ഇടുക്കി: തൊടുപുഴയിൽ തൊണ്ടിമുതലായ സ്പോർട്സ് സൈക്കിൾ കടത്തിയ പൊലീസ് ഉദ്യോഗസ്ഥന് സസ്പെൻഷൻ. കാളിയാർ പൊലീസ് സ്റ്റേഷനിലെ സീനിയർ സിവിൽ പൊലീസ് ഓഫിസർ കെ. ജയ്മോന് എതിരെയാണ് നടപടി. കാരിക്കോട് സ്വദേശിയുടെ വീട്ടിൽ നിന്നു മോഷണം പോയ റബർഷീറ്റും 17,000 രൂപ വിലയുള്ള സ്പോർട്സ് സൈക്കിളും കോടതിയാണ് തൊടുപുഴ പൊലീസിനെ സൂക്ഷിക്കാൻ ഏൽപിച്ചത്. മേയ് 18ന് സൈക്കിൾ കാണാതായി. മോഷണ വസ്തുക്കൾ തിരികെ ലഭിക്കാൻ ഉടമ കോടതിയെ സമീപിച്ചതോടെയാണ് സൈക്കിൾ കാണാനില്ലെന്ന വിവരം പുറത്തറിയുന്നത്. സിസിടിവി ദൃശ്യങ്ങൾ പരിശോധിച്ചപ്പോൾ ജയ്മോൻ സൈക്കിൾ കടത്തിയതായി കണ്ടെത്തുകയായിരുന്നു. തുടർന്ന് സ്പെഷൽ ബ്രാഞ്ച് നടത്തിയ അന്വേഷണത്തിന്റെ അടിസ്ഥാനത്തിലാണ് സസ്പെൻഷൻ.