കൊല്ലം: ടീപോയിയുടെ മുകള്‍ ഭാഗത്തെ ഗ്ലാസ് പൊട്ടി വീണ് അഞ്ചു വയസ്സുകാരനു ദാരുണാന്ത്യം. കുണ്ടറ, കുമ്പളത്തെ സുനീഷ്-റൂബി ദമ്പതികളുടെ മകന്‍ എയ്ദിന്‍ സുനീഷ് ആണ് മരിച്ചത്.
ബുധനാഴ്ച വൈകുന്നേരം നാലുമണിയോടെയാണ് സംഭവം. വാതില്‍ അകത്തു നിന്നും പൂട്ടി അമ്മ കുളിക്കാനായി കുളിമുറിയിലേക്ക് പോയതായിരുന്നു. ഈ സമയത്ത് വീട്ടിനകത്ത് എയ്ദിന്‍ മാത്രമേ ഉണ്ടായിരുന്നുള്ളു. അമ്മ കുളിമുറിയിലേക്ക് പോയ സമയത്ത് മുകള്‍ ഭാഗത്ത് ഗ്ലാസുള്ള ടീപോയി നീക്കി അതിനു മുകളില്‍ കയറി വാതിലിന്റെ കുറ്റി തുറക്കാന്‍ ശ്രമിക്കുന്നതിനിടയിലാണ് അപകടം നടന്നതെന്നു സംശയിക്കുന്നു. അമ്മ കുളി കഴിഞ്ഞ് എത്തിയപ്പോള്‍ മകന്റെ തുടയില്‍ ഗ്ലാസ് കുത്തിക്കയറി ചോര വാര്‍ന്ന നിലയിലാണ് കണ്ടത്. ഉടന്‍ ആശുപത്രിയില്‍ എത്തിച്ചുവെങ്കിലും ജീവന്‍ രക്ഷിക്കാനായില്ല. എയ്ദിന്റെ അച്ഛന്‍ സുനീഷ് മൂത്ത മകനെ ട്യൂഷനു കൊണ്ടുവിടാന്‍ പോയ സമയത്തായിരുന്നു ദാരുണമായ അപകടമുണ്ടായത്.