പി പി ചെറിയാൻ

വാഷിംഗ്ടൺ ഡി.സി: ഇന്ത്യൻ അപേക്ഷകർക്കുള്ള ഇബി-1 (എംപ്ലോയ്‌മെൻറ് ബേസ്ഡ് ഫസ്റ്റ് പ്രീഫെറൻസ്‌ ) ഗ്രീൻ കാർഡിന്റെ മുൻഗണനാ തീയതി യു.എസ് വിദേശകാര്യ വകുപ്പ് പുറത്തുവിട്ട 2026 ജൂലൈയിലെ വിസ ബുള്ളറ്റിനിൽ കൂടുതൽ പിന്നോട്ടാക്കി . .ഈ വിഭാഗത്തിൽ അപേക്ഷകരുടെ എണ്ണത്തിലുണ്ടായ വൻ വർദ്ധനവാണ് ഇതിന് കാരണമെന്നു പറയുന്നു.

ജൂലൈ വിസ ബുള്ളറ്റിൻ പ്രകാരം ഇന്ത്യക്കാർക്കുള്ള ഇബി-1 വിഭാഗത്തിന്റെ അന്തിമ തീയതി2022 ഒക്ടോബർ 15 ലേക്ക് മാറ്റി..2026 സാമ്പത്തിക വർഷത്തെ വിസ വിതരണം വാർഷിക പരിധിക്കുള്ളിൽ നിർത്താനാണ് ഈ നടപടിയെന്ന് യു.എസ് അറിയിച്ചു.

വരുന്ന സെപ്റ്റംബർ 30-ഓടെ സാമ്പത്തിക വർഷം അവസാനിക്കുന്നതിന് മുൻപ് ഇന്ത്യക്കുള്ള വിസ വിഹിതം തീരുകയാണെങ്കിൽ, തീയതി ഇനിയും പിന്നോട്ട് പോകാനോ അല്ലെങ്കിൽ താൽക്കാലികമായി ഈ വിഭാഗം അപ്രാപ്യമാക്കാനോ സാധ്യതയുണ്ടെന്ന് യു.എസ് മുന്നറിയിപ്പ് നൽകിയിട്ടുണ്ട്.

ബഹുരാഷ്ട്ര കമ്പനികളിലെ ഉന്നത ഉദ്യോഗസ്ഥർ, മാനേജർമാർ, അസാധാരണ കഴിവുള്ള വ്യക്തികൾ, മികച്ച പ്രൊഫസർമാർ, ഗവേഷകർ എന്നിവർക്ക് യു.എസിൽ സ്ഥിരതാമസത്തിന് (ഗ്രീൻ കാർഡ്‌ ) വേണ്ടിയാണ് പ്രധാനമായും ഇബി-1 കാറ്റഗറി ഉപയോഗിക്കുന്നത്.

പുതിയ വിസ ബുള്ളറ്റിൻ പ്രകാരം ഇന്ത്യക്കാർക്കുള്ള ഇബി-2 , ഇബി-5 (അൺ റിസെർവേഡ്‌ ) വിഭാഗങ്ങൾ 2026 സാമ്പത്തിക വർഷത്തെ ബാക്കി മാസങ്ങളിൽ ലഭ്യമാകില്ല. ഇവയുടെ വാർഷിക പരിധി ഇതിനകം തന്നെ പൂർത്തിയായിക്കഴിഞ്ഞു.

ഈ പുതിയ മാറ്റം യു.എസിൽ സ്ഥിരതാമസം ആഗ്രഹിക്കുന്ന പതിനായിരക്കണക്കിന് ഇന്ത്യൻ പ്രൊഫഷണലുകളുടെ ഗ്രീൻ കാർഡ് കാത്തിരിപ്പ് കാലാവധി വീണ്ടും ദീർഘിപ്പിക്കും.