കൊടക്കാട് നാരായണൻ

ചൈനയുടെ ഹൃദയഭൂമിയിൽ, മേഘസമുദ്രത്തിന് മുകളിൽ തല ഉയർത്തി നിൽക്കുന്ന പാറരാജാക്കന്മാരുടെ നാട്; ലോകപ്രശസ്ത പ്രകൃതി സംരക്ഷിത മേഖലയായ ചൈനയിലെ ഷാങ് ജിയാജി നാഷണൽ ഫോറെസ്റ്റ് പാർക്കി ലേക്ക് ആണ് യാത്രാനന്ദ ട്രാവൽ ഫ്യൂഷനോടൊപ്പമുള്ള യാത്ര.

ഇത് ചൈനയുടെ തെക്കൻ ഭാഗത്തുള്ള ഷിയാങ്ജിയാജി നഗരത്തിനടുത്തായി, ഹുനാൻ പ്രവിശ്യയിലാണ് സ്ഥിതി ചെയ്യുന്നത്. 1982-ൽ ചൈനയിലെ ആദ്യത്തെ ദേശീയ വനോദ്യാനമായി പ്രഖ്യാപിക്കപ്പെട്ട ഈ പ്രദേശം പിന്നീട്
യുണസ്കോ ലോക പൈതൃക പട്ടികയിലും ഇടം നേടി.

ആകാശത്തെ തൊടുന്നപോലെ ഉയർന്നുനിൽക്കുന്ന ആയിരക്കണക്കിന് മണൽക്കല്ല് തൂണുകൾ കൊണ്ട് ശ്രദ്ധേയമായ
അവതാർ മലനിരകൾ ഇവിടെയാണ്.
ഹോളിവുഡ് ചിത്രമായ Avatar-അവതാറിലെ “ഹല്ലെലൂയ മൗണ്ടൻസ്” ഈ പ്രദേശത്തിൽ നിന്ന് പ്രചോദനം ഉൾക്കൊണ്ടതാണ്.
ലോകത്തിലെ ഏറ്റവും ഉയരമുള്ള ഔട്ട്ഡോർ ഗ്ലാസ് എലിവേറ്ററായ
ബെയ്ലോങ് എലിവേറ്റർ
ആണ് മറ്റൊരു ആകർഷണം. ഏകദേശം 326 മീറ്റർ ഉയരത്തിലേക്ക് ഏതാനും മിനിറ്റുകൾക്കുള്ളിൽ സന്ദർശകരെ എത്തിക്കുന്നു എന്നതാണ് ഇതിൻ്റെ പ്രത്യേകത.
പ്രശസ്തമായ “ഹെവൻസ് ഗേറ്റ്” (സ്വർഗ്ഗ കവാടം) ഗുഹ ഇവിടെയാണ്.
ഷാങ്‌ജിയാജി നാഷണൽ ഫോറസ്റ്റ് പാർക്ക്
നഗരത്തിൽ നിന്ന് ഏകദേശം 30–40 കിലോമീറ്റർ അകലെയാണ്.
വുലിംഗ്യുവാൻ മേഖലയിലാണത്.
ആയിരക്കണക്കിന് ക്വാർട്സ്-സാൻഡ്‌സ്റ്റോൺ പാറത്തൂണുകൾ ഇവിടുത്തെ പ്രത്യേകത.
മേഘങ്ങൾക്കിടയിൽ നിന്ന് ഉയർന്നു നിൽക്കുന്ന പാറസ്തംഭങ്ങളുടെ അതുല്യ കാഴ്ചകളിലൂടെ പ്രശസ്തമാണ്. ടിയാൻസി മല നിരകളും ഇതിൻ്റെ ഭാഗമാണ്.
അവതാർ ചിത്രത്തിന്റെ പശ്ചാത്തലമായതിലൂടെ പ്രശസ്തമായ പ്രകൃതി ദൃശ്യങ്ങൾ നിറഞ്ഞ
യുവാൻജിയാജി സീനിക് ഏരിയ കണ്ടാലും കണ്ടാലും മതി വരില്ല.
പച്ച മേലാപ്പ് വിരിച്ച വനത്തിനിടയിലൂടെ ഒഴുകുന്ന മനോഹരമായ അരുവിപ്പാതയായ ഗോൾഡൻ വിപ്പ് സ്ട്രീം സ്വർണ അരഞ്ഞാണം പോലെ ആകർഷകമാണ്.
