കോട്ടയം: നിയമസഭാ തിരഞ്ഞെടുപ്പ് പ്രചാരണത്തിനിടെ ബിജെപി പ്രവർത്തകൻ കുഴഞ്ഞുവീണ് മരിച്ചു. എസ്.സി. മോർച്ച എലിക്കുളം പഞ്ചായത്ത് പ്രസിഡന്റ് ഒറ്റപ്ലാക്കൽ രാജൻ പി.ടി (57)യാണ് മരിച്ചത്. പാലാ നിയോജകമണ്ഡലത്തിലെ എൻഡിഎ സ്ഥാനാർത്ഥി അഡ്വ. ഷോൺ ജോർജിന്റെ പ്രചാരണ റാലിക്കിടെയാണ് രാജൻ കുഴഞ്ഞു വീണത്. വാഹന റാലി പുരോഗമിക്കുമ്പോൾ കൂരാലി പ്രാവിൻകൂടിന് സമീപത്ത് വച്ച് രാജൻ വാഹനത്തിൽ നിന്ന് അപ്രതീക്ഷിതമായി കുഴഞ്ഞുവീണു. ഉടൻ സമീപത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.മരണകാരണം വ്യക്തമല്ലെങ്കിലും ഹൃദയാഘാതം സംഭവിച്ചിരിക്കാമെന്നാണ് പ്രാഥമിക വിലയിരുത്തൽ. സംസ്ഥാനത്ത് കടുത്ത ചൂട് തുടരുന്നതിനാൽ തിരഞ്ഞെടുപ്പ് പ്രചാരണത്തിൽ പങ്കെടുക്കുന്നവർ ജാഗ്രത പുലർത്തണമെന്ന് സംസ്ഥാന ദുരന്ത നിവാരണ അതോറിറ്റി മുന്നറിയിപ്പ് നൽകിയിരുന്നു.