കൊടക്കാട് നാരായണൻ

ചൈന സഞ്ചാര ഡയറി – 10

ബീജിംഗിലെ ടെമ്പിൾ ഓഫ് ഹെവൻ – ആകാശത്തോട് സംവദിച്ച ചക്രവർത്തിമാരുടെ ദേവാലയത്തിലേക്ക് ഒരു യാത്ര

പ്രഭാതത്തിന്റെ മൃദുലമായ വെളിച്ചത്തിൽ ബിജിങ് നഗരത്തിന്റെ ഹൃദയഭാഗത്തുനിന്ന് ഞങ്ങളുടെ യാത്ര ആരംഭിച്ചു. ലക്ഷ്യം, ചൈനീസ് സംസ്കാരത്തിന്റെയും വാസ്തുവിദ്യയുടെയും ആത്മീയ പാരമ്പര്യത്തിന്റെയും അതുല്യ സാക്ഷ്യമായ ടെംപിൾ ഓഫ് ഹെവൻ .
ബീജിംഗ് നഗരത്തിന്റെ തെക്കുകിഴക്കൻ ഭാഗത്താണ് ഇത് സ്ഥിതി ചെയ്യുന്നത്. നഗരകേന്ദ്രമായ ടിയാ നൺമെൻ സ്‌ക്വയറി ൽ നിന്ന് ഏകദേശം 4–5 കിലോമീറ്റർ തെക്കു കിഴക്ക്.
മൊത്തം ഏകദേശം 2.7 ചതുരശ്ര കിലോമീറ്റർ വിസ്തൃതിയുള്ള വിശാലമായ പാർക്കിനുള്ളിലാണ് ക്ഷേത്രം. ചുറ്റും നൂറ്റാണ്ടുകൾ പഴക്കമുള്ള സൈപ്രസ് മരങ്ങൾ, ഉദ്യാനങ്ങൾ, നടപ്പാതകൾ എന്നിവയുണ്ട്. ഫോർബിഡൻ സിറ്റിയുടെ നാലിരട്ടിയോളം വിസ്തൃതിയുള്ള ഈ സമുച്ചയം ഒരുകാലത്ത് ചക്രവർത്തിമാർക്ക് മാത്രമായി സംവരണം ചെയ്തിരുന്ന വിശുദ്ധ സ്ഥലമായിരുന്നു.
നഗരത്തിന്റെ തിരക്കിൽ നിന്ന് അൽപാൽപമായി മാറി പച്ചപ്പാർന്ന വിശാലമായ പാർക്കിലേക്ക് കടന്നപ്പോൾ, അത് ഒരു വിനോദസഞ്ചാര കേന്ദ്രം മാത്രമല്ലെന്നും ഒരു കാലഘട്ടത്തിന്റെ ജീവൻ തുടിക്കുന്ന നിത്യ സ്മാരകമാണെന്നും മനസ്സിലായി. വൃക്ഷനിരകൾക്കിടയിലൂടെ നീങ്ങുമ്പോൾ നീലനിറത്തിലുള്ള മേൽക്കൂരയുമായി ആകാശത്തിലേക്ക് ഉയരുന്ന വൃത്താകൃതിയിലുള്ള കെട്ടിടം കണ്ണിൽപ്പെട്ടു. അതായിരുന്നു “ഹാൾ ഓഫ് പ്രയർ ഫോർ ഗുഡ് ഹാർവെസ്റ്റ്സ്” — ടെമ്പിൾ ഓഫ് ഹെവന്റെ ഏറ്റവും പ്രശസ്തമായ ഭാഗം.
ചരിത്രത്തിന്റെ വഴികളിലൂടെ-
ഈ ക്ഷേത്രസമുച്ചയം നിർമ്മിക്കാൻ ആരംഭിച്ചത് 1406-ലാണ്. യോം ഗിൾ എംപറർ എന്ന മിങ് രാജവംശ ചക്രവർത്തിയുടെ കാലത്താണ് ഇതിന്റെ നിർമ്മാണം. 1420-ൽ പൂർത്തിയായ ഈ സമുച്ചയം പിന്നീട് മിങ്, ചിങ് രാജവംശങ്ങളിലെ ചക്രവർത്തിമാർ മാത്രമാണ് ഉപയോഗിച്ചിരുന്നത്.ടെമ്പിൾ ഓഫ് ഹെവൻ സാധാരണ ജനങ്ങൾക്കുള്ള ആരാധനാലയമായിരുന്നില്ല.
മിങ്, ചിങ് രാജവംശങ്ങളിലെ ചക്രവർത്തിമാർ മാത്രമാണ് ഇവിടെ ഔദ്യോഗിക മതചടങ്ങുകൾ നടത്തിയിരുന്നത്. ചൈനീസ് വിശ്വാസപ്രകാരം ചക്രവർത്തി “സ്വർഗ്ഗപുത്രൻ”
(സൺ ഓഫ് ഹെവൻ ) ആയിരുന്നു. ജനങ്ങൾക്കും സ്വർഗ്ഗത്തിനുമിടയിലെ ഇടനിലക്കാരനായി അദ്ദേഹത്തെ കണക്കാക്കിയിരുന്നു.
അതുകൊണ്ട് സാധാരണ ജനങ്ങൾക്ക് ക്ഷേത്രത്തിനുള്ളിൽ പ്രവേശനം പോലും അനുവദിച്ചിരുന്നില്ല.
നല്ല വിളവിനായുള്ള പ്രാർഥന
ഹാൾ ഓഫ് പ്രയർ ഫോർ ഗുഡ് ഹാർവെസ്റ്സിൽ വർഷാരംഭത്തിൽ ചക്രവർത്തി എത്തി രാജ്യത്തിന് സമൃദ്ധമായ വിളവ് ലഭിക്കണമെന്നു പ്രാർഥിക്കുമായിരുന്നു.
അക്കാലത്ത് കൃഷിയായിരുന്നു രാജ്യത്തിന്റെ സാമ്പത്തിക അടിത്തറ. അതിനാൽ നല്ല മഴയും സമൃദ്ധമായ വിളവും രാജ്യത്തിന്റെ നിലനിൽപ്പിന് അനിവാര്യമായിരുന്നു.
ശീതകാല അയ്യന ദിന ചടങ്ങ്:
സർക്കുലർ മൌണ്ട് അൾട്ടറിൽ വർഷത്തിലെ ഏറ്റവും പ്രധാനപ്പെട്ട ചടങ്ങ് നടന്നിരുന്നത് ശീതകാല അയ്യനദിനത്തിലാണ് (വിന്റർ സോൾസ്റ്റിസ് ).
ഈ ദിവസം ചക്രവർത്തി
സ്വർഗ്ഗദേവനു ബലി അർപ്പിക്കും.
രാജ്യത്തിന്റെ ക്ഷേമത്തിനായി പ്രാർഥിക്കും.
പ്രകൃതിയുടെ അനുഗ്രഹം തേടും.
രാജ്യത്ത് സമാധാനവും സമൃദ്ധിയും നിലനിൽക്കാൻ അപേക്ഷിക്കും.

