മംഗ്‌ളൂരു: ബണ്ട്വാള്‍, തുംബെ മഹാലിംഗേശ്വര ക്ഷേത്രത്തില്‍ നിന്നു ഒന്നേകാല്‍ ലക്ഷം രൂപ വില വരുന്ന വെള്ളിയാഭരണങ്ങള്‍ കവര്‍ച്ച ചെയ്ത കേസില്‍ കാസര്‍കോട് സ്വദേശി ഉള്‍പ്പെടെ മൂന്നു പേരെ പൊലീസ് അറസ്റ്റു ചെയ്തു. കാസര്‍കോട് സ്വദേശി ആക്രി ബഷീര്‍ എന്ന ബഷീര്‍ (44), കൊല്ലത്തെ പ്രകാശ്ബാബു എന്ന മുഹമ്മദ് നിയാസ് (46), പുഡുഗ്രാമത്തിലെ എഫ്.ജെ മുഹമ്മദ് എന്ന ഇസ്മായില്‍ (44)എന്നിവരെയാണ് ദക്ഷിണകന്നഡ എസ്.പി എന്‍ യതീഷിന്റെ നേതൃത്വത്തില്‍ അറസ്റ്റു ചെയ്തത്. നവംബര്‍ നാലിനാണ് കേസിനാസ്പദമായ സംഭവം. ക്ഷേത്രത്തിന്റെ മുന്‍വാതില്‍ തകര്‍ത്താണ് മോഷ്ടാക്കള്‍ അകത്തു കടന്നത്. ആഭരണങ്ങള്‍ക്കൊപ്പം സിസിടിവിയുടെ ഡിവിആറും മോഷ്ടാക്കള്‍ കൈക്കലാക്കിയാണ് സ്ഥലം വിട്ടത്. ബഷീറിനെതിരെ വിവിധ സ്‌റ്റേഷനുകളിലായി 13 കേസുകളും പ്രകാശ് ബാബുവിനെതിരെ മൂന്നു കേസുകളും ഉള്ളതായി പൊലീസ് വൃത്തങ്ങള്‍ പറഞ്ഞു.