ആഴമേറിയ താഴ് വരയ്ക്ക് മുകളിലൂടെ നടക്കാനുള്ള അപൂർവ അനുഭവം നൽകുന്ന
ലോകപ്രശസ്തമായ സുതാര്യ ഗ്ലാസ് പാലമായ
ഷിയാങ് ജിയാജി ഗ്ലാസ് ബ്രിഡ്ജിലൂടെ നടന്നപ്പോൾ സ്വർഗത്തിലെത്തിയ പ്രതീതി. രോമാഞ്ചമണിയിച്ച ആ അനുഭവത്തെക്കുറിച്ച് അടുത്ത ഡയറിയിൽ.
ഷിയാങ് ജിയാ ജി നാഷണൽ ഫോറസ്റ്റ് പാർക്ക് ലക്ഷ്യമാക്കി ഞങ്ങളുടെ യാത്ര ആരംഭിച്ചപ്പോൾ, ഒരു വനത്തിലേക്കല്ല, പ്രകൃതിയുടെ സ്വപ്നങ്ങളിലേക്കാണ് പോകുന്നതെന്ന് അറിയില്ലായിരുന്നു.
പ്രഭാത മഞ്ഞ് മലഞ്ചെരിവുകളെ പൊതിഞ്ഞുനിന്നു. വളഞ്ഞുപുളഞ്ഞ പാതയിലൂടെ ഷട്ടിൽ ബസ് ഉയരങ്ങളിലേക്ക് കയറുമ്പോൾ, മലകൾ മേഘങ്ങളെ ചുമലിലേറ്റി നിൽക്കുന്നതുപോലെ തോന്നി. ഹെയർ പിൻ വളവുകൾ കയറുമ്പോൾ വാക്കുകളിലൊതുങ്ങാത്ത അനുഭൂതി . ഓരോ വളവും പിന്നിടുമ്പോൾ പുതിയൊരു ചിത്രം തുറന്നുവരികയായിരുന്നു. ഒടുവിൽ പാർക്കിന്റെ പ്രവേശന കവാടം കടന്നപ്പോൾ, പ്രകൃതി തന്റെ രഹസ്യ പുസ്തകത്തിന്റെ ഒരു അധ്യായം ഞങ്ങൾക്കായി തുറന്നു തന്നതു പോലെ.
ആദ്യം കണ്ട കാഴ്ച വിശ്വസിക്കാൻ പ്രയാസമായിരുന്നു.
നിലത്തുനിന്ന് നൂറുകണക്കിന് മീറ്റർ ഉയരത്തിൽ ആകാശത്തേക്ക് കുതിച്ചുയരുന്ന ആയിരക്കണക്കിന് പാറത്തൂണുകൾ!
ചിലത് രാജാക്കന്മാരെപ്പോലെ ഗംഭീരമായി, ചിലത് ധ്യാനിക്കുന്ന സന്യാസിമാരെപ്പോലെ നിശ്ശബ്ദമായി, മറ്റുചിലത് ആകാശത്തെ താങ്ങിനിർത്തുന്ന തൂണുകളെപ്പോലെ.
മേഘങ്ങൾക്കിടയിലൂടെ അവയുടെ കൊടുമുടികൾ മാത്രം കാണുമ്പോൾ, ഭൂമിയിൽ നിന്നല്ല, മറ്റൊരു ഗ്രഹത്തിൽ നിന്നുള്ള കാഴ്ചകളാണോ എന്ന് തോന്നിപ്പോയി.
കോടിക്കണക്കിന് വർഷങ്ങൾ കൊണ്ട് പ്രകൃതി തന്നെ കൊത്തിയെടുത്ത ശിൽപസമുച്ചയം.
ഏകദേശം 300 ദശലക്ഷം വർഷങ്ങൾക്ക് മുമ്പ് ഈ പ്രദേശം സമുദ്രത്തിന്റെ അടിത്തട്ടായിരുന്നുവത്രെ. പിന്നീട് ഭൂവൽക്കരണവും ഉയർച്ചയും മൂലം മണൽക്കല്ലുകൾ മലകളായി രൂപപ്പെട്ടു. മഴയും കാറ്റും താപവ്യതിയാനങ്ങളും കോടിക്കണക്കിന് വർഷങ്ങൾ കൊണ്ട് പാറകളെ കൊത്തിയൊരുക്കി.
