പശ്ചിമേഷ്യൻ യുദ്ധം അവസാനിപ്പിക്കുന്നതിനുള്ള യു.എസ് – ഇറാൻ സമാധാനക്കരാറിന്റെ കരട് രൂപത്തിൽ ഇരുരാജ്യങ്ങളും ഏകദേശ ധാരണയിലെത്തിയതായി റിപ്പോർട്ടുകൾ. പാകിസ്താന്റെ മധ്യസ്ഥതയിൽ തയ്യാറാക്കിയ കരാർ വരുംദിവസങ്ങളിൽ ജനീവയിൽ വെച്ച് ഒപ്പുവെച്ചേക്കും.
ഉപരോധം മാറ്റൽ: ഇറാനിയൻ തുറമുഖങ്ങൾക്ക് മേലുള്ള നാവിക ഉപരോധം പൂർണ്ണമായി നീക്കണമെന്നതാണ് കരാറിലെ പ്രധാന വ്യവസ്ഥയെന്ന് ഇറാൻ വിദേശകാര്യമന്ത്രി അബ്ബാസ് അരാഖ്ചി വ്യക്തമാക്കി.
ആണവപദ്ധതികൾ: ഇറാൻ തങ്ങളുടെ ആണവപദ്ധതികൾ നിർത്തിവെക്കുമെന്നും പകരമായി യു.എസ് ഉപരോധങ്ങളിൽ ഇളവ് വരുത്തുമെന്നും വൈറ്റ് ഹൗസ് വൃത്തങ്ങൾ സൂചിപ്പിച്ചു. എന്നാൽ കരാറിന്റെ അന്തിമ ഉള്ളടക്കത്തെക്കുറിച്ച് ഇരുപക്ഷത്തുനിന്നും വ്യത്യസ്തമായ പ്രസ്താവനകളും പുറത്തുവരുന്നുണ്ട്.
ഇസ്രായേൽ നിലപാട്: കരാർ യാഥാർത്ഥ്യമായാലും ഇറാന്റെ ആണവായുധ മോഹങ്ങളെ പൂർണ്ണമായി തടയുമെന്നും ലെബനൻ, സിറിയ, ഗാസ അതിർത്തികളിലെ സുരക്ഷാ മേഖലകളിൽ നിന്ന് തങ്ങളുടെ സൈന്യം പിന്മാറില്ലെന്നും ഇസ്രായേൽ വ്യക്തമാക്കിയിട്ടുണ്ട്.
ഒമാൻ തീരത്ത് ഇന്ത്യൻ നാവികർക്ക് നേരെയുണ്ടായ ആക്രമണത്തിൽ ട്രംപിന്റെ അപലപനം:
ഈ ആഴ്ച ഒമാൻ തീരത്ത് മൂന്ന് കപ്പലുകൾക്ക് നേരെയുണ്ടായ ഡ്രോൺ ആക്രമണത്തിൽ മൂന്ന് ഇന്ത്യൻ നാവികർ കൊല്ലപ്പെട്ട സംഭവത്തിൽ യു.എസ് പ്രസിഡന്റ് ഡൊണാൾഡ് ട്രംപ് കടുത്ത ആശങ്ക രേഖപ്പെടുത്തി. ആക്രമണത്തിന് പിന്നിൽ ഇറാനാണെന്ന് ആരോപിച്ച ട്രംപ്, ഇത്തരം നടപടികൾ പൂർണ്ണമായും അസ്വീകാര്യമാണെന്ന് വ്യക്തമാക്കി. എന്നാൽ ഈ ആരോപണങ്ങൾ ഇറാൻ നിഷേധിച്ചു.
ഇലോൺ മസ്ക് ലോകത്തെ ആദ്യ ‘ട്രില്യണയർ’ പദവിയിലേക്ക്
ഇലോൺ മസ്കിന്റെ ബഹിരാകാശ ഗവേഷണ കമ്പനിയായ സ്പേസെക്സ് വാൾസ്ട്രീറ്റിൽ ഐ.പി.ഒ (ഇനിഷ്യൽ പബ്ലിക് ഓഫിറിങ് ) വഴി ലിസ്റ്റ് ചെയ്തതിന് തൊട്ടുപിന്നാലെ കമ്പനിയുടെ ഓഹരി മൂല്യം 24% ഉയർന്നു. ഇതോടെ സ്പേസ് എക്സിന്റെ വിപണി മൂല്യം 2 ട്രില്യൺ ഡോളർ കടന്നു. ഈ വൻ മുന്നേറ്റത്തോടെ കമ്പനിയിലെ പ്രധാന ഓഹരി പങ്കാളിയായ ഇലോൺ മസ്ക് ലോകത്തിലെ ആദ്യത്തെ ട്രില്യണയർ (ലക്ഷം കോടിപതി) ആകാനുള്ള വഴിയിലാണ്.
