കാസര്‍കോട്: പെരിയ, പുളിക്കാലില്‍ പുലി ഭീതി മാറുന്നില്ല. ഞായറാഴ്ച രാത്രി രണ്ടിടങ്ങളില്‍ പുലിയിറങ്ങിയ വിവരമറിഞ്ഞ് വനം വകുപ്പ് അധികൃതര്‍ സ്ഥലത്തെത്തി പരിശോധന നടത്തി.
പുളിക്കാലില്‍ രാത്രി 9.30മണിയോടെയാണ് പുലിയെ കണ്ടത്. ആള്‍ക്കാര്‍ ബഹളം വച്ചതോടെ പുലി അരങ്ങനടുക്കം ഭാഗത്തേക്ക് ഓടിപ്പോയതായി സംശയിക്കുന്നു. വിവരമറിഞ്ഞു നിരവധി പേരാണ് സ്ഥലത്തെത്തിയത്. നാട്ടുകാര്‍ വിവരമറിയിച്ചതിനെ തുടര്‍ന്ന് ഫോറസ്റ്റ് ഉദ്യോഗസ്ഥര്‍ സ്ഥലത്തെത്തി. പുളിക്കാലില്‍ പുലിയെ കണ്ടതിനു പിന്നാലെ കല്യോട്ട്, ഏച്ചിലടുക്കത്തും പുലിയെ കണ്ടതായി പറയുന്നു. അച്യുതന്‍ എന്നയാളുടെ വീടിനു സമീപത്തു കൂടി പുലി നടന്നു പോകുന്നത് കണ്ടതായി നാട്ടുകാര്‍ പറയുന്നു. ഞായറാഴ്ച സന്ധ്യയോടെ കല്യോട്ട്, കൂരാങ്കരയിലും പുലിയെ കണ്ടതായി പ്രചാരണം ഉണ്ടായിരുന്നു.