ഊട്ടി: ദീപാവലി ഉത്സവ സീസൺ മിക്ക കമ്പനികളുടേയും ജീവനക്കാര്ക്ക് ബോണസ് കാലം കൂടെയാണ്. ഗിഫ്റ്റ് വൗച്ചറുകളായും ഇൻസെന്റീവായും മധുരപലഹാരങ്ങളുമായെല്ലാം കമ്പനികള് ജീവനക്കാര്ക്ക് ബോണസ് നല്കാറുണ്ട്.
എന്നാല്, തമിഴ്നാട്ടിലെ കോത്തഗിരിയിലെ തേയില തോട്ടമുട തൊഴിലാളികള്ക്കായി നൽകിയ ദീപാവലി ബോണസാണ് ഇപ്പോൾ സമൂഹമാധ്യമങ്ങളിലെ ചർച്ച. റോയല് എൻഫീല്ഡ് ബൈക്കുകളാണ് ദീപാവലി ബോണസായി തോട്ടം ഉടമ നല്കിയത്. 190 ഏക്കര് വിസ്തീര്ണ്ണമുള്ള തേയില തോട്ടത്തിന്റെ ഉടമയായ പി.ശിവകുമാറാണ് വലിയ സമ്മാനം നല്കി ജീവനക്കാരെ ഞെട്ടിച്ചത്. 627 ജീവനക്കാരാണ് തേയില തോട്ടത്തില് ജോലി ചെയ്യുന്നത്. ഇതില് 15 ജീവനക്കാര്ക്കാണ് രണ്ട് ലക്ഷത്തോളം വില വരുന്ന റോയല് എൻഫീല്ഡ് ബൈക്ക് സമ്മാനമായി നല്കിയത്.മാനേജര്, സൂപ്പര്വൈസര്, സ്റ്റോര് കീപ്പര്, കാഷ്യര്, ഫീല്ഡ് സ്റ്റാഫ്, ഡ്രൈവര് എന്നീ തസ്തികകളില് ജോലി ചെയ്യുന്നവര്ക്കെല്ലാം ബൈക്ക് നല്കിയിട്ടുണ്ട്. ജീവനക്കാര്ക്ക് ബൈക്കിന്റെ കീ നല്കിയതിന് ശേഷം അവര്ക്കൊപ്പം ശിവകുമാര് യാത്ര ചെയ്യുകയും ചെയ്തു
.
