–
:
കൊച്ചി: കളമശ്ശേരിയില് സ്ഫോടനം നടത്തിയത് ഡൊമിനിക് മാര്ട്ടിന് തന്നെയെന്ന് പൊലീസിന്റെ സ്ഥിരീകരണം. രാവിലെ 9.40ന് സ്ഥലത്തെത്തി ബോംബ് വെച്ച് റിമോട്ട് ഉപയോഗിച്ച് ട്രിഗര് ചെയ്യുന്ന ദൃശ്യങ്ങള് ഇയാളുടെ മൊബൈലില് നിന്നും ലഭിച്ചു. ആറുമാസം കൊണ്ട് ഇന്റര്നെറ്റ് മുഖേനയാണ് ഇയാള് ഐഇഡി സ്ഫോടനം പഠിച്ചത്. ഞായറാഴ്ച രാവിലെ നടന്ന സ്ഫോടനം നടത്തിയത് താനാണെന്ന് അവകാശപ്പെട്ട് എറണാകുളം തമ്മനം സ്വദേശി ഡൊമിനിക് മാര്ട്ടിന് നേരത്തെ കൊടകര പൊലീസില് കീഴടങ്ങിയിരുന്നു. തുടര്ന്ന് ഇയാളെ വിശദമായി ചോദ്യം ചെയ്തതിനുശേഷമാണ് ഡൊമിനിക് മാര്ട്ടിന് തന്നെയാണ് പ്രതിയെന്ന് സ്ഥിരീകരിച്ചത്. ഇയാളുടെ അവകാശവാദങ്ങള് സാധൂകരിക്കുന്ന തെളിവുകളും പൊലീസിന് ലഭിച്ചു. സ്ഫോടനം നടത്തിയതിന്റെ ദൃശ്യങ്ങള് ഇയാള് മൊബൈലില് റെക്കോഡ് ചെയ്തിരുന്നു. ഇതാണ് പൊലീസിന് കൈമാറിയത്. രാവിലെ 9.40ന് കണ്വെന്ഷന് സെന്ററിലെത്തിയശേഷം രണ്ട് ഐഇഡി ബോംബുകള് ബോക്സിലാക്കി വെക്കുന്നതിന്റെയും അവിടെവെച്ച് അല്പം മാറി റിമോട്ട് കണ്ട്രോള് ഉപയോഗിച്ച് ട്രിഗര് ചെയ്തശേഷം ഡൊമിനിക് മാര്ട്ടിന് ഓടിപ്പോവുന്നതുമെല്ലാം ദൃശ്യത്തിലുണ്ട്.
യഹോവ സാക്ഷികള് കൂട്ടായ്മയോടുള്ള ആദര്ശപരമായ അഭിപ്രായ ഭിന്നതയെതുടര്ന്നുള്ള പ്രതിഷേധമായാണ് സ്ഫോടനം നടത്തിയതെന്ന പ്രതിയുടെ വെളിപ്പെടുത്തല് സാധൂകരിക്കുന്ന തെളിവുകളും പൊലീസിന് ലഭിച്ചു. ഇയാള്ക്ക് ഐഇഡി എവിടെനിന്ന് കിട്ടിയെന്നത് ഉള്പ്പെടെ പൊലീസ് അന്വേഷിച്ചുവരികയാണ്. ഇയാള്ക്ക് മറ്റാരുടെയെങ്കിലും സഹായം ലഭിച്ചിട്ടുണ്ടെയെന്ന കാര്യങ്ങള് ഉള്പ്പെടെ പൊലീസ് പരിശോധിച്ചുവരുകയാണ്. . മൂന്നു മണിക്കൂര് മുമ്പാണ് ഡൊമിനിക് മാര്ട്ടിന് ഫേയ്സ്ബുക്കില് ലൈവ് വീഡിയോ ചെയ്തിരിക്കുന്നത്. ബോംബ് വെച്ചത് താനെന്നാണെന്നാണ് ഇയാള് വീഡിയോയില് അവകാശപ്പെടുന്നത്.
എങ്ങനെ സ്ഫോടനം നടത്തിയെന്നത് മാധ്യമങ്ങള് കാണിക്കരുതെന്നും ഡൊമിനിക് വീഡിയോയില് പറയുന്നുണ്ട്. അതേസമയം
സംഭവത്തില് മാധ്യമങ്ങള് സ്വീകരിച്ചത് നിലപാടാണെന്ന് മുഖ്യമന്ത്രി പിണറായി വിജയൻ പറഞ്ഞു. ഇതിനിടെയും പ്രത്യേക ലക്ഷ്യം വെച്ചുള്ള പ്രചാരണം ഉണ്ടായി. ആക്രമണത്തിന് പ്രത്യേക മാനം നല്കാന് ശ്രമം ഉണ്ടായി. ഇത് എന്ത് വിവരത്തിന്റെ അടിസ്ഥാനത്തിലാണെന്ന് വ്യക്തമാക്കണം. മന്ത്രിമാര് വരെ മോശം പ്രസ്താവന നടത്തി. വര്ഗീയ നീക്കം നടത്തി. അതേസമയം കേന്ദ്ര സംഘം അന്വേഷണം ഏറ്റെടുത്തിട്ടില്ലെന്നും അദ്ദേഹം വ്യക്തമാക്കി.