അങ്ങനെ ജനിച്ചതാണ് ഈ അത്ഭുതകരമായ ക്വാർട്സ്-സാൻഡ്‌സ്റ്റോൺ തൂണുകൾ.
ചില തൂണുകൾക്ക് 200 മീറ്ററിലേറെ ഉയരമുണ്ട്. ചിലത് 1,000 മീറ്ററിലധികം ഉയരമുള്ള മലകളുടെ ഭാഗങ്ങളാണ്.
ചാറ്റൽ മഴയിൽ മേഘങ്ങളും മലകളും ഈറനണിഞ്ഞ് നിൽക്കുന്ന കാഴ്ചകൾ മുന്നിൽ കാൻവാസ് ചിത്രങ്ങളങ്ങൾ പോലും തോറ്റു പോകും!
ഉച്ചയോടെ മേഘങ്ങൾ താഴേക്ക് ഇറങ്ങിവന്നു.
ഒരു നിമിഷം മുമ്പ് വ്യക്തമായി കണ്ട മല അടുത്ത നിമിഷം അപ്രത്യക്ഷമായി. വീണ്ടും മേഘം മാറുമ്പോൾ മറ്റൊരു രൂപത്തിൽ പ്രത്യക്ഷപ്പെട്ടു.
പ്രകൃതി ഇവിടെ ഒരു ചിത്രകാരിയാണ്. അവൾ ഓരോ നിമിഷവും പുതിയ ചിത്രം വരയ്ക്കുന്നു.
അവിടെയിരുന്ന് ഞാൻ ചിന്തിച്ചു:
“മലകൾ ഒരിക്കലും സഞ്ചരിക്കില്ല; പക്ഷേ അവയെ കാണുന്ന മനുഷ്യന്റെ മനസ്സാണ് അനന്തയാത്ര ചെയ്യുന്നത്.”
പാറകൾ മാത്രമല്ല, വനമാണ് ഈ പാർക്കിന്റെ യഥാർത്ഥ ആത്മാവ്.
വൃക്ഷങ്ങളുടെ തണലിലൂടെ നടന്നപ്പോൾ പക്ഷികളുടെ മനോഹര സംഗീതം കേട്ടു . അകലെ വെള്ളച്ചാട്ടത്തിന്റെ ശബ്ദം. ഇലകളിൽ തഴുകുന്ന കാറ്റിന്റെ മൃദുലഗാനം. ആയിരക്കണക്കിന് സസ്യജാലങ്ങളും അത്ര തന്നെ വന്യജീവി ഇനങ്ങളും ജീവിക്കുന്ന ജൈവോദ്യാനം.
റസെസ് മക്കാ ക്യു കുരങ്ങുകൾ മരക്കൊമ്പുകളിലൂടെ ചാടിക്കളിക്കുന്നു. അപൂർവ പക്ഷികൾ വനത്തിന്റെ വാനമ്പാടികൾ.
നിരവധി ഔഷധസസ്യങ്ങൾ സ്വാഭാവികമായി വളരുന്ന ജൈവവൈവിധ്യത്തിന്റെ കലവറയായ
ഷാങ്‌ജിയാജി ഒരു വിനോദസഞ്ചാര കേന്ദ്രം മാത്രമല്ല ജീവന്റെ ഒരു മഹാഗ്രന്ഥശാല തന്നെയാണ്.
3,000-ത്തിലധികം സസ്യ ഇനങ്ങൾ
നൂറുകണക്കിന് പക്ഷി ഇനങ്ങൾ
അപൂർവ ഉഭയജീവികൾ
നിരവധി സസ്തനികൾ
ഈ പ്രദേശം മധ്യ ചൈനയിലെ പ്രധാന ജൈവവൈവിധ്യ കേന്ദ്രങ്ങളിലൊന്നായി കണക്കാക്കപ്പെടുന്നു.
കാർബൺ ആഗിരണം ചെയ്ത് കാലാവസ്ഥാ വ്യതിയാനത്തെ ചെറുക്കുന്നു എന്നതാണ് വനോദ്യാനത്തിൻ്റെ പ്രധാന പാരിസ്ഥിതിക പ്രാധാന്യം.
ജലസ്രോതസ്സുകളെ സംരക്ഷിക്കുന്നു.
മണ്ണൊലിപ്പ് തടയുന്നു.
