പയ്യന്നൂര്: കളിച്ചു കൊണ്ടിരിക്കെ കിണറില് വീണ പന്തെടുക്കാന് ഇറങ്ങവെ കാല് തെന്നി വീണ് വിദ്യാര്ത്ഥി മരിച്ചു. ശ്രീകണ്ഠാപുരം, കൊയ്യം ഹയര്സെക്കണ്ടറി സ്കൂളിലെ ഒന്പതാം ക്ലാസ് വിദ്യാര്ത്ഥി മുഹമ്മദ് (14) ആണ് മരിച്ചത്. പത്താം ക്ലാസിലേക്കുള്ള പ്രവേശനത്തിനുള്ള ഒരുക്കത്തിലായിരുന്നു. കൊയ്യം മര്ക്കസില് താമസിച്ചായിരുന്നു പഠനം നടത്തിയിരുന്നത്.
വെള്ളിയാഴ്ച രാവിലെ കൂട്ടുകാര്ക്കൊപ്പം മര്ക്കസിനു സമീപത്ത് പന്ത് കളിക്കുകയായിരുന്നു. ഇതിനിടയിലാണ് പന്ത് കിണറ്റില് വീണത്. പന്തെടുക്കാന് ഇറങ്ങുന്നതിനിടയില് കാല് തെന്നി കിണറ്റിലേക്ക് വീഴുകയായിരുന്നു. കൂടെയുണ്ടായിരുന്നവരുടെ നിലവിളി കേട്ട് ആള്ക്കാര് ഓടിയെത്തി മുഹമ്മദിനെ പുറത്തെടുത്തുവെങ്കിലും രക്ഷിക്കാനായില്ല.
കാട്ടാമ്പള്ളിയിലെ ഷമീര് അഷ്റഫിയുടെയും വളക്കൈ മദ്രസക്കടുത്തു താമസിക്കുന്ന ഫാത്തിമയുടെയും മകനാണ് മുഹമ്മദ്. സഹോദരങ്ങള്: ഷംവീല്, ഷാര്വ.
തദ്ദേശ സ്ഥാപന ഫണ്ട് വിഹിതം: ഇടതു സമരം അപഹാസ്യം : എ അബ്ദുൾ റഹ്മാൻ
Sunday, 9 August 2026, 10:59