മഴയ്ക്കായുള്ള പ്രാർഥന :
വരൾച്ചയുണ്ടായപ്പോൾ പ്രത്യേക പ്രാർഥനകളും യാഗങ്ങളും സംഘടിപ്പിച്ചിരുന്നു. മഴ ലഭിക്കാത്തത് ചക്രവർത്തിയുടെ ധാർമിക പരാജയമായി പോലും കണക്കാക്കിയിരുന്ന ഒരു കാലമായിരുന്നു അത്.
ചക്രവർത്തി ചടങ്ങുകൾക്ക് മുമ്പ് ദിവസങ്ങളോളം ഉപവസിക്കും
മാംസാഹാരം ഒഴിവാക്കും.
ധ്യാനത്തിലും ആത്മശുദ്ധിയിലും ഏർപ്പെടും.
ശേഷം പ്രത്യേക വസ്ത്രം ധരിച്ച് ആഡംബര ഘോഷയാത്രയായി ഫോർബിഡൻ സിറ്റിയിൽ നിന്ന് ടെമ്പിൾ ഓഫ് ഹെവനിലേക്ക് എഴുന്നള്ളും.
ആയിരക്കണക്കിന് ഉദ്യോഗസ്ഥരും പുരോഹിതന്മാരും സംഗീതജ്ഞരും ചടങ്ങുകളിൽ പങ്കെടുത്തിരുന്നു.
1911-ൽ രാജവാഴ്ച അവസാനിച്ചതോടെ ചക്രവർത്തിമാരുടെ ആരാധനാചടങ്ങുകളും അവസാനിച്ചു. ഇന്ന് ഇത് ഒരു ചരിത്രസ്മാരകമാണ്.
ലോക പൈതൃക കേന്ദ്രമാണ്.
വിനോദസഞ്ചാരകേന്ദ്രമാണ്.
പ്രാദേശിക ജനങ്ങളുടെ വിശ്രമ-വ്യായാമ പാർക്കാണ്.
രാവിലെ ഇവിടെ എത്തിയാൽ തായ്-ചി പരിശീലിക്കുന്നവരെയും സംഗീതാഭ്യാസം നടത്തുന്നവരെയും പരമ്പരാഗത നൃത്തങ്ങൾ അവതരിപ്പിക്കുന്നവരെയും കാണാം. എന്നാൽ പഴയ രാജകീയ മതചടങ്ങുകൾ ഇന്ന് നടക്കുന്നില്ല.
ചൈനീസ് തത്ത്വചിന്തയിൽ “സ്വർഗ്ഗം വൃത്താകൃതിയിലും ഭൂമി ചതുരാകൃതിയിലും ആണ്” എന്ന ആശയമുണ്ട്. അതുകൊണ്ടാണ് ടെമ്പിൾ ഓഫ് ഹെവനിലെ പ്രധാന ആരാധനാവേദികൾ വൃത്താകൃതിയിലും പരിസരഭിത്തികൾ ചതുരാകൃതിയിലും നിർമ്മിച്ചിരിക്കുന്നത്. ആകാശവും ഭൂമിയും തമ്മിലുള്ള ഐക്യത്തിന്റെ വാസ്തുവിദ്യാ പ്രതീകമാണിത്.
ടെമ്പിൾ ഓഫ് ഹെവൻ അതിനാൽ ഒരു ക്ഷേത്രം മാത്രമല്ല; പ്രകൃതിയും ഭരണവും ആത്മീയതയും തമ്മിലുള്ള ബന്ധത്തെ പ്രതിഫലിപ്പിക്കുന്ന പുരാതന ചൈനയുടെ ഏറ്റവും മഹത്തായ സാംസ്കാരിക വേദിയാണ്.
ഗണിതവും ജ്യോതിശാസ്ത്രവും തത്ത്വചിന്തയും ചേർന്ന ഒരു വാസ്തുവിദ്യാ വിസ്മയം തന്നെയാണ്.
ഹാൾ ഓഫ് പ്രയർ ഫോർ ഗുഡ് ഹാർവെസ്റ്റ്സ് :