അപൂർവ ജീവജാലങ്ങൾക്ക് ആവാസവ്യവസ്ഥ ഒരുക്കുന്നു.

ഇവിടുത്തെ പാറത്തൂണുകൾ ലോക ഭൂമിശാസ്ത്രജ്ഞർക്കും ഭൂവിജ്ഞാനികൾക്കും എന്നും ഒരത്ഭുതമാണ്.
ഭൂമിയുടെ രൂപവത്കരണവും അപക്ഷയപ്രക്രിയകളും പ്രകൃതിയുടെ ദീർഘകാല സൃഷ്ടിപരതയും പഠിക്കാൻ മാത്രം ലോകത്തിൻ്റെ നാനാഭാഗത്തു നിന്ന് ഇവിടെ എത്തുന്ന ഭൗമ ശാസ്ത്ര ഗവേഷകർ നിരവധിയാണ്. അവർക്ക് മുന്നിൽ ഈ ഭൂപ്രകൃതി ഒരു തുറന്ന പാഠപുസ്തകമാണ്.
അതുകൊണ്ടുതന്നെ സമീപപ്രദേശമായ വുളിംഗ് യുവാൻ സെനിക് ആന്റ് ഹിസ്റ്റോറിക് ഇന്ററസ്റ്റ് ഏരിയ ലോകപൈതൃക പദവിയിൽ ഉൾപ്പെടുത്തിയിട്ടുണ്ട്.
സൂര്യൻ പടിഞ്ഞാറോട്ട് ചായുമ്പോൾ പാറത്തൂണുകൾക്ക് സ്വർണനിറം പടർന്നു. മേഘങ്ങൾ അവയെ മൃദുവായി പൊതിഞ്ഞു. വനത്തിന്റെ നിശ്ശബ്ദതയിൽ സമയം പോലും പതുക്കെ സഞ്ചരിക്കുന്നതുപോലെ തോന്നി.
തിരിച്ചിറങ്ങുമ്പോൾ മനസ്സിൽ ഒരു തോന്നൽ മാത്രം:
“പ്രകൃതി ചിലപ്പോൾ മലകൾ സൃഷ്ടിക്കുന്നു; ചിലപ്പോൾ കവിതകൾ. ഷാങ്‌ജിയാജിയിൽ അവൾ രണ്ടും ഒരുമിച്ച് സൃഷ്ടിച്ചിരിക്കുന്നു.”
ഭൂമിയുടെ ചരിത്രവും ആകാശത്തിന്റെ സൗന്ദര്യവും വനത്തിന്റെ ജീവസ്പന്ദനവും ഒരേ ഫ്രെയിമിൽ കാണണമെങ്കിൽ, ഷാങ്‌ജിയാജി നാഷണൽ ഫോറസ്റ്റ് പാർക്കിലേക്ക് ഒരിക്കൽ യാത്ര ചെയ്യണം. അവിടെ എത്തുമ്പോൾ നിങ്ങൾ ഒരു വനത്തെ കാണുകയല്ല; ഭൂമി സ്വപ്നം കണ്ട ഒരു ലോകത്തെയാണ് കാണുന്നത്.
ചൈനയിലെ ഷിയാങ്ജിയാജി നാഷണൽ ഫോറസ്റ്റ് പാർക്ക് പ്രകൃതിസൗന്ദര്യത്തിന് മാത്രമല്ല, മലനിരകളിലേക്കുള്ള അത്യാധുനിക ഗതാഗതസൗകര്യങ്ങൾക്കും ലോകപ്രശസ്തമാണ്. കുത്തനെയുള്ള മലകൾക്കിടയിൽ സഞ്ചാരികളെ സുരക്ഷിതമായി എത്തിക്കുന്ന എലിവേറ്ററുകളും കേബിൾ കാറുകളും മലബസുകളും ഈ പാർക്കിന്റെ പ്രത്യേകതയാണ്.
ബൈലോങ് എലിവേറ്റർ :

“നൂറ് ഡ്രാഗണുകളുടെ എലിവേറ്റർ” എന്നറിയപ്പെടുന്ന ബൈലോങ് എലിവേറ്റർ ലോകത്തിലെ ഏറ്റവും ഉയരമുള്ള ഔട്ട്ഡോർ ഗ്ലാസ് എലിവേറ്ററാണ്.
