ഇസ്രയേൽ–ലബനൻ വെടിനിർത്തൽ നീട്ടി: യുഎസിന്റെ മധ്യസ്ഥതയിൽ നടന്ന ചർച്ചകൾക്കൊടുവിൽ ഇസ്രായേലും ലബനനും തമ്മിലുള്ള വെടിനിർത്തൽ 45 ദിവസത്തേക്ക് കൂടി നീട്ടി. സ്ഥിരമായ സമാധാന ചർച്ചകൾക്കായി മെയ് 29-ന് പെന്റഗണിൽ ഇരുരാജ്യങ്ങളുടെയും സൈനിക പ്രതിനിധികൾ വീണ്ടും കൂടിക്കാഴ്ച നടത്തും.
ട്രംപ്-ഷി ജിൻപിങ് കൂടിക്കാഴ്ച: അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ചൈന സന്ദർശനം പൂർത്തിയായി. ചൈനയുമായുള്ള ബന്ധം മികച്ച രീതിയിൽ മുന്നോട്ട് പോകുമെന്ന് ട്രംപ് വ്യക്തമാക്കിയപ്പോൾ, തായ്വാൻ വിഷയത്തിൽ വിട്ടുവീഴ്ചയില്ലെന്ന് ചൈനീസ് പ്രസിഡന്റ് ഷി ജിൻപിങ് ആവർത്തിച്ചു. സെപ്റ്റംബർ 24-ന് ഷി ജിൻപിങ് വൈറ്റ് ഹൗസ് സന്ദർശിക്കും. ഇതിന് മുന്നോടിയായി 10 വർഷത്തിന് ശേഷം ബോയിങ് വിമാനങ്ങൾ വാങ്ങാനുള്ള വലിയൊരു ഓർഡറും ചൈന നൽകിയേക്കുമെന്നാണ് റിപ്പോർട്ടുകൾ.
ബ്രിക്സ് ഉച്ചകോടിയിൽ വാഗ്വാദം: ഇന്ത്യയുടെ അധ്യക്ഷതയിൽ ന്യൂഡൽഹിയിൽ നടക്കുന്ന ബ്രിക്സ് വിദേശകാര്യ മന്ത്രിമാരുടെ യോഗത്തിൽ ഇറാനും യുഎഇയും തമ്മിൽ കടുത്ത വാഗ്വാദമുണ്ടായി.
ഹോർമുസ് കടലിടുക്കിലെ എണ്ണക്കടത്തുമായി ബന്ധപ്പെട്ട് ഇരുരാജ്യങ്ങളും തമ്മിലുള്ള അസ്വാരസ്യങ്ങളാണ് ഇതിന് കാരണം.
പ്രധാനമന്ത്രി മോദിയുടെ യുഎഇ സന്ദർശനം: അഞ്ച് രാഷ്ട്ര പര്യടനത്തിന്റെ ഭാഗമായി യുഎഇയിലെത്തിയ ഇന്ത്യൻ പ്രധാനമന്ത്രി നരേന്ദ്ര മോദിക്ക് വൻ സ്വീകരണം. യുഎഇ എഫ്-16 യുദ്ധവിമാനങ്ങളുടെ അകമ്പടിയോടെയാണ് മോദിയുടെ വിമാനത്തെ സ്വീകരിച്ചത്. യുഎഇക്ക് നേരെയുണ്ടായ ഡ്രോൺ ആക്രമണശ്രമങ്ങളെ അപലപിച്ച പ്രധാനമന്ത്രി, ഇരുരാജ്യങ്ങളും തമ്മിലുള്ള തന്ത്രപ്രധാനമായ നിരവധി ധാരണാപത്രങ്ങളിൽ ഒപ്പുവെച്ചു.
