ചെന്നൈ: മുട്ട ഓംലറ്റ് നല്‍കിയില്ലെന്നു ആരോപിച്ചു വെജിറ്റേറിയന്‍ ഹോട്ടലുടമയുടെ മൂക്കരിഞ്ഞു. മൂന്നു പേര്‍ അറസ്റ്റില്‍. കഴിഞ്ഞ ദിവസം ചെന്നൈയ്ക്കു സമീപത്തെ അമ്പത്തൂരില്‍ സസ്യാഹാരം മാത്രം ലഭിക്കുന്ന ഹോട്ടലിലാണ് സംഭവം. മദ്യലഹരിയില്‍ എത്തിയ മണികണ്ഠന്‍, ശശികുമാര്‍, മുത്തു എന്നിവരാണ് അക്രമം നടത്തിയത്. ഇവരെ അറസ്റ്റു ചെയ്തതായി പൊലീസ് പറഞ്ഞു. ആദ്യം ഓര്‍ഡര്‍ ചെയ്ത ഭക്ഷണം കഴിച്ച ശേഷമാണ് കൂട്ടത്തില്‍ നിന്നൊരാള്‍ മുട്ട ഓംലറ്റ് ആവശ്യപ്പെട്ടത്. വെജിറ്റേറിയന്‍ ഹോട്ടല്‍ ആണെന്നു പറഞ്ഞപ്പോള്‍ വെയിറ്ററിനോട് തട്ടിക്കയറിയ മണികണ്ഠന്‍ എന്നയാള്‍ ക്യാഷ് കൗണ്ടറിലെത്തി ഹോട്ടലുടമയായ ഇളവരശിന്റെ മൂക്ക് വാളുകൊണ്ട് അരിയുകയായിരുന്നുവെന്ന് പൊലീസ് പറഞ്ഞു. ജീവനക്കാരെത്തിയാണ് ഇളവരശനെ ആശുപത്രിയില്‍ എത്തിച്ചത്. സ്ഥിരം കുറ്റവാളികളാണ് പിടിയിലായവരെന്നു പൊലീസ് പറഞ്ഞു.