കാസർകോട്: മലയോര ഹൈവേയിലെ അപകടമേഖലയായി മാറിയ ചിറ്റാരിക്കാൽ കാറ്റാംകവല മറ്റപ്പള്ളി വളവിനു സമീപം സ്‌കൂട്ടി മറിഞ്ഞ് മൂന്നര വയസുകാരി മരിച്ചു. കടുമേനി സ്വദേശി സാജൻ -നിസിയ ദമ്പതികളുടെ മകൾ സെലിൻ മേരി ആണ് മരിച്ചത്. അപകടത്തിൽ സെലിന്റ അമ്മ നിസിയ, നിസിയയുടെ മാതാവ് രാജി എന്നിവർക്ക് ഗുരുതരമായി പരിക്കേറ്റു. ഇവരെ ചെറുപുഴയിലെ സഹകരണ ആശുപത്രിയിൽ പ്രവേശിപ്പിച്ചു. വെള്ളിയാഴ്ച രാത്രി എട്ടോടെയായിരുന്നു അപകടം. കുത്തനെ ഇറക്കം ഇറങ്ങുന്നതിനിടെ നിയന്ത്രണം നഷ്ടമായ സ്‌കൂട്ടി ഡിവൈഡറിൽ ഇടിച്ചു മറിയുകയായിരുന്നു. കുട്ടി റോഡിലേക്ക് തെറിച്ചു വീണു പരിക്കേറ്റാണ് മരണം സംഭവിച്ചത്. കമ്പല്ലൂർ ഉന്നതി അംഗനവാടിയിലെ വിദ്യാർത്ഥിനിയാണ് സെലിൻമേരി.