ബദൽ എണ്ണ പൈപ്പ് ലൈൻ: ഹോർമുസ് കടലിടുക്കിലെ തർക്കങ്ങൾ മറികടക്കാൻ ബദൽ എണ്ണ പൈപ്പ് ലൈൻ നിർമ്മാണ നടപടികൾ യുഎഇ വേഗത്തിലാക്കി
പാകിസ്ഥാന്റെ മിസൈൽ പരീക്ഷണം: 750 കിലോമീറ്റർ ദൂരപരിധിയുള്ള, റഡാറുകളെ വെട്ടിച്ച് പറക്കാൻ കഴിയുന്ന ‘ഫതഹ്-4’ മിസൈൽ പരീക്ഷണം വിജയിച്ചതായി പാകിസ്ഥാൻ അറിയിച്ചു.
ജപ്പാനിൽ ഭൂചലനം: ജപ്പാനിൽ റിച്ചർ സ്കെയിലിൽ 6.7 തീവ്രത രേഖപ്പെടുത്തിയ ശക്തമായ ഭൂചലനം അനുഭവപ്പെട്ടു. മിയാഗി, ഇവാട്ടെ മേഖലകളിലാണ് ഭൂചലനമുണ്ടായത്. എന്നാൽ സുനാമി ഭീഷണിയില്ലെന്ന് അധികൃതർ വ്യക്തമാക്കി.
അമേരിക്കയും ഇറാനും തമ്മിലുള്ള
യുദ്ധം അവസാനിപ്പിക്കുന്നതിനായി ഇരു രാജ്യങ്ങളും മുന്നോട്ട് വെച്ച നിർദ്ദേശങ്ങളിൽ ധാരണയാകാത്തതിനെത്തുടർന്ന് ചർച്ചകൾ പ്രതിസന്ധിയിലാണ്.
ഇറാന്റെ മറുപടി പൂർണ്ണമായി അംഗീകരിക്കാനാവില്ലെന്ന് വ്യക്തമാക്കിയ അമേരിക്കൻ പ്രസിഡന്റ് ഡൊണാൾഡ് ട്രംപ്, നയതന്ത്ര നീക്കങ്ങൾ പരാജയപ്പെട്ടാൽ ഇറാന്റെ ബാക്കിയുള്ള സൈനിക ലക്ഷ്യസ്ഥാനങ്ങൾ കൂടി തകർക്കാൻ മടിക്കില്ലെന്ന് മുന്നറിയിപ്പ് നൽകിയിട്ടുണ്ട്.
നയതന്ത്രം മാത്രമാണ് ഏക പോംവഴിയെന്ന് ഇറാൻ.
ആക്രമണങ്ങളിലൂടെ ഒന്നും നേടാനാവില്ലെന്ന് അമേരിക്ക ഇപ്പോൾ തിരിച്ചറിയുന്നുണ്ടെന്ന് ഇറാന്റെ വിദേശകാര്യ മന്ത്രി അബ്ബാസ് അരാഗ്ചി വ്യക്തമാക്കി. ന്യൂഡൽഹിയിൽ ബ്രിക്സ് വിദേശകാര്യ മന്ത്രിമാരുടെ യോഗത്തിന് ശേഷം സംസാരിക്കവെയാണ്, പശ്ചിമേഷ്യയിലെ നിലവിലെ സംഘർഷങ്ങൾക്ക് സൈനികമായ ഒരു പരിഹാരമില്ലെന്നും നയതന്ത്ര ചർച്ചകൾ മാത്രമാണ് പോംവഴിയെന്നും അദ്ദേഹം ഓർമ്മിപ്പിച്ചത്.
ലോകത്തെ ഏറ്റവും പ്രധാനപ്പെട്ട എണ്ണക്കപ്പൽ പാതയായ ഹോർമുസ് കടലിടുക്കിനെ ചൊല്ലിയുള്ള തർക്കം രൂക്ഷമായി തുടരുന്നു.
തങ്ങളുമായി സഹകരിക്കുന്ന സൗഹൃദ രാജ്യങ്ങളിലെ കപ്പലുകൾക്ക് ഈ ജലപാതയിലൂടെ സുരക്ഷിതമായി യാത്ര ചെയ്യാമെന്നും എന്നാൽ ശത്രുരാജ്യങ്ങൾക്ക് നിയന്ത്രണമുണ്ടാകുമെന്നും ഇറാൻ വ്യക്തമാക്കിയിട്ടുണ്ട്.