ദക്ഷിണ കൊറിയൻ മുൻ പ്രസിഡന്റിന് തടവുശിക്ഷ: ഉത്തരകൊറിയൻ തലസ്ഥാനമായ പ്യോങ്യാങ്ങിലേക്ക് ഡ്രോണുകൾ അയക്കാൻ ഉത്തരവിട്ട് മേഖലയിൽ യുദ്ധപ്രതീതി സൃഷ്ടിക്കാൻ ശ്രമിച്ച കേസിൽ ദക്ഷിണ കൊറിയ മുൻ പ്രസിഡന്റ് യൂൻ സുക് യോളിന് കോടതി 30 വർഷത്തെ തടവുശിക്ഷ വിധിച്ചു.
ഫിഫ ലോകകപ്പ് 2026: യു.എസ്, കാനഡ, മെക്സിക്കോ എന്നീ രാജ്യങ്ങൾ സംയുക്തമായി ആതിഥേയത്വം വഹിക്കുന്ന ഫിഫ ലോകകപ്പിലെ ഗ്രൂപ്പ് ബി-യിലെ ആദ്യ മത്സരത്തിൽ കാനഡയും ബോസ്നിയ ഹെർസഗോവിനയും ഒരോ ഗോൾ വീതം അടിച്ച് സമനിലയിൽ (1-1) പിരിഞ്ഞു.
പരീക്ഷാ പരിഷ്കാരങ്ങളും വിദ്യാർത്ഥി പ്രതിഷേധങ്ങളും
നീറ്റ് യുജി പുനഃപരീക്ഷയും സുരക്ഷയും: നീറ്റ് യുജി പരീക്ഷാ ചോർച്ച വിവാദങ്ങൾക്ക് പിന്നാലെ പരീക്ഷാ നടത്തിപ്പിൽ വലിയ മാറ്റങ്ങളുമായി നാഷണൽ ടെസ്റ്റിംഗ് ഏജൻസി. പരീക്ഷാ സമയം 3.15 മണിക്കൂറാക്കി ഉയർത്തുകയും, റഫ് പേപ്പറുകളുടെ എണ്ണം നാലായി നിജപ്പെടുത്തുകയും ചെയ്തു. ക്രമക്കേടുകൾ തടയാൻ പുനഃപരീക്ഷയ്ക്ക് സി.ആർ.പി.എഫ്, സി.ഐ.എസ്.എഫ് എന്നീ കേന്ദ്രസേനകളുടെ ‘ഇസഡ് പ്ലസ്’ സുരക്ഷ ഉറപ്പാക്കും.
കേന്ദ്ര വിദ്യാഭ്യാസ മന്ത്രിക്കെതിരെ പ്രതിഷേധം: നീറ്റ് ചോദ്യപേപ്പർ ചോർച്ചയും സി.ബി.എസ്.ഇ ക്രമക്കേടുകളും മുൻനിർത്തി കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെക്കണമെന്നാവശ്യപ്പെട്ട് ഹിമാചൽ പ്രദേശിൽ എസ്.എഫ്.ഐ നടത്തിയ മാർച്ചിന് നേരെ പൊലീസ് അതിക്രമം.
സിയുഇടി പിജിയിലും ക്രമക്കേട്: നാഷണൽ ടെസ്റ്റിംഗ് ഏജൻസി നടത്തിയ ബിരുദാനന്തര ബിരുദ പ്രവേശന പൊതുപരീക്ഷയിലും (സി യു ഇ ടി പി ജി ) ഗുരുതര ക്രമക്കേടുകൾ നടന്നതായി റിപ്പോർട്ട്. ചില വിദ്യാർത്ഥികൾക്കായി മാത്രം ചോദ്യങ്ങൾ ലളിതമാക്കി രണ്ടാമതും പരീക്ഷ രഹസ്യമായി നടത്തിയെന്നാണ് ആക്ഷേപം.
അമേരിക്കൻ നയതന്ത്രജ്ഞനെ ഇന്ത്യ വിളിച്ചുവരുത്തി: ഹോർമുസ് കടലിടുക്കിന് സമീപം അമേരിക്കൻ സൈന്യം നടത്തിയ ആക്രമണത്തിൽ മൂന്ന് ഇന്ത്യൻ നാവികർ കൊല്ലപ്പെട്ടതിൽ രാജ്യം ശക്തമായ പ്രതിഷേധം രേഖപ്പെടുത്തി. ഡൽഹിയിലെ യു.എസ് എംബസി ഡെപ്യൂട്ടി ചീഫ് ജേസൺ മിക്സിനെ വിദേശകാര്യ മന്ത്രാലയം നേരിട്ട് വിളിച്ചുവരുത്തിയാണ് പ്രതിഷേധം അറിയിച്ചത്.
