ബംഗളൂരൂ: ജനസമ്പർക്ക പരിപാടികളിൽ സാധാരണയായി കുടിവെള്ളം, റോഡ്, വീട്, മറ്റ് അടിസ്ഥാന സൗകര്യങ്ങൾ തുടങ്ങിയവയാണ് മുഖ്യമന്ത്രിയുടെ മുന്നിൽ എത്തുന്ന നിവേദനങ്ങൾ. എന്നാൽ കഴിഞ്ഞ ദിവസം കർണാടകയിലെ ജനസമ്പർക്ക പരിപാടിയിൽ തികച്ചും വ്യത്യസ്തമായ ഒരു ആവശ്യമാണ് ഉയർന്നുവന്നത്. സ്വന്തമായി കൃഷിഭൂമിയുണ്ടായിട്ടും കർഷകരായ യുവാക്കൾക്ക് വിവാഹം കഴിക്കാൻ പെണ്ണുകിട്ടുന്നില്ലെന്ന വിഷയമാണ് ഒരു കർഷകൻ മുഖ്യമന്ത്രി ഡി.കെ. ശിവകുമാറിന് മുന്നിൽ ഉന്നയിച്ചത്. മൈസൂരു ജില്ലയിലെ പെരിയപട്ടണയിൽ ശനിയാഴ്ച നടന്ന പരിപാടിക്കിടെയായിരുന്നു സംഭവം. സ്വന്തമായി വീടും സ്ഥലവുമുണ്ടായിട്ടും കർഷകർക്ക് പെൺകുട്ടികളെ വിവാഹം ചെയ്തുകൊടുക്കാൻ ആരും തയ്യാറാകുന്നില്ലെന്നും 35നും 40നും ഇടയിൽ പ്രായമുള്ള പല കർഷക യുവാക്കളും വിവാഹം നടക്കാത്തതിനെ തുടർന്ന് ആത്മഹത്യയെക്കുറിച്ച് പോലും ചിന്തിക്കുകയാണെന്നും കർഷകൻ പറഞ്ഞു. സർക്കാർ, പ്രൈവറ്റ് അല്ലെങ്കിൽ മറ്റ് ശമ്പളമുള്ള ജോലികളുള്ള ചെറുപ്പക്കാരെയാണ് പെൺകുട്ടികളുടെ കുടുംബങ്ങൾ കൂടുതലായി തേടുന്നത്. എന്നാൽ ഏല്ലാർക്കും ആഹാരം നൽകുന്ന കർഷകന് ആരും പെൺമക്കളെ വിവാഹം കഴിച്ചു നൽകുന്നില്ലെന്നു കർഷകൻ പറഞ്ഞു. വധുവിനെ ലഭിക്കാത്ത സാഹചര്യം ലക്ഷക്കണക്കിന് ആളുകളുടെ ജീവിതത്തെ ബാധിക്കുന്ന വിഷയമാണെന്നും ഇതിൽ എന്തെങ്കിലും നടപടി സ്വീകരിക്കണമെന്നും അദ്ദേഹം ശിവകുമാറിനോട് അഭ്യർഥിച്ചു. ഈ ആവശ്യം ശിവകുമാറിനെ അത്ഭുതപ്പെടുത്തിയെങ്കിലും കർണാടകയിൽ കർഷകരുടെ വിവാഹവുമായി ബന്ധപ്പെട്ട ആശങ്കകൾ മുൻപും ചർച്ചയായിട്ടുള്ളതാണ്.
എം.എൽ.എ എച്ച്. ഡി. രംഗനാഥ്, കർഷകരെ വിവാഹം കഴിക്കുന്ന സ്ത്രീകൾക്ക് പ്രത്യേക ആനുകൂല്യങ്ങൾ നൽകണമെന്ന് ആവശ്യപ്പെട്ട് അന്നത്തെ മുഖ്യമന്ത്രി സിദ്ധരാമയ്യക്ക് കത്തെഴുതിയിരുന്നു. ഗ്രാമങ്ങളിൽ താമസിച്ച് കൃഷിയെ ആശ്രയിച്ചു ജീവിക്കുന്ന പുരുഷന്മാരെ വിവാഹം കഴിക്കുന്ന സ്ത്രീകൾക്ക് വരാനിരിക്കുന്ന നിയമസഭാ സമ്മേളനത്തിൽ പ്രത്യേക അലവൻസും പ്രത്യേക പദവിയും പ്രഖ്യാപിക്കണമെന്നായിരുന്നു കത്തിലെ ആവശ്യം..