ഇടുക്കി: ആസിഡ് ഒഴിച്ച് സഹോദരപുത്രനെ കൊലപ്പെടുത്തിയ കേസിലെ പ്രതി മരിച്ചു. ആസിഡ് ആക്രമണത്തിനിടെ ഗുരുതരമായി പരിക്കേറ്റ് ചികിത്സയിലായിരുന്ന കേസിലെ പ്രതിയും ഏറ്റുമാനൂര് കാട്ടാച്ചിറ സ്വദേശിനിയുമായ തങ്കമ്മ(82)യാണ് മരിച്ചത്. കോട്ടയം മെഡിക്കല് കോളേജില് ചികിത്സയിലിരിക്കെയാണ് മരണം. സഹോദരപുത്രനായ സുകുമാരനെയായിരുന്നു തങ്കമ്മ സാമ്പത്തിക തര്ക്കങ്ങള തുടര്ന്ന് കൊലപ്പെടുത്തിയത്. ഒക്ടോബര് 25ന് ആയിരുന്നു ആസിഡ് ആക്രമണ സംഭവം നടന്നത്. തങ്കമ്മയുടെ സ്വര്ണം പണയംവെച്ചതുമായി ബന്ധപ്പെട്ട് സുകുമാരനുമായി തര്ക്കവും കേസുമുണ്ടായിരുന്നു. രണ്ടാഴ്ച മുന്പ് തങ്കമ്മ സുകുമാരന്റെ വീട്ടിലെത്തി സ്വര്ണം പണയംവെച്ചതുമായി ബന്ധപ്പെട്ട് വീണ്ടും പ്രശ്നമുണ്ടാക്കിയിരുന്നു. ഇതിന് ശേഷം 25ന് സോഫയില് കിടക്കുകയായിരുന്ന സുകുമാരന്റെ മുഖത്ത് പിന്നിലൂടെ എത്തിയ തങ്കമ്മ ആസിഡ് ഒഴിക്കുകയായിരുന്നു. ആന്തരികാവയവങ്ങള്ക്കും പൊള്ളലേറ്റാണ് സുകുമാരന്റെ മരണമെന്നായിരുന്നു പോസ്റ്റ്മോര്ട്ടം റിപ്പോര്ട്ട്. ആക്രമണത്തിനിടെ പരിക്കേറ്റ തങ്കമ്മയെ ആദ്യം ഇടുക്കി മെഡിക്കല് കോളേജ് ആശുപത്രിയിലാണ് പ്രവേശിപ്പിച്ചത്. നെഞ്ചുവേദന അനുഭവപ്പെട്ടതിനെ തുടര്ന്ന് കോട്ടയം മെഡിക്കല് കോളേജ് ആശുപത്രിയിലേക്ക് മാറ്റുകയായിരുന്നു. ഇതിന് പിന്നാലെയാണ് ഇന്ന് മരണം സംഭവിച്ചത്.
