ന്യൂഡൽഹി: പാക് അധീന കശ്മീർ വിട്ടു നൽകാൻ തയാറായില്ലെങ്കിൽ പാക്കിസ്താനോടു യുദ്ധം പ്രഖ്യാപിക്കണമെന്ന് കേന്ദ്രമന്ത്രി രാം ദാസ് അത്താവാല ആവശ്യപ്പെട്ടു. പഹൽഗാം ഭീകരാക്രമണത്തെ തുടർന്ന് ഇരുരാജ്യങ്ങളും തമ്മിലുള്ള നയതന്ത്രബന്ധം വഷളായതിനിടെയാണ് പ്രതികരണം.
പാക് അധീന കശ്മീർ ഉള്ളിടത്തോളം കാലം ഭീകരവാദം ഉണ്ടാകും.
ഇതിലൂടെയാണ് ഭീകരർ ഇന്ത്യയിലേക്കു നുഴഞ്ഞു കയറുന്നത്. അതിനാൽ പാക് അധീന കശ്മീർ നമുക്ക് കൈമാറിയില്ലെങ്കിൽ പാക്കിസ്താനുമായി യുദ്ധം പ്രഖ്യാപിക്കണമെന്ന് പ്രധാനമന്ത്രി നരേന്ദ്രമോദിയോടു അഭ്യർഥിക്കുന്നു , മന്ത്രി പറഞ്ഞു.
കേന്ദ്ര സാമൂ ഹികക്ഷേമ വകുപ്പ് സഹമന്ത്രിയായ അത്താവാല, മഹാരാഷ്ട്രയിലെ എൻഡിഎ ഘടകക്ഷിയായ ആർപിഐ(എ)യുടെ ദേശീയ പ്രസിഡന്റാണ്.
അതിനിടെ പഹൽഗാം ഭീകരാക്രമണത്തിന്റെ പശ്ചാത്തലത്തിൽ ജമ്മുകശ്മീർ നിയമസഭയുടെ പ്രത്യേക സമ്മേളനം ചേർന്നു. ഭീകരാക്രമണത്തെ അപലപിച്ച് സമ്മേളനം പ്രമേയം പാസാക്കി.