അമേരിക്ക ഏർപ്പെടുത്തിയ കപ്പൽ ഉപരോധം ലംഘിക്കാൻ ശ്രമിച്ച 67 വാണിജ്യ കപ്പലുകൾ തിരിച്ചുവിടുകയും നാലെണ്ണം പ്രവർത്തനരഹിതമാക്കുകയും ചെയ്തതായി യുഎസ് സെൻട്രൽ കമാൻഡ് അറിയിച്ചു.
നീറ്റ് ചോദ്യച്ചോർച്ച:
ദേശീയ മെഡിക്കൽ പ്രവേശന പരീക്ഷയുടെ ചോദ്യക്കടലാസ് ചോർച്ചയുമായി ബന്ധപ്പെട്ട കേസിൽ മുഖ്യസൂത്രധാരനെന്ന് സംശയിക്കുന്ന കെമിസ്ട്രി അധ്യാപകൻ പി. വി. കുൽക്കർണിയെ സിബിഐ പുണെയിൽ നിന്ന് അറസ്റ്റ് ചെയ്തു. നാഷനൽ ടെസ്റ്റിങ് ഏജൻസിക്ക് വേണ്ടി പരീക്ഷാ നടത്തിപ്പിൽ പങ്കാളിയായിരുന്ന വ്യക്തിയാണ് ഇയാൾ. ഒപ്പം, ഒഎംആർ പരീക്ഷകളിലെ ക്രമക്കേടുകൾ ഒഴിവാക്കാൻ അടുത്ത വർഷം മുതൽ നീറ്റ് പരീക്ഷ പൂർണ്ണമായും ഓൺലൈനായി (കമ്പ്യൂട്ടർ അധിഷ്ഠിതം) നടത്താൻ കേന്ദ്ര സർക്കാർ ആലോചിക്കുന്നതായി റിപ്പോർട്ടുകളുണ്ട്.
ഉത്തർപ്രദേശിൽ കനത്ത മഴക്കെടുതിയിൽ മരിച്ചവരുടെ എണ്ണം 117 ആയി ഉയർന്നു. പ്രയാഗ്രാജിലാണ് ഏറ്റവും കൂടുതൽ മരണം റിപ്പോർട്ട് ചെയ്തത്. റോഡുകൾ തകരുകയും മരങ്ങൾ കടപുഴകുകയും ചെയ്ത സാഹചര്യത്തിൽ അടിയന്തര ദുരിതാശ്വാസം എത്തിക്കാൻ മുഖ്യമന്ത്രി യോഗി ആദിത്യനാഥ് നിർദ്ദേശം നൽകി.
കരാർ നഴ്സുമാരെ സ്ഥിരപ്പെടുത്താൻ സുപ്രീം കോടതി ഉത്തരവ്
ഡൽഹി സർക്കാർ ആശുപത്രികളിൽ 2013 വരെ കരാർ അടിസ്ഥാനത്തിൽ നിയമനം ലഭിച്ച രണ്ടായിരത്തിലേറെ നഴ്സുമാർക്ക് സ്ഥിരനിയമനം നൽകണമെന്ന ഡൽഹി ഹൈക്കോടതി ഉത്തരവ് സുപ്രീം കോടതി ശരിവെച്ചു. മലയാളികൾ ഉൾപ്പെടെയുള്ള നിരവധി നഴ്സുമാർക്ക് വലിയ ആശ്വാസമേകുന്നതാണ് സീനിയോറിറ്റിയും മറ്റ് ആനുകൂല്യങ്ങളും ഉറപ്പാക്കുന്ന ഈ വിധി.
അഞ്ച് രാഷ്ട്ര പര്യടനത്തിന്റെ ഭാഗമായി യുഎഇയിലെത്തിയ പ്രധാനമന്ത്രി നരേന്ദ്ര മോദിക്ക് അബുദാബിയിൽ വൻ സ്വീകരണം. പ്രതിരോധം, പാചകവാതക വിതരണം, തന്ത്രപ്രധാന എണ്ണശേഖരം തുടങ്ങിയ മേഖലകളിൽ ഇരുരാജ്യങ്ങളും തമ്മിൽ സുപ്രധാന ധാരണാപത്രങ്ങൾ കൈമാറി. ഹോർമുസ് കടലിടുക്കിലെ പ്രതിസന്ധികൾ മറികടക്കാൻ ബദൽ എണ്ണ പൈപ്പ് ലൈൻ നിർമ്മിക്കുന്നതിനുള്ള നടപടികൾ വേഗത്തിലാക്കും.
