കൊല്ലം: ആഭിചാരക്രിയയുടെ മറവില് 11 കാരിയെ പീഡിപ്പിക്കാന് ശ്രമിച്ച വ്യാജ സ്വാമി അറസ്റ്റില്. മുണ്ടയ്ക്കല് സ്വദേശി ഷിനുവാണ് പിടിയിലായത്. പരീക്ഷയ്ക്ക് ഉയര്ന്ന വിജയം വാഗ്ദാനം ചെയ്തായിരുന്നു കുട്ടിയെ ആഭിചാരക്രിയയ്ക്ക് വിധേയയാക്കിയത്. പൂജയുടെ ഭാഗമെന്ന് പറഞ്ഞ് കുട്ടിയെ ഒറ്റയ്ക്ക് മുറിയില് കൊണ്ടുപോയി സ്വകാര്യ ഭാഗത്തില് സ്പര്ശിച്ചെന്നാണ് പരാതി. മറ്റുള്ളവരില് നിന്നും കേട്ടറിഞ്ഞാണ് ഷിനുവിന്റെ അടുത്തേക്ക് എത്തിയതെന്ന് മാതാവ് പറഞ്ഞു. പിന്നീട് മകളെയും കൂട്ടി സ്വാമിയെ നേരിട്ട് കണ്ടു. ഒറ്റയ്ക്ക് കുട്ടിയോട് സംസാരിക്കണമെന്ന് പറഞ്ഞ സ്വാമി പൊണ്കുട്ടിയെയും കൂട്ടി മുറിയില്പോയി. ഒരുമണിക്കൂറിന് ശേഷം കുട്ടി പുറത്തുവന്നു. മകളുടെ മുഖത്ത് ഒരു ഭയമുണ്ടായിരുന്നു. കാര്യങ്ങള് ചോദിച്ചപ്പോള് സ്വാമി മോശമായി സ്പര്ശിച്ചുവെന്ന് മകള് പറഞ്ഞതായി മാതാവ് പൊലീസിനോട് പറഞ്ഞു. കുട്ടിയുടെ ദേഹത്ത് ഏകദേശം ഏഴോളം ചരടുകളും ഇയാള് കെട്ടിയിട്ടുണ്ട്. ചൈല്ഡ് ലൈന് കുട്ടിയെ കൗണ്സിലിങ്ങിന് വിധേയയാക്കി. പൊലീസ് നടത്തിയ അന്വേഷണത്തില് ഷിനുവിന്റെ മുറിയില് നിന്നും പൂജാ സാധനങ്ങളും വടിവാളും ചൂരലുകളും ചരടുകളും മറ്റും കണ്ടെത്തി. ശംഖ് ജ്യോതിഷം എന്ന പേരിലാണ് ഇയാളുടെ ഓഫീസ് പ്രവര്ത്തിക്കുന്നത്. ബാധ ഒഴിപ്പിക്കുക എന്ന പേരില് ചൂരല്പ്രയോഗവും ഇയാള് നടത്താറുണ്ടെന്നാണ് വിവരം. സംസ്ഥാനത്തിന്റെ വിവിധ ഭാഗത്ത് നിന്നും ഇവിടേക്ക് ആളുകള് എത്താറുണ്ടെന്നും പറയുന്നു.
