥിയെ 72 വോട്ടിനാണ് ബിജെപി സ്ഥാനാര്ത്ഥി എ മധുസൂദനന് പരാജയപ്പെടുത്തിയത്. നഗരസഭയില് ബിജെപിയുടെ ആദ്യ ജയമാണിത്. വെള്ളാറില് സിപിഐ സ്ഥാനാര്ത്ഥി പുനത്തുറ ബൈജു 153 വോട്ടുകളുടെ ഭൂരിപക്ഷത്തിലാണ് വിജയിച്ചത്. തിരുവനന്തപുരം കോര്പ്പറേഷനിലെ വെള്ളാര് വാര്ഡില് ബിജെപിയുടെ സിറ്റിങ് സീറ്റാണ് എല്ഡിഎഫ് പിടിച്ചെടുത്തത്. ഒറ്റ ശേഖരമംഗലം പഞ്ചായത്തിലെ കുന്നനാട് വാര്ഡിലും എല്ഡിഎഫ് ബിജെപിയെ അട്ടിമറിച്ചു. സംസ്ഥാനമൊട്ടാകെ 88 പേരാണ് ജനവിധി തേടിയത്.
