മൊഗ്രാല്‍: മൊഗ്രാലിലും പരിസരപ്രദേശങ്ങളിലും തെരുവ് നായ്ക്കൂട്ടം കോഴിയെ കടിച്ചു കൊന്നു. ടിവിഎസ് റോഡിലാണ് തെരുവുനായ്ക്കൂട്ടം ഒരു വളര്‍ത്തു കോഴിയെ വളഞ്ഞിട്ട് ആക്രമിച്ച് കൊന്നത്. ബഹളം കേട്ട് വീട്ടുകാര്‍ പുറത്തിറങ്ങിയതിനാല്‍ മറ്റു കോഴികളെ രക്ഷപ്പെടുത്താന്‍ കഴിഞ്ഞു. ബുധനാഴ്ച രണ്ടു വളര്‍ത്തു പൂച്ചകളെയും നായ്ക്കള്‍ കടിച്ചു കൊന്നിരുന്നു.
കാലവര്‍ഷം തുടങ്ങിയത് മുതല്‍ മൊഗ്രാലില്‍ തെരുവ് നായകളുടെ ശല്യം രൂക്ഷമാണ്. അക്രമവാസനയുള്ള തെരുവ് നായ്ക്കളെ കൊല്ലാമെന്ന് സുപ്രീംകോടതി ഉത്തരവ് വന്നതിന് ശേഷവും അധികൃതര്‍ മുഖം തിരിച്ചു നില്‍ക്കുന്നത് പ്രതിഷേധത്തിന് വഴിവച്ചിട്ടുണ്ട്. തെരുവുനായ ശല്യം വര്‍ധിച്ചതോടെ രാവിലെ സ്‌കൂളിലേക്കും മദ്രസയിലേക്കും പോകുന്ന കുട്ടികളുടെ കാര്യത്തില്‍ രക്ഷിതാക്കള്‍ ആശങ്കയിലാണ്.