മലപ്പുറം: മുന് എംഎല്എയും തൃണമൂല് കോണ്ഗ്രസ് നേതാവുമായ പി.വി അന്വറിന്റെ മലപ്പുറത്തെ വീട്ടിലും സ്ഥാപനങ്ങളിലും എന്ഫോഴ്സ്മെന്റ് ഡയറക്ട്രേറ്റ് റെയ്ഡ്. വെള്ളിയാഴ്ച രാവിലെ ഏഴ് മണിയോടെയാണ് ഇഡി സംഘം അന്വറിന്റെ വീട്ടിലെത്തിയത്. പിവി അന്വറിന്റെ സഹായികളുടെ വീട്ടിലും ഇഡി എത്തിയിട്ടുണ്ട്. ചെന്നൈ, കോഴിക്കോട്, കൊച്ചി യൂണിറ്റുകളാണ് പരിശോധന നടത്തുന്നത്.
കെഎഫ്സി ലോണുമായി ബന്ധപ്പെട്ടാണ് പരിശോധന നടക്കുന്നത്. പിവി അന്വര് ഒരു സ്ഥലത്തിന്റെ രേഖ വെച്ച് രണ്ട് വായ്പ്പയെടുത്തെന്നാണ് പരാതി. മതിയായ രേഖകളില്ലാതെയാണ് പിവി അന്വര് മലപ്പുറത്തെ കേരള ഫിനാന്ഷ്യല് കോര്പ്പറേഷനില് നിന്നും 12 കോടി ലോണെടുത്തത്. ഉദ്യോഗസ്ഥരുമായി ഗൂഢാലോചന നടത്തിയാണ് വായ്പയെടുത്തെന്നാണ് ആക്ഷേപം. ഭരണസ്വാധീനം ഉപയോഗിച്ച് വായ്പയെടുത്തെന്നാണ് വിജിലന്സിന്റെ കണ്ടെത്തല്. അഞ്ചു കോടിയുടെ മുകളിലേക്കുള്ള സാമ്പത്തിക തിരിമറി ആയതിനാലാണ് എന്ഫോഴ്സ്മെന്റ് ഡയറക്ടറേറ്റ് പരിശോധന നടത്തുന്നത്. പിവി അന്വറിന്റെ സില്സില പാര്ക്കില് കഴിഞ്ഞ ദിവസം വിജിലന്സ് പരിശോധന നടന്നിരുന്നു. ഇതിന് പിന്നാലെയാണ് ഇഡിയും എത്തിയിരിക്കുന്നത്. അന്വര് വീട്ടിലുണ്ടെന്നാണ് വിവരം.
