കാസര്കോട്: ഇടവേളയ്ക്കു ശേഷം കുമ്പള ടൗണില് വീണ്ടും കവര്ച്ച. കുമ്പള ടൗണില് ലീഗാഫീസിനു താഴത്തെ നിലയില് പ്രവര്ത്തിക്കുന്ന കെ.എന് ട്രേഡേര്സിന്റെ ഷട്ടര് ഇളക്കിമാറ്റി രണ്ടു ചാക്ക് കുരുമുളകും മേശ വലിപ്പിലുണ്ടായിരുന്ന നാണയങ്ങളും കവര്ച്ച ചെയ്തു. കളത്തൂരിലെ യാക്കൂബിന്റെ ഉടമസ്ഥതയിലുള്ളതാണ് കട. ബുധനാഴ്ച രാവിലെ കട തുറക്കാന് എത്തിയപ്പോഴാണ് കവര്ച്ച നടന്ന വിവരം അറിഞ്ഞത്. പൂട്ടുതകര്ത്ത ശേഷം കമ്പിപ്പാര ഉപയോഗിച്ച് ഷട്ടര് ഇളക്കിമാറ്റിയാണ് കവര്ച്ചക്കാര് അകത്തു കടന്നതെന്നു സംശയിക്കുന്നു.
വിവരമറിഞ്ഞ് പൊലീസ് സ്ഥലത്തെത്തി കാവല് ഏര്പ്പെടുത്തി. കൂടുതല് അന്വേഷണത്തിനായി വിരലടയാള വിദഗ്ധര് എത്തുമെന്ന് പൊലീസ് അറിയിച്ചു. ഏതാനും മാസങ്ങള്ക്കു മുമ്പു കുമ്പള ടൗണില് നിരവധി സ്ഥാപനങ്ങളില് കവര്ച്ച നടന്നിരുന്നു. പൊലീസ് രാത്രി കാലങ്ങളില് ജാഗ്രത കാണിച്ചതോടെ കവര്ച്ചക്കാര് പിന്വാങ്ങിയിരുന്നു. ഇതിനു പിന്നാലെയാണ് ചൊവ്വാഴ്ച രാത്രി മലഞ്ചരക്ക് സ്ഥാപനത്തില് കവര്ച്ച നടന്നത്.
