സൗദിയിലെ അൽഹസയിൽ മലയാളി കുടുംബങ്ങൾ സഞ്ചരിച്ച വാഹനം അപകടത്തിൽപെട്ട് രണ്ടാം ക്ലാസ് വിദ്യാർത്ഥി മരിച്ചു. എട്ടു വയസുകാരി ഐറീൻ ജാൻ ആണ് മരിച്ചത്. കോഴിക്കോട് ഫറോക്ക് ചുങ്കം സ്വദേശി ജംഷീർ പാറക്കോട്ടിൻറ്റെ മകളാണ്.
ദമാമിൽ നിന്നും അൽ ഹസയിലെ അൽ ഉഖൈറിലേക്ക് രണ്ട് വാഹനങ്ങളിലായി പുറപ്പെട്ട സംഘത്തിന്റെ ഒരു വാഹനം മറിഞ്ഞാണ് അപകടം.
സുഹൃത്തുക്കളായ മറ്റ് രണ്ട് കുടുംബങ്ങൾക്കൊപ്പം ദമാമിൽ നിന്ന് അൽഹസ്സയിലേക്ക് പോകുകയായിരുന്നു ജംഷീറിന്റെ കുടുംബം. ഐറിൻ ജാനും മറ്റ് കുട്ടികളും സഞ്ചരിച്ചിരുന്ന ലാൻഡ് ക്രൂയിസർ അൽ ഉഖൈറിൽ മറിയുകയായിരുന്നു. വാഹനത്തിലുണ്ടായിരുന്ന ഐറിൻ ജാൻ തൽക്ഷണം മരിച്ചു. മറ്റ് കുട്ടികളും കുടുംബവും നിസാര പരിക്കുകളോടെ രക്ഷപ്പെട്ടു. ദമാമിലെ ഡെയിം എക്യുപ്മെന്റ് റെന്റൽ കമ്പനിയിൽ ഡയറക്ടറായ ജംഷീറിന്റെ മൂത്ത മകളും ദമാം ഇന്ത്യൻ സ്കൂളിലെ നാലാം ക്ലാസ് വിദ്യാർഥിനിയുമായ എമിൻ ജാനും ഇതേ വാഹനത്തിലുണ്ടായിരുന്നു.