കാസർകോട്: മഞ്ചേശ്വരം താലൂക്കിലെ കുബന്നൂർ വില്ലേജിൽ ദേർജാലിലെ വീട്ടിൽനിന്ന് 9 കിലോ കഞ്ചാവ് പിടികൂടിയ കേസിൽ പ്രതിക്ക് ഒരു വർഷം കഠിനതടവും 20,000 രൂപ പിഴയും ശിക്ഷ വിധിച്ചു. ദേർജാൽ ഹൗസിലെ ഡി എം സക്കരിയ എന്ന ജിക്കി (38) യെയാണ് കാസർകോട് അഡീഷണൽ ഡിസ്ട്രിക്ട് ആൻഡ് സെഷൻസ് കോടതി (രണ്ട്) ജഡ്ജി രാമു രമേഷ് ചന്ദ്രഭാനു ശിക്ഷിച്ചത്.പിഴ അടച്ചില്ലെങ്കിൽ രണ്ടുമാസം കൂടി അധിക തടവ് അനുഭവിക്കണമെന്നു കോടതിവിധി പ്രസ്താവനയിൽ പറഞ്ഞു. 2021 ഫെബ്രുവരി 21ന് ഉച്ചയ്ക്ക് 12.45നാണ് കേസിനാസ്പദമായ സംഭവം. കുബന്നൂർ വില്ലേജിലെ ദേർജാലിലുള്ള പ്രതിയുടെ കുടുംബവീട്ടിലെ കിടപ്പുമുറിയിൽ നിന്നാണ് കഞ്ചാവ് പിടികൂടിയത്. അന്ന് കുമ്പള എക്സൈസ് റേഞ്ച് ഇൻസ്പെക്ടറായിരുന്ന നൗഫലും സംഘവുമാണ് വീട്ടിൽ പരിശോധന നടത്തി കഞ്ചാവ് പിടികൂടിയത്. അന്വേഷണം പൂർത്തിയാക്കി പ്രതിക്കെതിരെ കോടതിയിൽ കുറ്റപത്രം സമർപ്പിച്ചത് അന്നത്തെ കാസർകോട് എക്സൈസ് ഇൻസ്പെക്ടറായിരുന്ന ജോയ് ജോസഫാണ്.പ്രോസിക്യൂഷനുവേണ്ടി അഡീഷണൽ ഗവൺമെന്റ് പ്ലീഡർ ചന്ദ്രമോഹനനും അഡ്വ.ചിത്രകലയും ഹാജരായി.