പട്ടാഴിമുക്കില് കാറും കണ്ടെയ്നര് ലോറിയും കൂട്ടിയിടിച്ച് രണ്ടു പേര് മരിച്ച സംഭവത്തില് അടിമുടി ദുരൂഹത. കാര് ഓടുന്നതിനിടെ അകത്ത് മല്പ്പിടിത്തം നടന്നതായി സംശയിക്കുന്നുവെന്ന് ദൃക്സാക്ഷിയായ ഗ്രാമപഞ്ചായത്തംഗം ശങ്കര് വെളിപ്പെടുത്തി. ആലയില്പ്പടിയില് നിക്കവേ കാര് കടന്നു പോകുന്നത് കണ്ടിരുന്നു. ഓട്ടത്തിനിടയില് സ്ത്രീ ഇരുന്ന ഭാഗത്തെ ഡോര് മൂന്ന് തവണ തുറന്നു. കാലുകള് ഡോറിന് പുറത്തേക്ക് ഇട്ട നിലയില് കണ്ടിരുന്നുവെന്നും അകത്ത് മല്പ്പിടുത്തം നടന്നതായി സംശയിക്കുന്നുവെന്നും ശങ്കര് പറഞ്ഞു. അതേസമയം തങ്ങള് ആത്മഹത്യ ചെയ്യാന് പോകുന്നു എന്ന് സഹഅധ്യാപികയോട് അനുജ പറഞ്ഞിരുന്നതായി സൂചനയുണ്ട്. സംഭവം കണ്ട ദൃക്സാക്ഷികളും വിനോദ യാത്രാ സംഘത്തിലുണ്ടായിരുന്ന അധ്യാപകരും ഉള്പ്പെടെ പറഞ്ഞ കാര്യങ്ങള് പുറത്തുവന്നതോടെയാണ് ദുരൂഹത ഏറിയത്. കാര് അമിത വേഗത്തില് വന്ന് ഇടിച്ചുകയറുകയായിരുന്നുവെന്നാണ് ലോറി ഉടമയുടെ മകന് ഗോകുലും പറയുന്നത്.
അപകടത്തില് മരിച്ച തുമ്പമണ് നോര്ത്ത് ജിഎച്ച്എസ്എസിലെ അധ്യാപികയായ നൂറനാട് സ്വദേശിനി അനുജയും (36), ചാരുമൂട് പാലമേല് ഹാഷിം മന്സിലില് ഹാഷിമും (35) സുഹൃത്തുക്കളാണ്. ഏറെ കാലമായി ഇവര് പ്രണയത്തിലുമായിരുന്നു. വീട്ടുകാര് ഈ ബന്ധത്തില് നിന്ന് പിന്മാറാന് ഇരുവരോടും ഉപദേശിച്ചിരുന്നു. ഇരുവരും തമ്മിലുള്ള സൗഹൃദം ബന്ധുക്കള് അറിയുകയും അത് പിന്നീട് കുടുംബ പ്രശ്നങ്ങള്ക്ക് കാരണമാകുകയും ചെയ്തെന്നും വിവരമുണ്ട്. വിനോദ യാത്ര കഴിഞ്ഞ മടങ്ങുന്നതിനിടെ അനുജയെ വാഹനത്തിന്റെ വാതില് വലിച്ചു തുറന്ന് ഹാഷിം കൂട്ടിക്കൊണ്ട് പോയെന്നാണ് അനുജയുടെ കൂടെ ജോലി ചെയ്യുന്ന അധ്യാപകര് പറഞ്ഞത്. അപകടത്തില്പ്പെട്ട കാറില് നിന്നും മദ്യക്കുപ്പി കണ്ടെത്തിയിരുന്നു. അമിത വേഗതയില് കാര് ലോറിയില് ഇടിപ്പിച്ചതായാണ് പൊലീസ് സംശയിക്കുന്നത്. അപകടത്തില് കാര് പൂര്ണമായും തകര്ന്നിരുന്നു. ഫയര്ഫോഴ്സും നാട്ടുകാരും ചേര്ന്ന് കാര് വെട്ടിപൊളിച്ചാണ് ഇവരെ പുറത്തെടുത്തത്. നൂറനാട് സുശീലത്തില് റിട്ട സ്കൂള് ഹെഡ്മാസ്റ്റര് രവീന്ദ്രന്റെ മകളാണ് അനുജ. സഹോദരന്: അനൂപ്. ബിസിനസുകാരാനായ കായംകുളം സ്വദേശി ആഞ്ചിയാണ് അനുജയുടെ ഭര്ത്താവ്. താമരക്കുളം പേരൂര്കാരായ്മ സ്വദേശിയായ ഹാഷിം സ്വകാര്യ ബസ് ഡ്രൈവറാണ്. വിവാഹമോചിതനാണ്. ഹാഷിമിന്റെ അച്ഛന് ഹക്കീം ബസ് ഡ്രൈവറാണ്.