മൈസൂര്: പതിനെട്ടുകാരി അന്യജാതിക്കാരനെ പ്രണയിച്ച് വിവാഹം കഴിച്ചതില് മനം നൊന്താണെന്നു പറയുന്നു മാതാപിതാക്കളും സഹോദരിയും ജലാശയത്തില് ചാടി ആത്മഹത്യ ചെയ്തു. എച്ച്.ഡി കോട്ടെ താലൂക്കിലെ ഗ്രെയ്നൂര്, ഗ്രാമത്തിലെ മഹാദേവ സ്വാമി (55), ഭാര്യ മഞ്ജുള (42), ഇളയ മകള് ഹര്ഷിത (18) എന്നിവരാണ് ജീവനൊടുക്കിയത്. മരണക്കുറിപ്പ് എഴുതി വച്ച ശേഷമായിരുന്നു ആത്മഹത്യ. തങ്ങളുടെ കൂട്ടമരണത്തിനു ഉത്തരവാദി മൂത്ത മകളാണെന്നും അവള്ക്ക് സ്വത്തു നല്കരുതെന്നും മരണം വരെ ജയിലില് അടയ്ക്കണമെന്നും ആത്മഹത്യാ കുറിപ്പില് പറയുന്നു. മഹാദേവ സ്വാമിയുടെ മൂത്ത മകള് മൈസൂരുവിലെ കോളേജിലാണ് പഠിച്ചത്. ഈ സമയത്ത് മകള് കോട്ട താലൂക്കിലെ ഉദ്ബര്ഹാദി സ്വദേശിയും അന്യജാതിക്കാരനുമായ യുവാവുമായി പ്രണയത്തിലായി. മൂന്നു ദിവസം മുമ്പ് ഇവര് വീട്ടുകാര് അറിയാതെ വിവാഹിതരായി. ഈ വിവരമറിഞ്ഞാണ് മാതാപിതാക്കളും സഹോദരിയും ജലാശയത്തില് ചാടി ജീവനൊടുക്കിയത്. ജലാശയത്തിനു സമീപത്തു ബൈക്ക് നിര്ത്തിയിട്ടത് ശ്രദ്ധയില്പ്പെട്ടവര് സംശയം തോന്നി പൊലീസില് വിവരം അറിയിക്കുകയായിരുന്നു. പൊലീസും ഫയര്ഫോഴ്സും എത്തി ജലാശയത്തില് നടത്തിയ പരിശോധനയിലാണ് മൂന്നു പേരുടെയും മൃതദേഹം കണ്ടെത്തിയത്.
എണ്മകജെ മഞ്ചളഗിരി ശങ്കര ഭട്ട് അന്തരിച്ചു
Thursday, 18 June 2026, 17:08
