ബീഹാര്: വിവാഹിതയായ കാമുകിയെ കാണാന് രാത്രി എത്തിയ കാമുകനെ ബന്ധുക്കള് മര്ദ്ദിച്ച് കൊലപ്പെടുത്തി. ബീഹാറിലെ ഗോപാല്ഗഞ്ച് ജില്ലയില് കഴിഞ്ഞദിവസം രാത്രിയാണ് സംഭവം. 23 കാരനായ ബാദല് സിംഗ് ആണ് കൊല്ലപ്പെട്ടത്. കാജല് കുമാരി എന്ന യുവതിയുമായി 23 കാരന് ദീര്ഘകാലമായി പ്രണയത്തിലായിരുന്നുവെന്ന് പൊലീസ് പറഞ്ഞു. അതിനിടെ യുവതി മറ്റൊരാളെ വിവാഹം കഴിക്കുകയും ഈ ബന്ധത്തില് ഒരു കുഞ്ഞുണ്ടാവുകയും ചെയ്തു. അടുത്തിടെ ഭര്ത്താവുമായുള്ള ബന്ധം വഷളായതിനെ തുടര്ന്ന് മാതാപിതാക്കളുടെ വീട്ടിലെത്തിയതാണ് യുവതി. കിഴക്കന് ചമ്പാരന് ജില്ലയിലെ മോത്തിഹാരിയിലെ ജഖ്ര ഗ്രാമവാസിയാണ് മരിച്ച ബാദല് സിംഗ്.
യുവതി സ്വന്തം വീട്ടിലെത്തിയതറിഞ്ഞ് രാത്രി വൈകിയാണ് ബാദല് അവിടെ എത്തുന്നത്. ഇത് കാണാനിടയായ കുടുംബാംഗങ്ങള് ബാദലിനെ പിടികൂടി ക്രൂരമായി മര്ദ്ദിച്ചു. വിവരമറിഞ്ഞ് സ്ഥലത്തെത്തിയ പൊലീസ് ബാദലിനെ ആശുപത്രിയില് എത്തിച്ചു. എന്നാല് ചികിത്സയ്ക്കിടെ മരിച്ചു. സംഭവത്തിന് പിന്നാലെ പ്രദേശത്ത് സംഘര്ഷാവസ്ഥ ഉടലെടുത്തു. കേസുമായി ബന്ധപ്പെട്ട് കാജല് കുമാരിയെയും അമ്മയെയും ചോദ്യം ചെയ്യാനായി പൊലീസ് കസ്റ്റഡിയിലെടുത്തു. ബാദലിനെ മര്ദ്ദിച്ചവരെ കണ്ടെത്താന് അന്വേഷണം ആരംഭിച്ചതായി പൊലീസ് പറഞ്ഞു.
