കാസര്കോട്: സമസ്ത മുശാവറ അംഗവും കാസര്കോട് ജില്ലാ പ്രസിഡണ്ടുമായ ത്വാഖ അഹമ്മദ് മൗലവി അസ്ഹരി അന്തരിച്ചു. മംഗ്ളൂരുവിലെ ആശുപത്രിയില് ചികിത്സയിലിരിക്കെ ഇന്ന് (ചൊവ്വ) രാവിലെയാണ് അന്ത്യം സംഭവിച്ചത്. മംഗ്ളൂരു- കീഴൂര് സംയുക്ത ഖാസിയായിരുന്നു.
തളങ്കര ഖാസിലൈന് സ്വദേശിയാണ്. ലക്ഷദ്വീപിലെ പ്രശസ്തമായ ഖാസി കുടുംബത്തില് ജനിച്ച അദ്ദേഹം, മംഗലാപുരത്തെ മുന് ഖാസിയായിരുന്ന അബ്ദുല്ല ഹാജിയുടെ പൗത്രപുത്രനാണ്. മുഹമ്മദ് കുഞ്ഞി ഹാജിയും ആയിഷയും ആണ് മാതാപിതാക്കള്. 1947 ആഗസ്ത് 10 നാണ് ജനനം. തളങ്കര റൗളത്തുല് ഉലും മദ്റസ തളങ്കര മുസ്ലിം ഹൈസ്കൂള് എന്നിവിടങ്ങളില് നിന്നാണ് പ്രാഥമിക വിദ്യാഭ്യാസം നേടിയത്.
പൊന്നാനി, കൊടുങ്ങല്ലൂര്, ദാറുല് ഉലും ദെയുബന്ദ്, അല്-അസ്ഹര് യൂണിവേഴ്സിറ്റി കൈറോ (ഈജിപ്ത്) എന്നിവിടങ്ങളില് നിന്ന് തുടര്വിദ്യാഭ്യാസം നേടി. കോട്ടയം തിരുനക്കര പുത്തന്പള്ളിയില് മുദരിസും ഖത്തീബുമായി ദീനി രംഗത്ത് സേവനം ആരംഭിച്ചു. മുന് ഖാസിയായിരുന്ന സി.എം. അബ്ദുല്ല മൗലവിയുടെ ദാരുണമായ വിയോഗത്തെ തുടര്ന്നാണ് ത്വാഖാ അഹമ്മദ് മൗലവി മംഗലാപുരം ഖാസിയായി ചുമതലയേറ്റത്. 2013 ല് സമസ്ത കേരള ജംഇയ്യത്തുല് ഉലമ ജില്ലാ പ്രസിഡണ്ടായി. ടി.കെ.എം. ബാവ മുസ്ല്യാര് അന്തരിച്ചതിനെ തുടര്ന്നുണ്ടായ ഒഴിവിലേക്കാണ് ത്വാഖ അഹ്മദ് മൗലവിയെ തെരഞ്ഞെടുത്തത്.