കർണാടകയിൽ ട്രാക്ടർ മറിഞ്ഞ് ഒരു കുടുംബത്തിലെ 6 പേർ മരിച്ചു.
തമിഴ്നാട്ടിൽ ഇന്ധനവില വർദ്ധനവിനെതിരെ മുഖ്യമന്ത്രി വിജയ് കേന്ദ്രത്തിനെതിരെ രംഗത്തെത്തി.
സിപിഎമ്മിൽ പിണറായി വിജയനെതിരെ രൂക്ഷവിമർശനം: പത്തനംതിട്ട സിപിഎം ജില്ലാ സെക്രട്ടേറിയറ്റ് യോഗത്തിൽ മുഖ്യമന്ത്രി പിണറായി വിജയനും എം.വി. ഗോവിന്ദനുമെതിരെ കടുത്ത വിമർശനം ഉയർന്നു. തെരഞ്ഞെടുപ്പ് തോൽവിയുടെ ഉത്തരവാദിത്തം മുഖ്യമന്ത്രി ഏറ്റെടുത്തില്ലെന്നും, അദ്ദേഹത്തെ പ്രതിപക്ഷ നേതാവാക്കിയ തീരുമാനം റദ്ദാക്കണമെന്നും ചില നേതാക്കൾ ആവശ്യപ്പെട്ടു.
വി.ഡി. സതീശൻ മുഖ്യമന്ത്രിയെ കണ്ടു: നിയുക്ത മുഖ്യമന്ത്രി വി.ഡി. സതീശൻ പിണറായി വിജയനെ വസതിയിലെത്തി സത്യപ്രതിജ്ഞാ ചടങ്ങിലേക്ക് ക്ഷണിച്ചു. തമിഴ്നാട് മുഖ്യമന്ത്രി വിജയ് ഉൾപ്പെടെയുള്ള അയൽസംസ്ഥാനങ്ങളിലെ മുഖ്യമന്ത്രിമാരെയും ഔദ്യോഗികമായി ക്ഷണിച്ചിട്ടുണ്ട്.
പേരാമ്പ്രയിൽ കാറിന് തീപിടിച്ച് ഗർഭിണി മരിച്ചു: കോഴിക്കോട് പേരാമ്പ്ര ചെറുവണ്ണൂരിൽ ഓടിക്കൊണ്ടിരുന്ന കാറിന് തീപിടിച്ച് ഗർഭിണിയായ യുവതി വെന്തുമരിച്ചു. ഭർത്താവിന് ഗുരുതരമായി പൊള്ളലേറ്റു.
ഈ വർഷത്തെ എസ്എസ്എൽസി വിജയശതമാനം 99.07 % ആണ്. 30,514 വിദ്യാർത്ഥികൾ എല്ലാ വിഷയങ്ങളിലും എ പ്ലസ് നേടി.
നീറ്റ് പരീക്ഷ ഓൺലൈനാക്കുന്നു: അടുത്ത വർഷം മുതൽ നീറ്റ് പരീക്ഷകൾ ഓൺലൈനായി നടത്തുമെന്ന് കേന്ദ്ര സർക്കാർ അറിയിച്ചു.
മെയ് 26 വോടെ കേരളത്തിൽ ഇടവപ്പാതി എത്താൻ സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു.
ബൈക്ക് മോഷണം: പ്രതി അറസ്റ്റിൽ
ഉപ്പളയിൽ അപകടത്തിൽപ്പെട്ട ബൈക്ക് മോഷ്ടിച്ച കേസിൽ മഞ്ചേശ്വരം സ്വദേശി മുഹമ്മദ് മുന്നയെ പൊലീസ് അറസ്റ്റ് ചെയ്തു. സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് പ്രതി പിടിയിലായത്.
