ന്യൂഡല്ഹി: നാല് നില കെട്ടിടത്തില് എസി പൊട്ടിത്തെറിച്ചുണ്ടായ തീപിടിത്തത്തില് ഒമ്പതുപേര് മരിക്കുകയും നാലുപേര്ക്ക് പരിക്കേല്ക്കുകയും ചെയ്തു. കിഴക്കന് ഡല്ഹിയിലെ വിവേക് വിഹാറില് ഇന്ന് പുലര്ച്ചെ മൂന്ന് മണിയോടെയാണ് തീപിടുത്തമുണ്ടായത്. വിവരമറിഞ്ഞയുടന് 14 ഫയര് യൂണിറ്റുകള് സ്ഥലത്തെത്തിയാണ് തീ നിയന്ത്രണവിധേയമാക്കിയത്. കെട്ടിടത്തിന്റെ ബാല്ക്കെണിയിലൂടെയും ജനാലകളിലൂടെയും 20-ഓളം പേരെ അഗ്നിശമന സേന രക്ഷപ്പെടുത്തി.
കെട്ടിടത്തിലെ ഒരു എസി പൊട്ടിത്തെറിച്ചതിനെ തുടര്ന്നാണ് തീ പടര്ന്നതെന്ന് ദൃക്സാക്ഷികള് പറഞ്ഞു. തീപിടുത്തത്തെ തുടര്ന്ന് കെട്ടിടത്തിനുള്ളില് കുടുങ്ങിപ്പോയവരാണ് അപകടത്തില്പ്പെട്ടത്. പരിക്കേറ്റവരെ അടുത്തുള്ള ആശുപത്രിയില് പ്രവേശിപ്പിച്ചു. കെട്ടിടത്തിനുള്ളില് കൂടുതല് ആളുകള് കുടുങ്ങിക്കിടക്കുന്നുണ്ടോ എന്നറിയാന് തിരച്ചില് തുടരുകയാണെന്ന് അഗ്നിശമന സേനാ ഉദ്യോഗസ്ഥര് അറിയിച്ചു. സംഭവത്തില് പൊലീസ് സംഘം സ്ഥലത്തെത്തി അന്വേഷണം ആരംഭിച്ചിട്ടുണ്ട്. മൃതദേഹങ്ങള് പോസ്റ്റ്മോര്ട്ടത്തിനായി ആശുപത്രിയിലേക്ക് മാറ്റി.
