തിരുവനന്തപുരം: വ്യവസായ സൗഹൃദരംഗത്ത് കേരളം രാജ്യത്ത് ഒന്നാം സ്ഥാനത്തെത്തിയതില് മുഖ്യമന്ത്രി പിണറായി വിജയന് വ്യവസായികളെ അഭിനന്ദിച്ചു. ഇത്രകാലം ഈ രംഗത്ത് രാജ്യത്ത് കേരളം ഏറ്റവും പിന്നിലായിരുന്നു. 28-ാം സ്ഥാനത്ത്. ആ സ്ഥിതിയില് നിന്നു കേരളത്തെ ഒന്നാം സ്ഥാനത്തെത്തിച്ചതില് കേരളത്തിലെ വ്യവസായികള് വഹിച്ച പങ്കിനെ മുഖ്യമന്ത്രി ശ്ളാഘിച്ചു. ഈ മുന്നേറ്റത്തോടൊപ്പം സംസ്ഥാനത്തിന്റെ വ്യാവസായിക കുതിച്ചു ചാട്ടത്തിന് നിരവധി ദേശീയ അന്താരാഷ്ട്ര അംഗീകാരങ്ങള് ലഭിച്ചത് മുഖ്യമന്ത്രി എടുത്തുകാട്ടി. ദൈവത്തിന്റെ സ്വന്തം നാട് ഇപ്പോള് നിക്ഷേപകരുടെയും സ്വന്തം നാടായിരിക്കുന്നു-മുഖ്യമന്ത്രി അനുസ്മരിച്ചു. രാജ്യത്തിന്റെ വ്യവസായ ഹബ്ബാകാനുളള കേരളത്തിന്റെ യാത്രയില് ഓരോ സംരംഭകനൊപ്പവും സംസ്ഥാന സര്ക്കാരുണ്ടെന്നു മുഖ്യമന്ത്രി പറഞ്ഞു.