ഏകദേശം 38 മീറ്റർ ഉയരത്തിൽ
പൂർണമായും മരത്തിൽ നിർമ്മിച്ചതാണ്.
ഒരു ഇരുമ്പ് ആണിയോ സിമന്റോ ഉപയോഗിക്കാതെ നിർമ്മിച്ച സവിശേഷ ഘടന.
മൂന്ന് നിലകളുള്ള നീല മേൽക്കൂര സ്വർഗ്ഗത്തെ പ്രതിനിധീകരിക്കുന്നു.
കെട്ടിടത്തിനുള്ളിലെ 28 വലിയ തൂണുകൾ കാലചക്രത്തെയും നക്ഷത്രരാശികളെയും പ്രതിനിധീകരിക്കുന്നതായി കരുതപ്പെടുന്നു.
ഇംപീരിയൽ വോൾട്ട് ഓഫ് ഹെവൻ :

ഇവിടെയുള്ള “എക്കോ വാൾ” ലോകപ്രശസ്തമാണ്. മതിലിന്റെ ഒരറ്റത്ത് നിന്ന് പതുക്കെ പറഞ്ഞ വാക്കുകൾ മറുവശത്ത് വ്യക്തമായി കേൾക്കാൻ കഴിയുന്ന ശബ്ദശാസ്ത്ര അത്ഭുതം.

സർക്യുലർ മൗണ്ട് ആൾട്ടർ :

