തിരുവനന്തപുരം: തേവലക്കാട് എസ് എന്‍ യുപി സ്‌കൂളില്‍ അധ്യാപകന്റെ ക്രൂരത. ഉച്ചാരണശുദ്ധിയില്‍ ഇല്ലെന്ന് ആരോപിച്ച് ആറാം ക്ലാസുകാരനായ ദളിത് വിദ്യാര്‍ഥിയെ ക്ലാസ് മുറിയില്‍ വെച്ച് നാക്ക് വടിപ്പിച്ചെന്ന് പരാതി. കുട്ടിയുടേയും സഹപാഠികളുടേയും പരാതിക്ക് പിന്നാലെ അധ്യാപകന്‍ ആകര്‍ഷ് എസ് എസിനെ സസ്പെന്‍ഡ് ചെയ്തു. വിദ്യാര്‍ഥിയെ അധ്യക്ഷേപിച്ചെന്ന് ബോധ്യപ്പെട്ടതിനാല്‍ നടപടിയെടുക്കുമെന്ന് സ്‌കൂള്‍ മാനേജ്‌മെന്റ് പറഞ്ഞു. സംഭവത്തില്‍ വിദ്യാഭ്യാസ വകുപ്പും ബാലാവകാശ കമ്മീഷനും അന്വേഷണം തുടങ്ങി. അപമാനിക്കപ്പെട്ട കുട്ടി സംഭവം ഉള്ളിലൊതുക്കിയെങ്കിലും ആ അവസ്ഥ കണ്ട് മറ്റ് കുട്ടികള്‍ക്ക് ദുഃഖം തോന്നുകയും അവരത് ഹെഡ്മാസ്റ്ററോടും മറ്റ് അധ്യാപകരോടും പറയുകയുമായിരുന്നു. ആദ്യഘട്ടത്തില്‍ സ്‌കൂള്‍ മാനേജ്‌മെന്റ് ഇത് ഗൗരവത്തിലെടുത്തില്ലെന്ന് ആക്ഷേപമുണ്ട്. മാസങ്ങളോളം ഈ സംഭവം പുറംലോകമറിഞ്ഞില്ല. പിന്നീട് സ്‌കൂളിലെ തന്നെ ചില ആഭ്യന്തര തര്‍ക്കങ്ങളുടെ ഭാഗമായാണ് വിഷയം ബാലാവകാശ കമ്മീഷന് മുന്നിലേക്ക് എത്തുന്നത്.