തിരുവനന്തപുരം: വഞ്ചിയൂരില് കൊല്ലപ്പെട്ട വിഷ്ണുവിന്റെ സഹോദരനും സിപിഎം ബ്രാഞ്ചംഗവുമായ വി.വി വിനോദും സുഹൃത്തുക്കളും കോണ്ഗ്രസില് ചേര്ന്നു. വിനോദിനെയും ഒപ്പമുള്ളവരെയും പ്രതിപക്ഷ നേതാവ് വിഡി സതീശന് ഷാള് അണിയിച്ച് സ്വീകരിച്ചു. രക്തസാക്ഷി ഫണ്ട് സിപിഎം അടിച്ചുമാറ്റുന്നുവെന്ന് പ്രതിപക്ഷ നേതാവ് വി.ഡി സതീശന് ആരോപിച്ചു.
വിഷ്ണുവിന്റെ രക്തസാക്ഷി ഫണ്ട് തട്ടിയെടുത്തെന്ന് വിനോദ് ആരോപിച്ചിരുന്നു. ഫണ്ട് തിരിമറിയില് പാര്ട്ടി നടപടിയെടുത്തയാളെ സിഐടിയു ജില്ലാ സെക്രട്ടറിയായി സ്ഥാനക്കയറ്റം നല്കിയതില് പ്രതിഷേധിച്ചാണ് വിനോദ് സിപിഎം വിട്ടത്. കോണ്ഗ്രസാണ് കേരളത്തിലെ യഥാര്ഥ ലെഫ്റ്റിസ്റ്റ് എന്നും ഇപ്പോഴെങ്കിലും തുറന്നുപറച്ചില് നടത്തിയില്ലാ എങ്കില് ഒപ്പം പ്രവര്ത്തിക്കുന്ന നിരവധി പാര്ട്ടി സഖാക്കള്ക്ക് ദോഷമാകും എന്നും വിനോദ് മാധ്യമങ്ങളോട് പറഞ്ഞു. രക്തസാക്ഷി കുടുംബത്തോട് പാര്ട്ടി നീതി കാണിച്ചില്ലെന്നും വിനോദ് ആരോപിച്ചു.
വിനോദിന്റെ വാക്കുകള്:
ഏഴാം വയസില് ബാലസംഘത്തില് പ്രവര്ത്തിച്ച് തുടങ്ങിയതാണ്. ഇപ്പോള് 50 വര്ഷമായി. ദുരനുഭവങ്ങള് നിരവധി ഉണ്ടായിട്ടുണ്ടെങ്കിലും കുഞ്ഞികൃഷ്ണന് സഖാവിന്റെ വെളിപ്പെടുത്തല് വന്നപ്പോഴാണ് തുറന്നുപറയാന് തീരുമാനിച്ചത്. പാര്ട്ടിയുടെ നിലപാടുമായി ഒത്തുപോകാന് കഴിയാത്ത സാഹചര്യമാണ് നിലനില്ക്കുന്നത്. ഇപ്പോഴെങ്കിലും തുറന്നുപറച്ചില് നടത്തിയില്ലായെങ്കില് ഒപ്പം പ്രവര്ത്തിക്കുന്ന നിരവധി പാര്ട്ടി സഖാക്കള്ക്ക് ദോഷമാകും എന്ന് അറിഞ്ഞ് കൊണ്ടാണ് വെളിപ്പെടുത്തല് നടത്തിയത്.
സോഷ്യലിസവും എല്ലാവരെയും ഒരുപോലെ കൊണ്ടുപോകുന്ന പാര്ട്ടി എന്ന നിലയിലും കോണ്ഗ്രസാണ് കേരളത്തിലെ ലെഫ്റ്റിസ്റ്റ്. കോണ്ഗ്രസ് പാര്ട്ടിയില് ആവേശപൂര്വ്വമാണ് വന്നത്. ഇത് ഒരു തുടക്കമാണ്. കേരള റാലി കഴിഞ്ഞാല് കൂടുതല് ആളുകള് കോണ്ഗ്രസില് ചേരും. വഞ്ചിയൂരില് രാഷ്ട്രീയ വിശദീകരണ യോഗം സംഘടിപ്പിക്കും’- വിനോദ് പറഞ്ഞു.
സിപിഎമ്മിന്റെ വഞ്ചിയൂര് ബ്രാഞ്ച് അംഗമായിരുന്ന വിഷ്ണു തിരുവനന്തപുരം കൈതമുക്കില് 2008 ഏപ്രില് ഒന്നിനാണ് കൊല്ലപ്പെട്ടത്. ആര്എസ്എസ് പ്രവര്ത്തകര് പ്രതികളായ കേസില് 2022ല് എല്ലാവരെയും ഹൈക്കോടതി വെറുതെവിട്ടു.