റഷ്യൻ എണ്ണ ഇറക്കുമതിയിൽ യു.എസ് നിലപാടിനെതിരെ ജയശങ്കർ. റഷ്യയിൽ നിന്ന് ഇന്ത്യ എണ്ണ വാങ്ങുന്നതിനെതിരെ പ്രസംഗിക്കുന്ന പാശ്ചാത്യ രാജ്യങ്ങളുടെ ഇരട്ടത്താപ്പിനെ വിദേശകാര്യമന്ത്രി എസ്. ജയശങ്കർ ശക്തമായി വിമർശിച്ചു. റഷ്യൻ എണ്ണ വാങ്ങാൻ ആദ്യം ആവശ്യപ്പെട്ടത് അമേരിക്ക തന്നെയാണെന്നും പിന്നീട് ഉപരോധം ഏർപ്പെടുത്തുകയായിരുന്നുവെന്നും അദ്ദേഹം തുറന്നടിച്ചു.
തൃണമൂൽ കോൺഗ്രസിൽ പിളർപ്പ് സൂചന: ലോക്സഭയിൽ തങ്ങൾക്ക് പ്രത്യേക ബ്ലോക്കായി ഇരിക്കാൻ അനുമതി നൽകണമെന്ന് ആവശ്യപ്പെട്ട് 19 എം.പിമാർ ഒപ്പിട്ട കത്ത് പുറത്തായതോടെ തൃണമൂൽ കോൺഗ്രസ് പാർലമെന്ററി പാർട്ടിയിൽ ഭിന്നത രൂക്ഷമായി.
അടിസ്ഥാന സൗകര്യ വികസനത്തിന് കേന്ദ്രാനുമതി: രാജ്യത്തെ റെയിൽവേ കണക്റ്റിവിറ്റിയും നഗര വികസനവും ലക്ഷ്യമിട്ട് 4,703 കോടി രൂപയുടെ വിവിധ അടിസ്ഥാന സൗകര്യ വികസന പദ്ധതികൾക്ക് കേന്ദ്ര സർക്കാർ അനുമതി നൽകി.
കാലാവസ്ഥാ മുന്നറിയിപ്പ്: രാജ്യത്ത് എൽനിനോ പ്രതിഭാസം ഔദ്യോഗികമായി ആരംഭിച്ചതായി കാലാവസ്ഥാ നിരീക്ഷണ കേന്ദ്രം. കേരളമുൾപ്പെടെയുള്ള സംസ്ഥാനങ്ങളിൽ വരും ദിവസങ്ങളിൽ ശക്തമായ മഴയ്ക്കും തീരപ്രദേശങ്ങളിൽ ‘കള്ളക്കടൽ’ പ്രതിഭാസം മൂലം ശക്തമായ കടലാക്രമണത്തിനും സാധ്യതയുള്ളതിനാൽ അതീവ ജാഗ്രതാ നിർദ്ദേശം നൽകിയിട്ടുണ്ട്.
നെടുമങ്ങാട് ശിശു മരണം: നെടുമങ്ങാട് ഒന്നരവയസ്സുകാരൻ കൊല്ലപ്പെട്ട സംഭവത്തിൽ ചൈൽഡ് പ്രൊട്ടക്ഷൻ യൂണിറ്റിന്റെ ഗുരുതര വീഴ്ച പുറത്തുവന്നു. കുഞ്ഞിനെ പീഡിപ്പിക്കുന്ന വിവരം ആഴ്ചകൾക്ക് മുമ്പ് അറിഞ്ഞിട്ടും അധികൃതർ അനങ്ങിയില്ലെന്ന് പരാതിയുണ്ട്. ഇതിൽ ഹെൽപ്പ് ലൈൻ ഓപ്പറേറ്ററെ പുറത്താക്കാൻ മന്ത്രി നിർദ്ദേശം നൽകി.
ഷിഗെല്ല ജാഗ്രത: മലപ്പുറത്ത് വയറിളക്കം ബാധിച്ച് മരിച്ച സ്ത്രീക്ക് ഷിഗെല്ല സ്ഥിരീകരിച്ചു. ഇന്നലെ മാത്രം സംസ്ഥാനത്ത് 18 പുതിയ കേസുകൾ റിപ്പോർട്ട് ചെയ്തിട്ടുണ്ട്.
ആരോഗ്യവകുപ്പ് ജാഗ്രതാ നിർദ്ദേശം പുറപ്പെടുവിച്ചു.
