കൊടക്കാട് നാരായണൻ

കൊടക്കാട് ഗ്രാമത്തിന്റെ കലാ–സാംസ്കാരിക, സാമൂഹിക രംഗങ്ങളിൽ ആറു പതിറ്റാണ്ടിലേറെ നിറസാന്നിധ്യമായിരുന്ന ശങ്കരൻ നമ്പൂതിരിയുടെ (85) വേർപാട് ഒരു കാലഘട്ടത്തിന്റെ വിടവാങ്ങലാണെന്ന് എഴുത്തുകാരൻ നാരായണൻ കൊടക്കാട് അനുസ്മരിച്ചു.
നാടകങ്ങൾക്ക് സംഗീതം പകരുക, ഗാനങ്ങൾ രചിക്കുക, പാടുക, സംവിധാനം ചെയ്യുക തുടങ്ങി കലയുടെ വിവിധ മേഖലകളിൽ വ്യക്തിമുദ്ര പതിപ്പിച്ച പ്രതിഭയായിരുന്നു അദ്ദേഹം. ഓടക്കുഴൽ വാദനത്തിലും തബല വായനയിലും അസാധാരണ മികവ് പുലർത്തിയ ശങ്കരൻ നമ്പൂതിരി, താൻ ആർജിച്ച സംഗീതജ്ഞാനം പുതിയ തലമുറയ്ക്ക് സൗജന്യമായി പകർന്നുനൽകുന്നതിലും അതീവ തൽപരനായിരുന്നു.
കൊടക്കാട്ടെയും പരിസര പ്രദേശങ്ങളിലെയും നിരവധി കലാസമിതികളുടെയും സംഘടനകളുടെയും നാടകപ്പണിപ്പുരകളിൽ അദ്ദേഹത്തിന്റെ സാന്നിധ്യം പതിറ്റാണ്ടുകളോളം ഒഴിച്ചുകൂടാനാവാത്തതായിരുന്നു. അരങ്ങിനു പിന്നിൽ സംഗീതമൊരുക്കിയും കലാകാരന്മാരെ പരിശീലിപ്പിച്ചും നാടകങ്ങൾക്ക് ജീവൻ പകർന്ന ആ പ്രതിഭ നാടിന്റെ കലാചരിത്രത്തിന്റെ ഭാഗമായിത്തീർന്നു.
ആറ് പതിറ്റാണ്ടുകൾക്കു മുമ്പ് കൊടക്കാട് . ഗ്രാമത്തിൽ കൈരളി ആർട്സ് ക്ലബ്ബും ഗ്രന്ഥാലയവും സ്ഥാപിക്കുന്നതിന് മുന്നിട്ടിറങ്ങിയവരിൽ പ്രധാനിയായിരുന്നു ശങ്കരൻ നമ്പൂതിരി. ആർട്‌സ്ക്ലബ്ബിന്റെയും ഗ്രന്ഥാലയത്തിന്റെയും സ്ഥാപക അംഗവും ദീർഘകാലം ഭാരവാഹിയും ആയിരുന്നു .
നാടകങ്ങളുടെ ഗാന രചന, സംഗീത നിർവഹണം, ആലാപനം, നാടക സംവിധാനം, ഓടക്കുഴൽ
വാദനം, തബല വായന തുടങ്ങി നാടകത്തിന്റെ സർവ്വ മേഖലകളിലും നിറഞ്ഞുനിന്ന പ്രതിഭയാണ് .
കൈരളി ആർട്സ് ക്ലബ്ബ് രചിച്ച “നവരത്നമാല” ഗാന സമാഹാരത്തിൽ സിവിക് കൊടക്കാട്, ഇ എൻ വാര്യർ
എന്നിവരോടൊപ്പം ഗാനരച നടത്തി. എം എ തമ്പാൻ വിശ്വകർമ്മൻ, സി വി അപ്പുക്കുട്ടൻ നായർ തുടങ്ങി പഴയകാല ഗ്രന്ഥശാല കലാസമിതി പ്രവർത്തകരുടെ കൂടെ സജീവമായി പ്രവർത്തിച്ചു.സ്ഥാപനത്തിന്റെ വികസനത്തിനായി
നാടുനീളെ നടന്ന് വീടുകൾ കയറിയിറങ്ങിയും ജനങ്ങളെ കൂട്ടിയിണക്കിയ അദ്ദേഹത്തിന്റെ നിസ്വാർഥ പ്രവർത്തനം പഴയ തലമുറ ഇന്നും ഓർക്കുന്നു. വായനയും കലയും സാമൂഹിക കൂട്ടായ്മയും ഗ്രാമജീവിതത്തിന്റെ ഭാഗമാക്കുന്നതിൽ അദ്ദേഹം വഹിച്ച പങ്ക് ശ്രദ്ധേയമാണ്. മികച്ച വായനക്കാരനാണ് .