ഏകദേശം 326 മീറ്റർ ഉയരമുള്ള എലിവേറ്റർ
മലഞ്ചെരിവിൽ നേരിട്ട് സ്ഥാപിച്ചിരിക്കുന്നു.
ഗ്ലാസ് ചുവരുകളിലൂടെ പുറത്തേക്കുള്ള കാഴ്ച ആസ്വദിച്ചു കൊണ്ടുള്ള യാത്രയെ ഞങ്ങൾ ആടിയും പാടിയും ആ മോദിച്ചു.
ഏതാനും മിനിറ്റുകൾക്കുള്ളിൽ താഴ്
വരയിൽ നിന്ന് മലമുകളിലേക്ക് എത്തിക്കുന്നു.
എലിവേറ്റർ ഉയരുമ്പോൾ മേഘങ്ങൾക്കിടയിൽ നിന്നുയരുന്ന പാറത്തൂണുകൾ പതുക്കെ പ്രത്യക്ഷപ്പെടും. ഒരു സിനിമ കാണുന്നതുപോലുള്ള അനുഭവമാണിത്.
പാർക്കിനകത്ത് നൂറുകണക്കിന് ഇലക്ട്രിക്, ഡീസൽ ഷട്ടിൽ ബസുകൾ സർവീസ് നടത്തുന്നുണ്ട്. വിനോദ സഞ്ചാരികളെ താഴ് വാരത്ത് നിന്ന് എലിവേറ്റർ കവാടത്തിലേക്കും തിരിച്ചും എത്തിക്കാനുള്ള സംവിധാനം.
മല മുകളിലെ കാഴ്ചകളെ കണ്ണി കോർക്കുന്നതിനുള്ള സർവീസിലൂടെ
ദീർഘദൂര നടത്തം ഒഴിവാക്കി കിട്ടും
പ്രവേശനടിക്കറ്റിനൊപ്പം പല റൂട്ടുകളിലും ബസ് സേവനം ഉൾപ്പെട്ടിരിക്കും.
വുള്ളിംഗ് യുവാൻ ഗേറ്റ് 1ഫോറസ്റ്റ് പാർക്ക് ഗേറ്റ് എന്നിവയിലൂടെയാണ് സന്ദർശകർക്കുള്ള പ്രവേശനം .
ബൈലോങ് എലിവേറ്ററിലും കേബിൾ കാറിലും ആയിരുന്നു മലമുകളിലേക്കുള്ള കയറ്റം.
വിവിധ കാഴ്ചകൾ കണ്ട് മറ്റൊരു മാർഗ്ഗം വഴി തിരിച്ചിറങ്ങി.
ഷാങ്‌ജിയാജിയുടെ ഏറ്റവും വലിയ കൗതുകം
ലോകത്തിലെ പല ദേശീയോദ്യാനങ്ങളിലും മലകൾ കയറാൻ മണിക്കൂറുകൾ നടക്കേണ്ടിവരും. എന്നാൽ ഷാങ്‌ജിയാജിയിൽ പ്രകൃതിയെ നശിപ്പിക്കാതെ, അതിന്റെ ഭംഗി ആസ്വദിക്കാൻ എലിവേറ്ററുകളും കേബിൾ കാറുകളും ബസുകളും സമന്വയിപ്പിച്ചിരിക്കുന്നു.
ഷാങ്‌ജിയാജി നാഷണൽ ഫോറസ്റ്റ് പാർക്കി
ലെ വികസന പ്രവർത്തനങ്ങളുടെ ഏറ്റവും വലിയ പ്രത്യേകത, പ്രകൃതിയെ മാറ്റിമറിക്കാതെ അതിനോട് ഇണങ്ങിച്ചേർന്നാണ് അടിസ്ഥാനസൗകര്യങ്ങൾ നിർമ്മിച്ചിരിക്കുന്നത് എന്നതാണ്.
മലനിരകൾ വെട്ടിമാറ്റുകയോ പാറസ്തംഭങ്ങൾ തകർക്കുകയോ ചെയ്യാതെ, അവയുടെ സ്വാഭാവിക ഘടനയെ മാനിച്ചാണ് എലിവേറ്ററുകളും നടപ്പാതകളും കേബിൾ കാറുകളും സ്ഥാപിച്ചിരിക്കുന്നത്.
ലോകപ്രശസ്തമായ ബൈലോങ് എലിവേറ്റർ പാറക്കെട്ടിന്റെ വശത്ത് ഘടിപ്പിച്ചതാണ്; മലയുടെ വലിയൊരു ഭാഗം പൊളിച്ചുമാറ്റേണ്ടി വന്നിട്ടില്ല.
