കൊച്ചി: മഹാരാജാസ് കോളേജ് സംഘര്ഷത്തില് കെ.എസ്.യു പ്രവര്ത്തകന് ഇജിലാല് അറസ്റ്റില്. കേസിലെ എട്ടാം പ്രതിയാണ് കണ്ണൂര് സ്വദേശിയായ ഇജിലാല്. എസ്.എഫ്.ഐയുടെ പരാതിയിലാണ് ഇജിലാലിനെ അറസ്റ്റ് ചെയ്തത്. എന്വയോണ്മെന്റല് കെമിസ്ട്രി മൂന്നാംവര്ഷ വിദ്യാര്ഥിയാണ്. അതേസമയം, എസ്എഫ്ഐ യൂണിറ്റ് സെക്രട്ടറിയെ കുത്തിയകേസില് പ്രതികള്ക്കായി തെരച്ചില് തുടരുകയാണ്. കെ.എസ്.യു, ഫ്രട്ടേണിറ്റി പ്രവര്ത്തകരായ 15 പേര്ക്കെതിരെയാണ് എറണാകുളം സെന്ട്രല് പൊലീസ് കേസെടുത്തത്. വധശ്രമം അടക്കം ഒന്പതു വകുപ്പുകളാണ് ചുമത്തിയിരിക്കുന്നത്. മൂന്നാം വര്ഷ ഇംഗ്ലീഷ് വിദ്യാര്ത്ഥി അബ്ദുള് മാലിക്കാണ് ഒന്നാം പ്രതി. അധ്യാപകനെ ആക്രമിച്ച ഫ്രട്ടേണിറ്റി പ്രവര്ത്തകനെതിരെ പ്രതിഷേധിച്ചതിലുള്ള വിരോധമാണ് കത്തിക്കുത്തിലേക്ക് നയിച്ചതെന്നാണ് എഫ്ഐആര്. എം.ജി. സര്വകലാശാലാ നാടകോത്സവത്തിന്റെ ഭാഗമായി കാമ്പസിനകത്ത് നാടക പരിശീലനമുണ്ടായിരുന്നു. ഇതിന്റെ ചുമതലക്കാരനായ നാസര് പരിശീലനത്തിനുശേഷം ഇറങ്ങുമ്പോഴാണ് ആക്രമണമുണ്ടായത്. ഒപ്പമുണ്ടായിരുന്ന യൂണിറ്റ് കമ്മിറ്റിയംഗം ബി.എ. ഫിലോസഫി രണ്ടാം വര്ഷ വിദ്യാര്ഥി ഇ.വി. അശ്വതിക്കും കൈക്ക് പരിക്കേറ്റിരുന്നു.
![](https://malayalam.karavaldaily.com/wp-content/uploads/2024/07/car-jsgdvb.jpg)