പത്തനംതിട്ട: കൂട്ടുകാർക്കൊപ്പം പുഴയിൽ കുളിച്ചു കൊണ്ടിരുന്ന എൻജിനീയറിങ് വിദ്യാർഥി ഒഴുക്കിൽപ്പെട്ടു. ചെങ്ങന്നൂർ ഐ.എച്ച്.ആർ.ഡി. എൻജിനീയറിങ് കോളേജ് രണ്ടാം വർഷ വിദ്യാർത്ഥിയും മണിമല സ്വദേശിയുമായ ജോയേൽ ആന്റണി (21) യെയാണ് കാണാതായത്. മണിമല വയലിൽ കരിക്കാട്ടിൽ പ്രകാശിന്റെ മകനാണ്. ഇന്നലെ വൈകിട്ട് ചെങ്ങന്നൂർ മംഗലംപാറ കടവിൽ മൂന്ന് കൂട്ടുകാർക്കൊപ്പ മാണ് ജോയേൽ കുളിക്കാൻ ഇറങ്ങിയത്. കുളിച്ചു കൊണ്ടിരിക്കുന്നതിനിടയിൽ പെട്ടെന്നുണ്ടായ ഒഴുക്കിൽപ്പെടുകയായിരുന്നു. കൂടെയുണ്ടായിരുന്നവർ വിവരം ഉടൻ പോലീസിലും ഫയർഫോഴ്സിലും അറിയിച്ചു. ഫയർഫോഴ്സ് – പൊലീസ് സംഘം വിവരമറിഞ്ഞുടനെ സ്ഥലത്ത് എത്തി തിരച്ചിൽ ആരംഭിച്ചു. രാത്രിയിലും തിരച്ചിൽ തുടർന്നെങ്കിലും കണ്ടെത്താനായില്ല.