മാസപ്പടി കേസ്: മാസപ്പടി കേസിൽ ടി. വീണയ്ക്ക് എൻഫോഴ്സ്മെന്റ് ഡയറക്ടറേറ്റ് (ഇഡി) വീണ്ടും സമൻസ് അയച്ചു. ബുധനാഴ്ച ഹാജരാകാനാണ് നിർദ്ദേശം.
’തൊപ്പി ഗ്യാങ്’ അന്വേഷണം: നിഹാദിനും (തൊപ്പി) സംഘത്തിനുമെതിരെ അന്വേഷണത്തിന് ഡിജിപി ഉത്തരവിട്ടു. പോക്സോ, മയക്കുമരുന്ന് ഉപയോഗം, അശ്ലീല പ്രചരണം തുടങ്ങിയ ഗുരുതരമായ ആരോപണങ്ങളെത്തുടർന്നാണ് നടപടി.
സ്ത്രീകൾക്ക് കെ എ സ് ആർ ടി സി ഓർഡിനറി ബസ്സുകളിൽ ഏർപ്പെടുത്തിയ സൗജന്യ യാത്ര 15ന് ആരംഭിക്കും. ഇതുമായി ബന്ധപ്പെട്ട് ഏഴ് വിഭാഗം ഓർഡിനറി ബസ്സുകളുടെ ലിസ്റ്റ് അധികൃതർ പ്രസിദ്ധീകരിച്ചു.
പാലക്കാട്ടെ 23 കുട്ടികളുടെ അസ്വാഭാവിക മരണവുമായി ബന്ധപ്പെട്ട അന്വേഷണം സിബിഐക്ക് വിട്ട് ഹൈക്കോടതി ഉത്തരവിട്ടു.
നിപ പ്രതിരോധം: നിപ സാഹചര്യത്തിൽ മരുന്നുകളുടെ ക്ഷാമം ഇല്ലെന്നും, സർക്കാർ കാര്യങ്ങൾ നിരീക്ഷിക്കുന്നുണ്ടെന്നും മുഖ്യമന്ത്രി വ്യക്തമാക്കി.
കാലവർഷം കനക്കുന്നു: ജില്ലയിൽ ഓറഞ്ച് അലർട്ട്
കേരളത്തിൽ കാലവർഷം അതിശക്തമായതിനെ തുടർന്ന് കേന്ദ്ര കാലാവസ്ഥാ വകുപ്പ് ഇന്ന് കാസർകോട് ജില്ലയിൽ ഓറഞ്ച് അലർട്ട് പ്രഖ്യാപിച്ചു . ഒറ്റപ്പെട്ടയിടങ്ങളിൽ അതിശക്തമായ മഴയ്ക്കുള്ള സാധ്യതയുള്ളതിനാൽ മലയോര മേഖലകളിലും തീരദേശങ്ങളിലും ഉള്ളവർ ജാഗ്രത പാലിക്കാൻ നിർദ്ദേശമുണ്ട്.
നീലേശ്വരത്ത് എംബാങ്ക്മെന്റ് നിർമ്മാണത്തിനെതിരെ പ്രതിഷേധം.
നീലേശ്വരത്ത് റെയിൽവേ ലൈനിനോട് ചേർന്ന് മതിൽ കെട്ടി വേർതിരിക്കുന്ന എംബാങ്ക്മെന്റ് നിർമ്മാണത്തിനെതിരെ ജനകീയ പ്രതിഷേധം ശക്തമാകുന്നു. നാടിനെ രണ്ടായി വിഭജിക്കുന്ന ഈ നിർമ്മാണ രീതിക്കെതിരെ പ്രദേശവാസികൾ സമരവുമായി മുന്നോട്ട് പോവുകയാണ്.
തെരുവ് നായ ശല്യം: നാട്ടുകാർ ആശങ്കയിൽ
ജില്ലയിലെ വിവിധ ഭാഗങ്ങളിൽ തെരുവ് നായ ശല്യം രൂക്ഷമാകുന്നു. കഴിഞ്ഞ ദിവസം ഒൻപതോളം പേരെ കടിച്ച നായയെ ഇതുവരെ പിടികൂടാൻ സാധിക്കാത്തത് നാട്ടുകാരിൽ വലിയ ആശങ്കയ്ക്ക് കാരണമായിട്ടുണ്ട്.
യാത്രാ ജാഗ്രത: കനത്ത മഴ തുടരുന്നതിനാൽ കാസർകോട്ടെ മലയോര മേഖലകളിലേക്കുള്ള രാത്രി യാത്രകൾ പരമാവധി ഒഴിവാക്കുക. താഴ്ന്ന പ്രദേശങ്ങളിൽ വെള്ളപ്പൊക്ക സാധ്യതയുള്ളതിനാൽ പ്രാദേശിക ഭരണകൂടത്തിന്റെ നിർദ്ദേശങ്ങൾ കർശനമായി പാലിക്കുക.
