അബുദാബി: അബുദാബി ഇന്ത്യ സോഷ്യല്‍ ആന്റ് കള്‍ച്ചറല്‍ സെന്ററില്‍ (ഐ എസ് സി) നാല് പതിറ്റാണ്ട് പൂര്‍ത്തിയാക്കിയ ജനറല്‍ മാനേജര്‍ ടോമി മില്ലറിനെ (രാജു) 58ാമത് ഐ എസ് സി വാര്‍ഷിക ആഘോഷം ആദരിച്ചു. പ്രസിഡന്റ് ജയറാം റായ് മിത്രംപാടി, ജനറല്‍ സെക്രട്ടറി രാജേഷ് ശ്രീധരന്‍ നായര്‍, ട്രഷറര്‍ ദിനേഷ് പൊതുവാള്‍, ഐ എസ് സി പാറ്റേണ്‍ ഗവര്‍ണര്‍ കെ മുരളീധരന്‍ എന്നിവര്‍ ചേര്‍ന്നാണ് ആദരിച്ചത്. 1982ല്‍ അബുദാബിയിലെത്തിയ രാജു 1985ലാണ് ഐ എസ് സി യില്‍ അകൗണ്ടന്റായി ജോലിയില്‍ പ്രവേശിച്ചത്. 1990ല്‍ മാനേജറായും 2010ല്‍ ജനറല്‍ മാനേജറായും സ്ഥാനക്കയറ്റം ലഭിച്ചു. തുടര്‍ന്ന് ഇതുവരെ ജനറല്‍ മാനേജര്‍ സ്ഥാനത്ത് തുടരുകയാണ്.
കമ്മിറ്റിയോടും കഴിഞ്ഞകാല കമ്മിറ്റി അംഗങ്ങളോടും കൃതജ്ഞതയും കടപ്പാടുമുണ്ടെന്ന് അദ്ദേഹം നന്ദി പറഞ്ഞു. ഐ എസ് സി നടത്തിയ ജീവകാരുണ്യ പ്രവര്‍ത്തനത്തിനും സാമൂഹ്യ സേവനത്തിനും അംഗീകാരമായി 2017ല്‍ ഇന്ത്യന്‍ ഗവണ്‍മെന്റ് നല്‍കിയ പ്രവാസി ഭാരതീയ പുരസ്‌കാരവും ഗള്‍ഫ് രാജ്യത്ത് ആദ്യമായി ഐ എസ് സി യില്‍ രാഷ്ട്ര പിതാവ് മഹാത്മാ ഗാന്ധിയുടെ പ്രതിമ സ്ഥാപിക്കാന്‍ കഴിഞ്ഞതും ജീവിതത്തില്‍ ഒരിക്കലും മറക്കാനാവാത്ത അനുഭവമാണെന്ന് അദ്ദേഹം കൂട്ടി ചേര്‍ത്തു. അബുദബി ഐ എസ് സി ചെയര്‍മാന്‍ പത്മശ്രീ ഡോ. എം എ യൂസഫ് അലി നല്‍കി വരുന്ന പിന്തുണ ഒരിക്കലും മറക്കുവാന്‍ കഴിയില്ല. കഴിഞ്ഞ നാല് പതിറ്റാണ്ട് കാലം കൂടെ സേവനം ചെയ്ത സഹപ്രവര്‍ത്തകരുടെ പിന്തുണയും മെമ്പര്‍മാരുടെ പിന്തുണയും വിലമതിക്കാനാവാത്തതാണ് രാജു കൂട്ടി ചേര്‍ത്തു.