തിരുവനന്തപുരം: നിയമസഭാ തെരഞ്ഞെടുപ്പ് നടക്കുന്ന ഏപ്രില് ഒമ്പതിന് സംസ്ഥാനത്തെ എല്ലാ സര്ക്കാര് ഓഫീസുകള്ക്കും വിദ്യാഭ്യാസ സ്ഥാപനങ്ങള്ക്കും പൊതുഭരണ വകുപ്പ് അവധി പ്രഖ്യാപിച്ചു. നെഗോഷ്യബിള് ഇന്സ്ട്രുമെന്റ്സ് ആക്ട് പരിധിയില് വരുന്ന എല്ലാ സ്ഥാപനങ്ങള്ക്കും അവധിയായിരിക്കുമെന്ന് ഉത്തരവില് വ്യക്തമാക്കുന്നു. സ്വകാര്യ മേഖലയിലെ ജീവനക്കാര്ക്ക് ശമ്പളത്തോടു കൂടിയ അവധി നല്കണം. വോട്ടുള്ള മണ്ഡലത്തിനു പുറത്തു ജോലി ചെയ്യുന്ന ജീവനക്കാര്ക്ക് വോട്ടു ചെയ്യാന് ശമ്പളത്തോടു കൂടിയ അവധിക്ക് അര്ഹതയുണ്ട്. താല്ക്കാലിക ജീവനക്കാര് ഉള്പ്പെടെയുള്ളവര്ക്കും ശമ്പളത്തോടു കൂടിയ അവധി അനുവദിക്കണമെന്ന് ഉത്തരവില് പറയുന്നു.
കേരളത്തിനൊപ്പം അസം, പുതുച്ചേരി എന്നിവിടങ്ങളില് ഏപ്രില് ഒമ്പതിന് വോട്ടെടുപ്പ് നടക്കും. നിയമസഭാ തെരഞ്ഞെടുപ്പിനുള്ള നാമനിര്ദ്ദേശപത്രിക സമര്പ്പിക്കാനുള്ള അവസാന തീയതി തിങ്കളാഴ്ചയാണ്. കഴിഞ്ഞ ദിവസം തന്നെ പ്രമുഖ സ്ഥാനാര്ത്ഥികള് പത്രിക സമര്പ്പിച്ചിരുന്നു. ബാക്കിയുള്ള സ്ഥാനാര്ത്ഥികള് തിങ്കാഴ്ച നാമനിര്ദ്ദേശ പത്രിക സമര്പ്പിക്കും. മാര്ച്ച് 15 ന് തെരഞ്ഞെടുപ്പ് പ്രഖ്യാപിച്ച ശേഷം ആറു പ്രവൃത്തി ദിവസങ്ങള് മാത്രമാണ് പത്രിക സമര്പ്പിക്കാനായി സ്ഥാനാര്ത്ഥികള്ക്ക് ലഭിച്ചത്. ചൊവ്വാഴ്ചയാണ് പത്രികകളുടെ സൂക്ഷ്മ പരിശോധന. നാമനിര്ദേശ പത്രിക പിന്വലിക്കാനുള്ള അവസാന ദിവസം വ്യാഴാഴ്ചയാണ്. കൂടാതെ വോട്ടര് പട്ടികയില് ഇതുവരെ പേര് ചേര്ത്തിട്ടില്ലാത്തവര്ക്ക് പട്ടികയില് പേര് ചേര്ക്കാനുള്ള അവസാന തീയതിയും തിങ്കളാഴ്ചയാണ്.
