കാസര്കോട്: നീലേശ്വരം, ചാത്തമത്ത് സ്കൂട്ടര് നിയന്ത്രണം വിട്ട് മറിഞ്ഞുണ്ടായ അപകടത്തില് യുവാവ് മരിച്ചു. ചുള്ളിക്കാട്ടെ രാഘവന്-കെ വി വസുമതി ദമ്പതികളുടെ മകന് കെ .ഷിനോയ് (41) ആണ് മരിച്ചത്. ചൊവ്വാഴ്ച ഉച്ചയോടെ കരുവന്തല റോഡിലെ ചാത്തമത്താണ് അപകടം. റോഡില് നിന്നു സ്കൂട്ടര് താഴ്ച്ചയിലേയ്ക്ക് മറിയുകയായിരുന്നു.അപകട സമയത്ത് പരിസരത്ത് ആരും ഉണ്ടായിരുന്നില്ല. പിന്നീട് ഇതുവഴിയെത്തിയ കൊറിയര് ഡെലിവറി ജീവനക്കാരനാണ് ഷിനോയി അപകടത്തില്പ്പെട്ടു കിടക്കുന്നത് കണ്ടത്. ഇയാള് വിവരം അറിയിച്ചതിനെ തുടര്ന്ന് നാട്ടുകാര് ഷിനോയിയെ ആശുപത്രിയില് എത്തിച്ചുവെങ്കിലും രക്ഷിക്കാനായില്ല. നീലേശ്വരം പൊലീസ് കേസെടുത്തു. സഹോദരി: മെഹ്ന.
