കാസര്‍കോട്: പുല്ലൂര്‍-പെരിയ പഞ്ചായത്തില്‍ വീണ്ടും പുലി ഭീഷണി. വ്യാഴാഴ്ച രാത്രി എത്തിയ പുലി വളര്‍ത്തു നായയെ കടിച്ചു കൊന്നു. വിവരമറിഞ്ഞ് അമ്പലത്തറ പൊലീസും വനംവകുപ്പ് അധികൃതരും സ്ഥലത്തെത്തി അന്വേഷണം ആരംഭിച്ചു. അമ്പലത്തറ സ്വദേശിയായ വിജയന്റെ ഉടമസ്ഥതതയില്‍ പെരിയ, നാര്‍ക്കൊളം ഭഗവതി ക്ഷേത്രത്തിനു സമീപത്തുള്ള റബ്ബര്‍ തോട്ടത്തിലാണ് വെള്ളിയാഴ്ച വെളുപ്പിനു നായയെ കടിച്ചുകൊന്ന നിലയില്‍ കണ്ടെത്തിയത്. തോട്ടത്തില്‍ ടാപ്പിംഗ് നടത്തുകയായിരുന്ന വര്‍ഗീസാണ് നായയെ കടിച്ചുകൊന്ന നിലയില്‍ ആദ്യം കണ്ടത്. ഉടന്‍ അമ്പലത്തറ പൊലീസിനെ വിവരം അറിയിച്ചു. പൊലീസെത്തി നടത്തിയ പ്രാഥമിക പരിശോധനയില്‍ നായയെ പുലി കടിച്ചു കൊന്നതാണെന്നു വ്യക്തമായി. തുടര്‍ന്ന് വനപാലകരും സ്ഥലത്തെത്തി.
ചോര ഒഴുകിക്കൊണ്ടിരിക്കുന്ന നിലയിലാണ് നായയുടെ ജഡം കാണപ്പെട്ടതെന്നു ടാപ്പിംഗ് തൊഴിലാളിയായ വര്‍ഗീസ് പറഞ്ഞു.
വ്യാഴാഴ്ച രാത്രി പരിസര പ്രദേശത്ത് നായകള്‍ നിര്‍ത്താതെ കുരച്ചിരുന്നുവെന്നും അദ്ദേഹം പറഞ്ഞു. നേരത്തെ പല തവണ പുലിയെ കാണപ്പെട്ട കേന്ദ്ര സര്‍വ്വകലാശാലക്കു സമീപത്താണ് നാര്‍ക്കൊളം. ആഴ്ചകള്‍ക്കു മുമ്പ് കിണറ്റില്‍ വീണ നിലയില്‍ പുലിയെ കാണപ്പെട്ട കൊടവലത്തേക്ക് നാര്‍ക്കൊളത്തു നിന്നു ചെറിയ ദൂരമേ ഉള്ളു.