പത്തനംതിട്ട: കോന്നി ആനക്കൂട്ടില്‍ ആന പാപ്പാനെ ചവിട്ടിക്കൊന്നു. മോഹനന്‍(65) എന്ന പാപ്പാനാണ് മരിച്ചത്. ശനിയാഴ്ച വൈകീട്ട് മൂന്നരയോടെയാണ് സംഭവം. ആനയുടെ തുമ്പിക്കൈയിലെ മുറിവിൽ മരുന്നുവച്ചു കെട്ടുന്നതിനിടെയായിരുന്നു അപ്രതീക്ഷിത ആക്രമണം. ആക്രമിച്ച ആനയുടെ പാപ്പാന്‍ ഇന്ന് എത്തിയിരുന്നില്ല. പകരമായി മോഹനൻ ആണ് ആനയെ പരിചരിക്കാൻ എത്തിയത്. പരിക്കേറ്റ മോഹനനെ ഉടൻ തന്നെ താലൂക്ക് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
മൃതദേഹം കോന്നി താലൂക്ക് ആശുപത്രിയിലേക്ക് മാറ്റി. നീന എന്ന ആനയുടെ പാപ്പാനാണ് മോഹനന്‍.
രണ്ടാം ശനിയാഴ്ച അവധിയായതിനാല്‍ ഇന്ന് ആനക്കൂട്ടില്‍ സന്ദര്‍ശകര്‍ കുറവായിരുന്നു. ഏറെ വർഷങ്ങളായി കോന്നി ആനത്താവളത്തിൽ പാപ്പാനായി ജോലി ചെയ്തുവരികയായിരുന്നു അന്തരിച്ച മോഹനൻ.