വിനോദസഞ്ചാരികളുടെ സഞ്ചാരം നിയന്ത്രിത പാതകളിലൂടെയാക്കി വനമേഖലയിലെ സസ്യജാലങ്ങൾക്കും വന്യജീവികൾക്കും ഉണ്ടാകാവുന്ന ആഘാതം പരമാവധി കുറച്ചിരിക്കുന്നു.
പരിസ്ഥിതി പഠനങ്ങൾക്കും ആഘാത വിലയിരുത്തലുകൾക്കും ശേഷമാണ് ഓരോ പദ്ധതിയും നടപ്പിലാക്കിയത്.
ഇലക്ട്രിക് ബസുകളും മലിനീകരണം കുറഞ്ഞ ഗതാഗത സംവിധാനങ്ങളും ഉപയോഗിച്ച് വനത്തിന്റെ സ്വാഭാവിക അന്തരീക്ഷം സംരക്ഷിക്കുന്നു.
മഴവെള്ളത്തിന്റെ ഒഴുക്ക്, മണ്ണൊലിപ്പ്, ജൈവവൈവിധ്യം എന്നിവയ്ക്ക് ദോഷമുണ്ടാകാതിരിക്കാനുള്ള പ്രത്യേക എഞ്ചിനീയറിങ് സംവിധാനങ്ങളും ഒരുക്കിയിട്ടുണ്ട്.
കാവ്യാത്മകമായി കുറിച്ചാൽ
“പർവതത്തിന്റെ നെഞ്ച് പിളർത്തിയല്ല അവർ വഴി തീർത്തത്;
പർവതത്തിന്റെ ഹൃദയമിടിപ്പ് കേട്ടാണ് അവർ പാത വരച്ചത്.
വനത്തിന്റെ നിശ്ശബ്ദതയെ മുറിവേൽപ്പിക്കാതെ,
മനുഷ്യന്റെ പാദസ്പർശം പ്രകൃതിയുമായി സൗഹൃദത്തിലാക്കിയിടമാണ് ഷാങ്‌ജിയാജി.”
പ്രകൃതിയെ കീഴടക്കാനുള്ള മനുഷ്യന്റെ ശ്രമമല്ല, മറിച്ച് പ്രകൃതിയോട് ആദരവ് പ്രകടിപ്പിച്ചുകൊണ്ടുള്ള സാങ്കേതികവിദ്യയുടെ പ്രയോഗമാണ് ഷാങ്‌ജിയാജിയിലെ നിർമ്മാണ പ്രവർത്തനങ്ങളുടെ യഥാർത്ഥ മഹത്വം.
കുട്ടികൾക്കും മുതിർന്നവർക്കും ഭിന്നശേഷിക്കാർക്കും പോലും മേഘങ്ങൾക്കിടയിലെ ആ അത്ഭുതലോകം എളുപ്പത്തിൽ അനുഭവിക്കാൻ കഴിയുന്ന മഹത്തായ മാതൃക.
ഷാങ് ജിയാജി നാഷണൽ ഫോറസ്റ്റ് പാർക്കി ന്റെ വിസ്തീർണം ഏകദേശം 4,810 ഹെക്ടർ (ഏകദേശം 48.1 ചതുരശ്ര കിലോമീറ്റർ) ആണ്.
എന്നാൽ ഇത് ഉൾപ്പെടുന്ന വലിയ സംരക്ഷിത വുള്ളിംഗ് യുവാൻ സീനിക് ആന്റ് ഹിസ്റ്റോറിക് ഇന്ററസ്റ്റ് ഏറിയ യുടെ ആകെ വിസ്തീർണം ഏകദേശം 397 ചതുരശ്ര കിലോമീറ്റർ ആണ്. ലോക പൈതൃക പദവി ലഭിച്ചിരിക്കുന്നത് ഈ വിശാലമായ വുലിങ്‌യുവാൻ പ്രദേശത്തിനാണ്.
