തൃശൂര്: കെഎസ് ആര് ടി സി ബസുകളില് സ്ത്രീകള്ക്ക് യാത്ര സൗജന്യമാക്കാനുള്ള തീരുമാനത്തില് പ്രതിഷേധം അറിയിച്ച് സ്വകാര്യ ബസ് ഉടമകള്. ബജറ്റില് ഉള്പ്പടെ തങ്ങള്ക്ക് അനുകൂലമായ തീരുമാനമുണ്ടായില്ലെങ്കില് സര്വീസ് നിര്ത്തി സമരം നടത്തുമെന്ന് ബസ് ഓപ്പറേറ്റേര്സ് അസോസിയേഷന് അറിയിച്ചു. സ്ത്രീ യാത്രക്കാര് കൂടി ഇല്ലെങ്കില് സര്വീസ് നടത്താന് കഴിയില്ല. വന് നഷ്ടമാണ് സഹിക്കേണ്ടി വരിക. വിദ്യാര്ത്ഥികളുടെ നിരക്ക് വര്ധിപ്പിച്ചിട്ട് 15 വര്ഷമായി. സ്വകാര്യ ബസ് മേഖലയെ തകര്ക്കുന്ന പ്രഖ്യാപനമാണ് ഇപ്പോള് വന്നിരിക്കുന്നത്. സര്വീസ് നിര്ത്തിയാല് നിരവധി പേര്ക്ക് തൊഴില് നഷ്ടമാകും. ബജറ്റില് പ്രതീക്ഷ അര്പ്പിക്കുന്നുവെന്നും ബസ് ഓപ്പറേറ്റേഴ്സ് ഓര്ഗനൈസേഷന് ഭാരവാഹികള് പറഞ്ഞു. സര്ക്കാര് ആവശ്യപ്പട്ട പൈസക്കാണ് സ്വകാര്യ ബസുകള് ഓടുന്നത്. കെഎസ്ആര്ടിസിക്ക് നല്കുന്ന ആനുകൂല്യങ്ങള് സ്വകാര്യ ബസ് സര്വ്വീസിനും വേണം. സ്വകാര്യ ബസുകള് നിലനില്ക്കാന് പാക്കേജ് വേണം. മത്സ്യ ബന്ധനത്തിന് മണ്ണെണ്ണ സബ്സിഡി കൊടുക്കുന്നത് പോലെ ഇന്ധനത്തില് ഇളവ് വേണമെന്നും മുഖ്യമന്ത്രി ചര്ച്ചക്ക് വിളിക്കുമെന്ന് പ്രതീക്ഷിക്കുന്നതായും അവര് പറഞ്ഞു. 19 ന് ശേഷം ബസുടമകളുടെ സംയുക്ത യോഗം ചേരും. മേഖലയെ സംരക്ഷിക്കുന്ന തീരുമാനമുണ്ടായില്ലെങ്കില് ബജറ്റിന് ശേഷം സ്വകാര്യ ബസ് പണിമുടക്കുണ്ടാകുമെന്ന് ബസ് ഉടമകള് മുന്നറിയിപ്പു നല്കി.
സമാജിയോ മോട്ടേഴ്സിന്റെ നവീകരിച്ച കാസര്കോട് ഷോറൂം ഉദ്ഘാടനം ചെയ്തു
Tuesday, 14 July 2026, 16:01
