പുത്തന്‍ മൊബൈല്‍ ഫോണ്‍ ചാര്‍ജ് ചെയ്യന്നതിനിടേ പൊട്ടിത്തെറിച്ചു; കിടപ്പുമുറി കത്തി നശിച്ചു, യുവാവ് രക്ഷപ്പെട്ടത് തലനാരിഴക്ക്
പാലക്കാട്: ദിവസങ്ങള്‍ക്കു മുന്‍പു വാങ്ങിയ പുത്തന്‍ മൊബൈല്‍ പൊട്ടിത്തെറിച്ചു കിടപ്പുമുറി കത്തിനശിച്ചു.
യുവാവ് രക്ഷപ്പെട്ടത് തലനാരിഴക്ക്. തിങ്കളാഴ്ച രാത്രി 7 മണിയോടെ പൊല്‍പ്പുള്ളി വേര്‍കോലി ബി.ഷാജുവിന്റെ (40) വീട്ടിലാണ് അപകടമുണ്ടായത്. വീട്ടിലെ കിടപ്പുമുറിയില്‍ ചാര്‍ജ് ചെയ്യാന്‍ വച്ച മൊബൈല്‍ ഫോണ്‍ പെട്ടെന്ന് പൊട്ടിത്തെറിക്കുകയായിരുന്നു. സുഹൃത്ത് വാങ്ങിയ പുത്തന്‍ മൊബൈല്‍ ഫോണ്‍ ഷാജുവിന് ഉപയോഗിക്കാന്‍ കൊടുത്തിരുന്നു. ചാര്‍ജ് ചെയ്യാന്‍ വച്ച് വാതിലടച്ചു പുറത്തേക്കുപോയി. അല്‍പസമയത്തിനു ശേഷം പൊട്ടിത്തെറിയുടെ ശബ്ദം കേട്ടു വാതില്‍ തുറന്നുനോക്കിയപ്പോഴാണു മുറിയിലാകെ തീപടരുന്നത് കണ്ടത്. ഇലക്ട്രിഷ്യനായ ഷാജു ഉടന്‍ തന്നെ വൈദ്യുതി കണക്ഷന്‍ വിഛേദിച്ചു. തുടര്‍ന്നു മോട്ടര്‍ ഉപയോഗിച്ചു വെള്ളം പമ്പ് ചെയ്തു തീയണയ്ക്കുകയായിരുന്നു. പൊട്ടിത്തെറിച്ച ഫോണ്‍ കിടക്കയിലേക്കു വീണതോടെയാണു തീപടര്‍ന്നത്. കിടക്ക, കട്ടില്‍, ഹോം തിയറ്റര്‍, അലമാര, ടിവി, പഴ്‌സിലുണ്ടായിരുന്ന പാന്‍ കാര്‍ഡ്, ലൈസന്‍സ്, 5500 രൂപ എന്നിവ കത്തിനശിച്ചതായി ഷാജു പറഞ്ഞു.