മൂന്ന് നിലകളുള്ള വെളുത്ത മാർബിൾ വേദി. ഇവിടെ നിന്നാണ് ചക്രവർത്തി സ്വർഗ്ഗദേവനോട് പ്രാർത്ഥിച്ചിരുന്നത്. കേന്ദ്രക്കല്ലിൽ നിന്ന് സംസാരിക്കുമ്പോൾ സ്വന്തം ശബ്ദം കൂടുതൽ ശക്തമായി കേൾക്കുന്ന പ്രത്യേക ശബ്ദപ്രതിഭാസവും ഇവിടെയുണ്ട്.
ചൈനീസ് തത്ത്വചിന്തയുടെ പ്രതീകം :
ടെമ്പിൾ ഓഫ് ഹെവന്റെ രൂപകൽപ്പനയിൽ ഒരു ഗഹനമായ സന്ദേശമുണ്ട്:
വൃത്തം സ്വർഗ്ഗത്തിന്റെ പ്രതീകമാണ്
ചതുരം ഭൂമിയുടെ പ്രതീകവും.
അതിനാൽ സമുച്ചയത്തിലെ പല കെട്ടിടങ്ങളും വൃത്താകൃതിയിലും പുറംഭിത്തികളും പരിസരഘടനകളും ചതുരാകൃതിയിലുമാണ്. സ്വർഗ്ഗവും ഭൂമിയും തമ്മിലുള്ള ഐക്യം എന്ന ചൈനീസ് തത്ത്വചിന്തയുടെ പ്രതിഫലനമാണിത്.
1998-ൽ യുനസ്കോ ടെമ്പിൾ ഓഫ് ഹെവനെ
യുനസ്കോ വേൾഡ് ഹെറിറ്റേജ് ലിസ്റ്റിൽ ഉൾപ്പെടുത്തി.
ലോകത്തിലെ ഏറ്റവും മികച്ച മത-ആചാര വാസ്തുവിദ്യാ സമുച്ചയങ്ങളിലൊന്ന്.
മിങ്-ചിങ് രാജവംശങ്ങളുടെ രാഷ്ട്രീയ-ആത്മീയ ബന്ധത്തിന്റെ അപൂർവ സാക്ഷ്യം.
ചൈനീസ് പ്രപഞ്ചസങ്കൽപ്പങ്ങളുടെയും തത്ത്വചിന്തയുടെയും വാസ്തുവിദ്യാ അവതരണം.
ശബ്ദശാസ്ത്രം, ജ്യാമിതി, എഞ്ചിനീയറിങ് എന്നിവയുടെ അസാധാരണ സമന്വയം.
600 വർഷത്തിലേറെയായി സംരക്ഷിക്കപ്പെട്ടിരിക്കുന്ന ചരിത്രപൈതൃകം.
ഇന്നത്തെ വിനോദസഞ്ചാര പ്രാധാന്യം- ഇതൊക്കെയാണ്
യുനസ്കോ പരിഗണിച്ച ഘടകങ്ങൾ.
ഇന്ന് ടെമ്പിൾ ഓഫ് ഹെവൻ ബീജിംഗിലെ ഏറ്റവും കൂടുതൽ സന്ദർശകരെത്തുന്ന കേന്ദ്രങ്ങളിലൊന്നാണ്.
പ്രതിവർഷം ലക്ഷക്കണക്കിന് വിനോദസഞ്ചാരികൾ എത്തുന്നു.
പ്രഭാതസമയങ്ങളിൽ നാട്ടുകാർ തായ്-ചി പരിശീലിക്കുകയും സംഗീതാഭ്യാസം നടത്തുകയും നൃത്തം ചെയ്യുകയും ചെയ്യുന്നു.
ചരിത്രവും ആത്മീയതയും പ്രകൃതിയും ഒരുമിക്കുന്ന അപൂർവ അനുഭവം ഇവിടെ ലഭിക്കുന്നു.
സന്ധ്യയുടെ സ്വർണപ്രകാശം നീല മേൽക്കൂരകളിൽ പതിയുമ്പോൾ ക്ഷേത്രസമുച്ചയം കൂടുതൽ മനോഹരമാകും. നൂറ്റാണ്ടുകൾക്ക് മുമ്പ് ചക്രവർത്തിമാർ ആകാശത്തോട് പ്രാർത്ഥിച്ചിരുന്ന അതേ സ്ഥലത്ത് നിൽക്കുമ്പോൾ ചരിത്രം ഇന്നും ജീവനോടെ ശ്വസിക്കുന്നുവെന്ന് തോന്നും.
ടെമ്പിൾ ഓഫ് ഹെവൻ ഒരു കെട്ടിടസമുച്ചയം മാത്രമല്ല; മനുഷ്യനും പ്രകൃതിയും പ്രപഞ്ചവും തമ്മിലുള്ള ബന്ധത്തെക്കുറിച്ചുള്ള ഒരു മഹത്തായ ദാർശനിക കവിതയാണ്. ബീജിംഗിന്റെ തിരക്കേറിയ നഗരജീവിതത്തിനിടയിൽ ആകാശത്തിന്റെ നിശ്ശബ്ദത കേൾക്കാൻ കഴിയുന്ന അപൂർവ ഇടം. ഇവിടെ എത്തുന്ന ഓരോ യാത്രികനും ചരിത്രത്തിന്റെ പാതയിലൂടെ നടക്കുന്നതിനൊപ്പം സ്വർഗ്ഗത്തോട് സംവദിച്ച ഒരു സംസ്കാരത്തിന്റെ ആത്മാവിനെയും സ്പർശിച്ചറിയാൻ കഴിയും.
തുടരും…..
നാളെ:ഷാങ്ജിജിലെ നാഷണൽ ഫോറെസ്റ്റ് പാർക്ക്‌