കാസര്‍കോട്: ജിന്ന് ചികിത്സയുടെ മറവില്‍ പ്രായപൂര്‍ത്തിയാവാത്ത 17 കാരിയെ പീഡിപ്പിക്കുകയും തുടര്‍ന്ന് പെണ്‍കുട്ടിയുടെ മാതാവിനെയും കൂട്ടി ഒളിച്ചോടുകയും ചെയ്ത ഉസ്താദ് മഞ്ചേശ്വരത്ത് പൊലീസിന്റെ പിടിയിലായി. മലപ്പുറം എടവണ്ണ കുണ്ടുതോട് സ്വദേശിയായ ജസല്‍ തങ്ങള്‍ ആണ് പിടിയിലായത്.
ജിന്ന് ചികിത്സക്കായി പതിനേഴുകാരിയെ സ്വന്തം വീട്ടിലേക്ക് വിളിച്ചുവരുത്തി പീഡിപ്പിക്കുകയായിരുന്നു. ചികിത്സയ്ക്കായി ഒപ്പം വന്ന കുട്ടിയുടെ മാതാവുമായി സൗഹൃദം സ്ഥാപിച്ചിരുന്ന ഇയാള്‍ പിന്നീട് ഇവരെയും കൂട്ടി ഒളിച്ചോടുകയായിരുന്നു. കേരളകര്‍ണാടക അതിര്‍ത്തി പ്രദേശമായ ആനക്കല്ലില്‍ ഇരുവരും ഒളിവില്‍ കഴിയുന്നതായി ലഭിച്ച വിവരത്തിന്റെ അടിസ്ഥാനത്തില്‍, മഞ്ചേശ്വരത്ത് നിന്നാണ് എടവണ്ണ പൊലീസും നിലമ്പൂര്‍ സ്‌ക്വാഡും ചേര്‍ന്ന് പ്രതിയെ കസ്റ്റഡിയിലെടുത്തത്. നിരവധിപേര്‍ക്ക് രോഗശാന്തിയും ജിന്ന് ചികിത്സയും നല്‍കുന്ന ആളാണ് പിടിയിലായ ജസല്‍ എന്ന് പൊലീസ് വ്യക്തമാക്കി. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.