കളമശ്ശേരിയില് യഹോവ സാക്ഷികളുടെ മേഖലാ സമ്മേളനം നടക്കുന്ന കണ്വെന്ഷന് സെന്ററില് സ്ഫോടനം. ഒരാള് മരിച്ചു. 23 പേര്ക്ക് പരിക്കേറ്റു. പരിക്കേറ്റവരില് അഞ്ചു പേരുടെ നില ഗുരുതരമാണ്. യഹോവായ കണ്വെന്ഷന് നടന്ന സ്ഥലത്താണ് സ്ഫോടനം നടന്നത്. കളമശ്ശേരി നെസ്റ്റിനു സമീപം ഉള്ള കണ്വെന്ഷന് സെന്ററിന്റെ അകത്താണ് സ്ഫോടനം നടന്നത്. 9.30 ഓടെ ആണ് ഉഗ്രസ്ഫോടനം ഉണ്ടായത്.
മൂന്ന് നാല് തവണ സ്ഫോടനമുണ്ടായതായി ഹാളിലുണ്ടായിരുന്നവര് പറയുന്നു. മരിച്ചയാളേയും പരിക്കേറ്റവരേയും കളമശ്ശേരി ഗവ. മെഡിക്കല് കോളേജ് ആശുപത്രിയിലേക്കും സ്വകാര്യ ആശുപത്രിയിലേക്കും മാറ്റിയിട്ടുണ്ട്. സ്ഥലത്ത് ആളുകള് തടിച്ചു കൂടിയിരിക്കുകയാണ്. 2500 ആളുകള്ക്ക് പങ്കെടുക്കാന് കഴിയുന്ന ഹാളാണിത്. ഹാളിന്റെ മധ്യഭാഗത്ത് നിന്നാണ് പൊട്ടലുണ്ടായതെന്ന് ദൃക്സാക്ഷികള് പറയുന്നു. പ്രാര്ത്ഥനയുടെ സമയമായതിനാല് എല്ലാവരും കണ്ണടച്ചാണ് നിന്നിരുന്നതെന്ന് ആളുകള് പറയുന്നു. അതേസമയം, എന്താണ് പൊട്ടിത്തെറിയുടെ കാരണമെന്ന് വ്യക്തമായിട്ടില്ലെന്നാണ് പൊലീസ് പറയുന്നത്. ഈ മാസം 27 മുതല് നടന്നുവരുന്ന യഹോവ സാക്ഷികളുടെ മേഖലാ സമ്മേളനത്തിന്റെ അവസാന ദിനമായിരുന്നു ഇന്ന്. സ്ഫോടനം നടന്ന ഹാള് പൊലീസ് സീല് ചെയ്തു. സംസ്ഥാനത്ത് ജാഗ്രതാ നിര്ദേശം പുറപ്പെടുവിച്ചു. ഇന്റലിജന്സ് എ.ഡിജിപി കൊച്ചിലേക്ക് പുറപ്പെട്ടിട്ടുണ്ട്. ക്രമസമാധാന ചുമതലയുള്ള എ.ഡി ജിപി കൊച്ചിയില് എത്തി. അതിനിടെ, അടിയന്തരമായി ജീവനക്കാര് ജോലിക്ക് ഹാജരാകണമെന്ന് കളമശ്ശേരി ഗവ. മെഡിക്കല് സൂപ്രണ്ട് ഡോ. ഗണേശ് മോഹന് അറിയിച്ചു. കളമശേരിയില് പൊട്ടിത്തെറി ഉണ്ടായ സാഹചര്യത്തില് മികച്ച ചികിത്സയൊരുക്കാന് ആരോഗ്യ വകുപ്പ് മന്ത്രി വീണാ ജോര്ജ് ആരോഗ്യ വകുപ്പ് ഡയറക്ടര്ക്കും മെഡിക്കല് വിദ്യാഭ്യാസ വകുപ്പ് ഡയറക്ടര്ക്കും നിര്ദേശം നല്കി. ആശുപത്രികള്ക്ക് ജാഗ്രതാ നിര്ദേശം നല്കി. അവധിയിലുള്ള മുഴുവന് ഡോക്ടര്മാര് ഉള്പ്പെടെയുള്ള ആരോഗ്യ പ്രവര്ത്തകരും അടിയന്തരമായി തിരിച്ചെത്താന് മന്ത്രി നിര്ദേശം നല്കി. കളമശേരി മെഡിക്കല് കോളേജ്, എറണാകുളം ജനറല് ആശുപത്രി, കോട്ടയം മെഡിക്കല് കോളേജ് എന്നിവിടങ്ങളില് അധിക സൗകര്യങ്ങളൊരുക്കാനും നിര്ദേശം നല്കി. അധിക ജീവനക്കാരുടെ സേവനവുമൊരുക്കും. ജില്ലയിലെ മറ്റാശുപത്രികളിലും സൗകര്യമൊരുക്കാന് മന്ത്രി നിര്ദേശം നല്കി.
![](https://malayalam.karavaldaily.com/wp-content/uploads/2024/08/inbound429725125070516882.jpg)
One Comment
സമാധാന മതത്തിന്റെ വികൃതി