പുരോഗമന കലാസാഹിത്യസംഘം കാസർകോട് ജില്ലാ കമ്മിറ്റി അംഗമായിരുന്നു .
വയനാട്ടിൽ വച്ച് നടന്ന കേരള സ്റ്റേറ്റ് സർവീസ് പെൻഷൻ യൂണിയൻ സംസ്ഥാന സമ്മേളനത്തിൽ കവിതാരചനാ മത്സരത്തിൽ രണ്ടാം സ്ഥാനം നേടുകയുണ്ടായി. ശങ്കരൻ നമ്പൂതിരി രചിച്ച ഗാനത്തിന് പിന്നീട് അദ്ദേഹം തന്നെ സംഗീതം പകർന്ന് അവതരിപ്പിക്കുകയുണ്ടായി .
പെൻഷൻ യൂണിയന്റെ എല്ലാ യോഗങ്ങളിലും ശങ്കരൻ നമ്പൂതിരിയുടെ ഓടക്കുഴൽ വാദനവും ഗാനാലാപനവും പതിവാണ്. കരിവെള്ളൂർ രക്തസാക്ഷി ദിനാചരണത്തിന്റെ ഭാഗമായി ദേശാഭിമാനി കലാസമിതി ഒരുക്കിയ നൃത്ത സംഗീത നാടകത്തിൽ ശങ്കരൻ നമ്പൂതിരിയുടെ സംഗീത സംവിധാനം നാടിന്റെ ആകെ പ്രശംസ പിടിച്ചു പറ്റിയിരുന്നു .

കലാ–സാംസ്കാരിക പ്രവർത്തനങ്ങളിലെന്ന പോലെ ഔദ്യോഗിക ജീവിതത്തിലും അദ്ദേഹം മികവിന്റെ മാതൃക തീർത്തു. സ്പെഷ്യൽ ഗ്രേഡ് എക്സിക്യൂട്ടീവ് ഓഫീസറായി സേവനമനുഷ്ഠിച്ച കാലത്ത് കാര്യക്ഷമവും ജനപക്ഷവുമായ പ്രവർത്തനത്തിലൂടെ ശ്രദ്ധേയനായി. ഔദ്യോഗിക കൃത്യനിർവഹണത്തിലെ അദ്ദേഹത്തിന്റെ മികവ് എം.എൽ.എമാരായ വി.വി. കുഞ്ഞമ്പു, ടി.കെ.സി. എന്നിവരുടെ പ്രശംസയ്ക്കും അർഹമായി.
ഉദ്യോഗത്തിന്റെ തിരക്കുകൾക്കിടയിലും നാടിന്റെ കലാ–സാംസ്കാരിക പ്രവർത്തനങ്ങളിൽനിന്ന് അദ്ദേഹം ഒരിക്കലും അകന്നുനിന്നില്ല. പദവിയേക്കാൾ പൊതു പ്രവർത്തനത്തിനും പ്രതിഫലത്തേക്കാൾ കലയുടെ വളർച്ചയ്ക്കും പ്രാധാന്യം നൽകിയ ജീവിതമായിരുന്നു അദ്ദേഹത്തിന്റേത്.
ഒരു കലാകാരൻ, സംഗീതജ്ഞൻ, ഗുരു, സംഘാടകൻ, മാതൃകാ ഉദ്യോഗസ്ഥൻ—ഈ നിലകളിലെല്ലാം നാടിന്റെ ഓർമകളിൽ ഇടം നേടിയ ശങ്കരൻ നമ്പൂതിരി വിടപറയുമ്പോൾ കൊടക്കാടിന് നഷ്ടമാകുന്നത് സ്വന്തം സാംസ്കാരിക ചരിത്രത്തിന്റെ ഒരു സജീവ അധ്യായമാണ്.
അദ്ദേഹം പകർന്നുനൽകിയ ഈണങ്ങളും താളങ്ങളും, വളർത്തിയെടുത്ത കലാകാരന്മാരും, കൈപിടിച്ചുയർത്തിയ സാംസ്കാരിക സ്ഥാപനങ്ങളും ആ ജീവിതത്തിന്റെ സ്മാരകങ്ങളായി നിലനിൽക്കും.