വിസ്തൃതിയുടെ പ്രത്യേകതകൾ
3,000-ത്തിലധികം ക്വാർട്സ്-സാൻഡ്‌സ്റ്റോൺ പാറസ്തംഭങ്ങൾ
പലതും 200 മുതൽ 400 മീറ്റർ വരെ ഉയരമുള്ളവ
ആഴമേറിയ താഴ് വരകൾ, ഗുഹകൾ, അരുവികൾ
സമൃദ്ധമായ വനമേഖലയും ജൈവവൈവിധ്യവും
താരതമ്യത്തിന്, 48 ചതുരശ്ര കിലോമീറ്റർ വിസ്തൃതിയുള്ള ദേശീയോദ്യാനം വളരെ വലുതാണെങ്കിലും, അതിന്റെ ഉള്ളിൽ കാണുന്ന പാറസ്തംഭങ്ങളുടെയും താഴ് വരകളുടെയും സാന്ദ്രതയാണ് ഇതിനെ ലോകത്തിലെ ഏറ്റവും വിസ്മയകരമായ പ്രകൃതി ദൃശ്യഭൂമികളിലൊന്നാക്കി മാറ്റുന്നത്.
വുളിങ് യുവാൻ മേഖലയെ മുഴുവനായി സന്ദർശിക്കാൻ സാധാരണയായി 2–4 ദിവസമെങ്കിലും വേണ്ടിവരും.
ഷാങ്‌ജിയാജിയിൽ യാത്ര ചെയ്യുമ്പോൾ പലർക്കും തോന്നുന്ന ഒരു വാചകമുണ്ട്:
“ഇവിടെ മല കയറുന്നത് മനുഷ്യനല്ല; സാങ്കേതികവിദ്യയാണ് നിങ്ങളെ മലമുകളിലേക്ക് കൊണ്ടുപോകുന്നത്.”
ബീജിംഗിൽ നിന്ന്
വിമാന മാർഗം: ഏകദേശം 2.5–3 മണിക്കൂർ.
ഹൈസ്പീഡ് റെയിൽ + സാധാരണ റെയിൽ: 8–10 മണിക്കൂർ.
ഷാങ്ഹായിൽ നിന്ന്
നേരിട്ടുള്ള വിമാന സർവീസുകൾ ലഭ്യമാണ് (ഏകദേശം 2 മണിക്കൂർ).
ഹൈസ്പീഡ് ട്രെയിൻ വഴി 7–9 മണിക്കൂർ.
ഗ്വാങ്‌ഷൗവിൽ നിന്ന്
വിമാനവും ഹൈസ്പീഡ് ട്രെയിനും ലഭ്യമാണ്.
പാർക്കിലേക്ക് എത്താൻ
വിമാനത്താവളത്തിൽ നിന്ന് ടാക്സി, ബസ്, ടൂറിസ്റ്റ് ഷട്ടിൽ എന്നിവ വഴി പാർക്കിലെ പ്രവേശന കവാടങ്ങളിലെത്താം.
പാർക്കിനുള്ളിലെ ഗതാഗത സൗകര്യങ്ങൾ
സൗജന്യ ഷട്ടിൽ ബസുകൾ
ബെയ്ലോങ് ഗ്ലാസ് എലിവേറ്റർ
കേബിൾ കാറുകൾ
എസ്കലേറ്ററുകൾ
നടപ്പാതകൾ
“ഭൂമിയുടെ നെഞ്ചിൽ നിന്ന് ആകാശത്തേക്ക് ഉയർന്ന കല്ലിൻ വിരലുകൾ പോലെ പാറസ്തംഭങ്ങൾ… അവയെ ചുറ്റിപ്പറ്റി ഒഴുകുന്ന മേഘങ്ങൾ… താഴെ പച്ചക്കാടുകളുടെ സമുദ്രം… പ്രകൃതിയുടെ ശില്പശാലയിൽ ദൈവം സ്വന്തം കൈകൊണ്ട് കൊത്തിയെടുത്ത അത്ഭുതലോകം തന്നെയാണ് ഷാങ്‌യാജി നാഷണൽ പാർക്ക്.”
ചൈനയിലേക്കുള്ള യാത്രയിൽ ബീജിംഗ്, ഷാങ്ഹായ് എന്നിവയ്ക്ക് ശേഷം പ്രകൃതിയുടെ വിസ്മയം തേടുന്നവർക്ക് നിർബന്ധമായും സന്ദർശിക്കേണ്ട ഇടമാണ് ഷാങ്‌യാജി.
തുടരും ……
നാളെ ടിയാൻമെൻ മൗണ്ടൻ ( ടിയാൻമെൻ മല നിരകൾ)