മംഗളൂരു:ക്ഷേത്രോത്സവത്തോടനുബന്ധിച്ചുനടന്ന ഘോഷയാത്രയ്ക്കിടെ നടപ്പാലം തകര്‍ന്ന് എട്ടു പേര്‍ക്ക് പരിക്കേറ്റു.ദക്ഷിണ കന്നഡയിലെ പുച്ചമൊഗരുവിലെ ക്ഷേത്രോത്സവ ഘോഷയാത്രയ്ക്കിടെയാണ് അപകടമുണ്ടായത്. ക്ഷേത്രത്തില്‍ നിന്ന് ദിവ്യ ഭണ്ഡാര ഘോഷയാത്ര പോകുമ്പോഴായിരുന്നു അപകടം. ആളുകള്‍ സ്ഥിരമായി ഉപയോഗിച്ചിരുന്ന പാലമാണ് തകർന്നത് . ഘോഷയാത്ര പോകുമ്പോള്‍ കൂടുതല്‍ ആളുകള്‍ ഒന്നിച്ച് കയറിയതാവാം പാലം തകരാൻ കാരണമെന്ന് കരുതുന്നു.ഘോഷയാത്രയുടെ പിന്നിൽ സഞ്ചരിച്ചിരുന്നവരാണ് അപകടത്തില്‍പ്പെട്ടത്. പാലത്തിന്റെ അവശിഷ്ടങ്ങൾക്കൊപ്പം ആളുകള്‍ ഒന്നാകെ കുഴിയിലേക്ക് താഴ്ന്നുപോകുകയായിരുന്നു. അപകടത്തില്‍ പലരുടേയും എല്ലുകള്‍ പൊട്ടിയതായി പറയുന്നു. പരിക്കേറ്റവരെ ആശുപത്രിയില്‍ പ്രവേശിപ്പിച്ചു.